ព័ត៌មានអន្ដរជាតិ

ត្រាំ ប្រាប់ថា កិច្ចចរចាហ្គាហ្សាកំពុងដំណើរការយ៉ាងរលូន

បានផុស

១ year មុន

នៅ

ថ្ងៃសុក្រ ២៨ កុម្ភៈ ២០២៥

ដោយ

Chheang

ប្រធានាធិបតីអាមេរិកលោក ដូណាល់ ត្រាំ បានសម្តែងសុទិដ្ឋិនិយម ហើយនិយាយថា ការពិភាក្សាពាក់ព័ន្ធនឹងបទឈប់បាញ់នៅតំបន់ហ្គាហ្សាកំពុងដំណើរការយ៉ាងរលូន។

លោក Keir Starmer និងលោក ដូណាល់ ត្រាំ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសន្និសីទសារព័ត៌មានមួយជាមួយនាយករដ្ឋមន្ត្រីអង់គ្លេស លោក Keir Starmer កាលពីថ្ងៃព្រហស្បតិ៍ទី២៧ខែកុម្ភៈ លោក ត្រាំ បានប្រាប់ថា ការបន្តកិច្ចព្រមព្រៀងបទឈប់បាញ់រវាងអ៊ីស្រាអែល និងក្រុមហាម៉ាសកំពុងស្ថិតនៅក្នុងការចរចាដ៏ល្អដើម្បីកែលម្អស្ថានភាព ដោយបន្ថែមថា៖ «យើងកំពុងធ្វើការយ៉ាងលំបាកនៅមជ្ឈិមបូព៌ា និងតំបន់ហ្គាហ្សា។ ខ្ញុំគិតថា យើងនឹងបង្កើតដំណោះស្រាយដ៏ល្អមួយចំនួន»។

ទន្ទឹមគ្នានេះដែរ នាយករដ្ឋមន្ត្រីអង់គ្លេស បានរំលឹកឡើងវិញនូវការគាំទ្រចំពោះដំណោះស្រាយរដ្ឋពីរ ក្នុងការបង្កើតឲ្យមានរដ្ឋឯករាជ្យប៉ាឡេស្ទីន ដោយទទួលបានអធិបតេយ្យភាពពេញលេញ ផ្អែកតាមផែនទីព្រំដែនឆ្នាំ១៩៦៧ ដែលមានក្រុងយេរ៉ូសាឡឹមខាងកើតជារដ្ឋធានី។ លោក Starmer ដោយនិយាយថា៖ «ខ្ញុំជឿថា ដំណោះស្រាយរដ្ឋទាំងពីរនៅទីបំផុតគឺជាមធ្យោបាយតែមួយគត់សម្រាប់សន្តិភាពយូរអង្វែងនៅក្នុងតំបន់»។

ការអត្ថាធិប្បាយនេះ ធ្វើឡើងបន្ទាប់ពីការបញ្ចប់នាពេលថ្មីៗនេះនៃដំណាក់កាលទីមួយនៃកិច្ចព្រមព្រៀងឈប់បាញ់គ្នារវាងអ៊ីស្រាអែល និងក្រុមហាម៉ាស ដែលនាំទៅដល់ការប្រគល់ចំណាប់ខ្មាំងចំនួន ៣៣នាក់ដែលត្រូវបានឃុំខ្លួននៅហ្គាហ្សា និងអ្នកទោសប៉ាឡេស្ទីនប្រហែល ២ ០០០នាក់ដែលត្រូវបានចាប់ខ្លួនដោយអ៊ីស្រាអែល។

កាលពីដើមខែកុម្ភៈនេះ លោក ត្រាំ បានស្នើផែនការដ៏ចម្រូងចម្រាសមួយ ដែលឲ្យសហរដ្ឋអាមេរិកកាន់កាប់តំបន់ហ្គាហ្សា ក្នុងគោលបំណងផ្លាស់ប្តូរតំបន់នេះទៅជារមណីយដ្ឋានមេឌីទែរ៉ាណេ។ សំណើនេះ បានរងការរិះគន់ និងមន្ទិលពីអ្នកសង្កេតការណ៍អន្តរជាតិផ្សេងៗ៕

ដោយ៖ ឈាង