ជប៉ុនជួបគ្រោះភ្លើងឆេះព្រៃដ៏ធំបំផុតមិនធ្លាប់មានក្នុងរយៈពេលជាច្រើនទសវត្សរ៍

ប្រទេសជប៉ុនកំពុងប្រយុទ្ធនឹងភ្លើងឆេះព្រៃដ៏ធំបំផុតមិនធ្លាប់មាន​របស់ខ្លួនក្នុងរយៈពេលជាងបីទសវត្សរ៍ ដែល​បាន​បណ្តាល​ឲ្យ​មាន​អ្នកស្លាប់​និងបង្ខំឱ្យជម្លៀសមនុស្សជាងមួយពាន់នាក់។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី១ខែមីនានេះ។

ទីភ្នាក់ងារគ្រប់គ្រងអគ្គីភ័យ និងគ្រោះមហន្តរាយបានឱ្យដឹងថា អណ្តាតភ្លើងបានផ្ទុះឡើងតាំងពីថ្ងៃពុធ​ និង​រាលដាលលើផ្ទៃដីប្រហែល១២០០ហិចតានៅក្នុងព្រៃ Ofunato ក្នុងតំបន់ភាគខាងជើងនៃខេត្ត Iwate ។

ភ្លើងឆេះព្រៃនេះគឺជាភ្លើងឆេះព្រៃធំបំផុតចាប់តាំងពីភ្លើងឆេះព្រៃឆ្នាំ១៩៩២ នៅក្នុងទីក្រុង Kushiro ខេត្តHokkaido ដេលកាលនោះ​បាន​ឆាបឆេះ​ទំហំ​ផ្ទៃដី១០៣០​ហិច​តា​។

ឆ្លើយតបទៅនឹងគ្រោះមហន្តរាយនេះអ្នកពន្លត់អគ្គីភ័យប្រហែល ១៧០០ នាក់កំពុងត្រូវបានចល័តមកពីទូទាំងប្រទេស។ប៉ូលិសក្នុងតំបន់ក៏បានរកឃើញសាកសពមនុស្សម្នាក់ដែលស្លាប់ដោយសារភ្លើងឆេះកាលពីថ្ងៃព្រហស្បតិ៍។

សាលាក្រុង Ofunato បានឱ្យដឹងថា អ្នកស្រុកជិត ១០០០នាក់ត្រូវបានជម្លៀសចេញ ហើយអគារជាង៨០ត្រូវបាន​ខូច​ខាត​គិតត្រឹមថ្ងៃសុក្រ។ ភ្លើង​ពីរ​ផ្សេង​ទៀត​ក៏​កំពុង​ឆាប​ឆេះ​នៅ​ថ្ងៃ​សៅរ៍​នេះដែរ មួយ​នៅ​ក្រុង Yamanashi និង​កន្លែង​ផ្សេង​ទៀត​នៅក្នុងខេត្ត Iwate។ ទោះយ៉ាងណាមូលហេតុនៃការឆាបឆេះនៅមិនទាន់ដឹងនៅឡើយ។

គួរបញ្ជាក់កាលពីឆ្នាំប្រទេសជប៉ុនបានជួបប្រទះអាកាសធាតុក្ដៅបំផុតមិនធ្លាប់មានចាប់តាំងពីការកត់ត្រាបានចាប់ផ្តើម ដែលឆ្លុះបញ្ចាំងពីការបំភាយឧស្ម័នផ្ទះកញ្ចក់ដែលកើនឡើង ធ្វើឲ្យមានការ​ប្រែប្រួលអាកាសធាតុ៕

អត្ថបទ៖ ប៊ុន សុភាព