ព័ត៌មានអន្ដរជាតិ

លោក ត្រាំ គំរាមដាក់ទណ្ឌកម្មដ៏ធ្ងន់លើរុស្ស៊ី ដើម្បីឲ្យឈានដល់បទឈប់បាញ់ឆាប់ៗ

បានផុស

១ year មុន

នៅ

ថ្ងៃសៅរ៍ ៨ មីនា ២០២៥

ដោយ

Chheang

ប្រធានាធិបតីអាមេរិកលោក ដូណាល់ ត្រាំ កាលពីថ្ងៃសុក្រទី៧ខែមីនា បានព្រមានរុស្ស៊ីពីការដាក់ទណ្ឌកម្ម និងពន្ធគយសំខាន់ៗ ដើម្បីឈានដល់កិច្ចព្រមព្រៀងសន្តិភាពយ៉ាងឆាប់រហ័ស ក្នុងការបញ្ចប់ជម្លោះដែលកំពុងបន្តនៅអ៊ុយក្រែន។

ការវាយប្រហាររបស់រុស្ស៊ីលើតំបន់ Donetsk នៅអ៊ុយក្រែន កាលពីថ្ងៃទី៦មីនា២០២៥ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសនេះ ធ្វើឡើងនៅពេលដែលរុស្ស៊ីបង្កើនការវាយប្រហាររបស់ខ្លួនទៅលើទីក្រុងនានារបស់អ៊ុយក្រែន ដែលបណ្តាលឲ្យខូចខាតយ៉ាងខ្លាំងដល់ហេដ្ឋារចនាសម្ព័ន្ធសំខាន់ៗ រួមទាំងប្រភពថាមពល និងឧស្ម័ន។

លោក ត្រាំ បានបង្ហោះសារនៅលើបណ្ដាញសង្គម Truth Social ថា៖ «ដោយផ្អែកលើការពិតដែលថា រុស្ស៊ីកំពុងវាយលុកអ៊ុយក្រែនយ៉ាងដាច់អហង្ការនៅលើសមរភូមិនាពេលនេះ ខ្ញុំកំពុងពិចារណាយ៉ាងខ្លាំងលើការដាក់ទណ្ឌកម្មផ្នែកធនាគារ ការដាក់ទណ្ឌកម្ម និងពន្ធលើប្រទេសរុស្ស៊ី រហូតទាល់តែមានបទឈប់បាញ់ និងកិច្ចព្រមព្រៀងដំណោះស្រាយចុងក្រោយស្តីពីសន្តិភាពត្រូវបានសម្រេច»។

មេដឹកនាំអាមេរិក បានសង្កត់ធ្ងន់ទៀតថា៖ «ប្រាប់ទៅរុស្ស៊ី និងអ៊ុយក្រែន ត្រូវចូលតុ (ចរចា) ឥឡូវនេះ មុននឹងយឺតពេល។ សូមអរគុណ!!!»។

លោក ត្រាំ បានសង្កត់ធ្ងន់លើភាពបន្ទាន់នៃការចាប់ផ្តើមកិច្ចចរចាសន្តិភាព ដោយបង្ហាញសុទិដ្ឋិនិយមថា ប្រធានាធិបតីរុស្ស៊ីលោក វ៉ា្លឌីមៀរ ហ្សេលេនស្គី ប្តេជ្ញាបញ្ចប់សង្រ្គាម ហើយនឹងខិតទៅរកការចរចាដោយចិត្តត្រជាក់។ ទោះជាយ៉ាងណាក៏ដោយ វិមានក្រឹមឡាំងមិនទាន់ឆ្លើយតបទៅនឹងការគំរាមកំហែងចុងក្រោយបង្អស់ទាំងនេះនៅឡើយទេ។

ថ្មីៗនេះ រដ្ឋបាលលោក ត្រាំ ក៏បានផ្អាកការចែករំលែកព័ត៌មានចារកម្មជាមួយអ៊ុយក្រែន ដោយបង្កើនការព្រួយបារម្ភអំពីផលប៉ះពាល់ដែលអាចកើតមានលើសមត្ថភាពការពាររបស់អ៊ុយក្រែន។ ទង្វើនេះ ត្រូវបានគេរិះគន់ថាអាចធ្វើឲ្យជំហរអ៊ុយក្រែនចុះខ្សោយប្រឆាំងនឹងការឈ្លានពានរបស់រុស្ស៊ី។

ដើម្បីជំរុញកិច្ចខិតខំប្រឹងប្រែងសន្តិភាពបន្ថែមទៀត លោកប្រធានាធិបតី ត្រាំ គ្រោងនឹងទៅបំពេញទស្សនកិច្ចនៅអារ៉ាប៊ីសាអូឌីត ដើម្បីពិភាក្សាអំពីកិច្ចព្រមព្រៀងសន្តិភាពដ៏មានសក្តានុពលរវាងរុស្ស៊ី និងអ៊ុយក្រែន។ លោកបានសម្តែងថា ការចរចាជាមួយលោក ពូទីន គឺ«ងាយស្រួលជាង» បើប្រៀបធៀបទៅនឹងការដោះស្រាយជាមួយប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី ហើយជឿជាក់ថា លោក ពូទីន មានបំណងចង់បញ្ចប់ជម្លោះ។

ការវិវឌ្ឍទាំងនេះ បានធ្វើឲ្យទំនាក់ទំនងកាន់តែតានតឹងជាមួយសម្ព័ន្ធមិត្តណាតូ ខណៈដែលគោលនយោបាយរបស់លោក ត្រាំ ហាក់ដូចជាតម្រឹមឲ្យកាន់តែជិតស្និទ្ធជាមួយនឹងផលប្រយោជន៍របស់រុស្ស៊ី។ មេដឹកនាំអឺរ៉ុប បានសម្តែងការព្រួយបារម្ភអំពីការត្រូវបានដកចេញពីការចរចា និងផលប៉ះពាល់ដែលអាចកើតមានចំពោះសន្តិសុខក្នុងតំបន់៕

ដោយ៖ ឈាង

ចុចអាន៖ ហ្សេលេនស្គី៖ បទឈប់បាញ់លើអាកាស និងសមុទ្រ អាចសាកល្បងឆន្ទៈរុស្ស៊ីក្នុងការបញ្ចប់សង្គ្រាម