ព័ត៌មានអន្ដរជាតិ

រ៉យទ័រ៖ អាមេរិកនឹងជំរុញអឺរ៉ុប ទិញអាវុធពីខ្លួនបន្ថែមទៀត ដើម្បីជួយដល់អ៊ុយក្រែន

បានផុស

២ ខែ មុន

នៅ

ថ្ងៃអង្គារ ១១ កុម្ភៈ ២០២៥

ដោយ

Chheang

ប្រភពរបស់ទីភ្នាក់ងារព័ត៌មានរ៉យទ័រ បានឲ្យដឹងថា រដ្ឋបាលលោក ដូណាល់ ត្រាំ គ្រោងនឹងជំរុញសម្ព័ន្ធមិត្តអឺរ៉ុបឲ្យទិញសព្វាវុធរបស់អាមេរិកបន្ថែមទៀតសម្រាប់អ៊ុយក្រែន មុនពេលការចរចាសន្តិភាពជាមួយប្រទេសរុស្ស៊ី។

សព្វាវុធអាមេរិកដែលដឹកទៅអ៊ុយក្រែន (រូបថត៖ Getty)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផែនការនេះ បើត្រូវបានដាក់ឲ្យដំណើរការជាផ្លូវការ នឹងផ្តល់ការធានាឡើងវិញមួយចំនួនដល់មេដឹកនាំអ៊ុយក្រែន ដែលមានការព្រួយបារម្ភថា លោកប្រធានាធិបតី ត្រាំ អាចនឹងរារាំងជំនួយបន្ថែមទៀតដល់អ៊ុយក្រែន ដែលយោធារបស់ពួកគេបាននិងកំពុងបាត់បង់ទឹកដីបន្តិចម្តងៗ ក្រោមការវាយលុកដ៏ខ្លាំងក្លារបស់រុស្ស៊ីនៅតំបន់ភាគខាងកើត។

បណ្តាប្រទេសនៅអឺរ៉ុបពីមុន ក៏ធ្លាប់បានទិញសព្វាវុធរបស់អាមេរិកសម្រាប់អ៊ុយក្រែន ក្នុងអំឡុងរដ្ឋបាលលោក ចូ បៃដិន ផងដែរ។

ប្រភពបាននិយាយថា មន្ត្រីសហរដ្ឋអាមេរិក រួមទាំងបេសកជនអ៊ុយក្រែនរបស់លោក ត្រាំ គឺលោក Keith Kellogg នឹងពិភាក្សាអំពីការទិញអាវុធដែលអាចមានជាមួយសម្ព័ន្ធមិត្តអឺរ៉ុបនៅសប្តាហ៍នេះ ក្នុងអំឡុងពេលសន្និសីទសន្តិសុខទីក្រុង Munich។

ពួកគេបានបន្ថែមថា វាគឺជាគំនិតមួយក្នុងចំណោមគំនិតជាច្រើនដែលរដ្ឋបាលកំពុងពិភាក្សា ដើម្បីបន្តការដឹកជញ្ជូនសព្វាវុធរបស់សហរដ្ឋអាមេរិកទៅកាន់ទីក្រុងកៀវ ដោយមិនចាំបាច់ចំណាយដើមទុនដ៏ច្រើនរបស់អាមេរិក។

សព្វាវុធអាមេរិកដែលដឹកទៅអ៊ុយក្រែន (រូបថត៖ Reuters)

នៅក្នុងបទសម្ភាសន៍មួយកាលពីថ្ងៃចន្ទទី១០កុម្ភៈ២០២៥ជាមួយរ៉យទ័រ លោក Kellogg បានបដិសេធមិនបញ្ជាក់ពីផែនការនេះទេ ប៉ុន្តែបាននិយាយថា៖ «សហរដ្ឋអាមេរិកតែងតែពេញចិត្តលក់អាវុធដែលផលិតនៅអាមេរិក ព្រោះវាពង្រឹងសេដ្ឋកិច្ចរបស់យើង។ មានជម្រើសជាច្រើននៅទីនោះ។ អ្វីគ្រប់យ៉ាងកំពុងដំណើរការនៅពេលនេះ» ដោយបន្ថែមថា ការដឹកជញ្ជូនដែលបានអនុម័តពីមុនដោយអតីតប្រធានាធិបតី បៃដិន នៅតែកំពុងនាំចេញទៅអ៊ុយក្រែនដដែល។

វាមិនច្បាស់ទេថា តើសហរដ្ឋអាមេរិកមានគម្រោងស្នើសុំឲ្យបណ្តាប្រទេសនៅអឺរ៉ុបទិញអាវុធអាមេរិកតាមរយៈកិច្ចសន្យាពាណិជ្ជកម្ម ឬដោយផ្ទាល់ពីឃ្លាំងស្តុករបស់អាមេរិក។ កិច្ចសន្យាពាណិជ្ជកម្មខ្លះអាចចំណាយពេលរាប់ឆ្នាំឯណោះដើម្បីបញ្ចប់។

កន្លងមក លោក ត្រាំ បានប្តេជ្ញាក្នុងអំឡុងពេលយុទ្ធនាការឃោសនាបោះឆ្នោតប្រធានាធិបតីរបស់លោកថានឹងកាត់ផ្តាច់ជំនួយទាំងអស់ដល់អ៊ុយក្រែន។ ប៉ុន្តែក្រុមទីប្រឹក្សារបស់លោកមួយចំនួន បានប្រកែកថា ក្រុងវ៉ាស៊ីនតោនគួរតែបន្តគាំទ្រដល់ទីក្រុងកៀវខាងផ្នែកយោធា ជាពិសេសបើការចរចាសន្តិភាពត្រូវបានពន្យារពេលរហូតដល់ចុងឆ្នាំ២០២៥។

សូមបញ្ជាក់ថា លោក បៃដិន បានអនុម័តជំនួយសន្តិសុខជាង ៦៥ពាន់លានដុល្លារដល់អ៊ុយក្រែន ក្នុងអំឡុងពេលកាន់តំណែង។ យ៉ាងណាមិញ មន្ត្រីនៅក្នុងទីក្រុងកៀវ រួមទាំងប្រធានាធិបតី លោក វ៉ា្លឌីមៀ ហ្សេលេនស្គី បាននិយាយថា អ៊ុយក្រែនត្រូវការការធានាសន្តិសុខបន្ថែមទៀត មុនពេលចូលទៅក្នុងកិច្ចចរចាជាមួយទីក្រុងមូស្គូ៕

ដោយ៖ ឈាង