ព័ត៌មានអន្ដរជាតិ

ត្រាំ៖ សម្ព័ន្ធភាពរវាងអាមេរិក និងជប៉ុន មិនស្មើភាពគ្នាសោះ

បានផុស

១ year មុន

នៅ

ថ្ងៃសៅរ៍ ៨ មីនា ២០២៥

ដោយ

Chheang

ប្រធានាធិបតីអាមេរិក លោក ដូណាល់ ត្រាំ បានសម្តែងការមិនពេញចិត្តចំពោះស្ថានភាពបច្ចុប្បន្ននៃសម្ព័ន្ធភាពអាមេរិក-ជប៉ុន ដោយលើកឡើងថា វាមានអត្ថប្រយោជន៍មិនសមាមាត្រ ពោលគឺប្រទេសជប៉ុនទទួលបានផលច្រើនជាងអាមេរិក។

នាយករដ្ឋមន្ត្រីជប៉ុនលោក Shigeru Ishiba និងលោក ដូណាល់ ត្រាំ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយរបស់ទីភ្នាក់ងារព័ត៌មាន AFP កាលពីថ្ងៃទី៧ខែមីនា លោក ត្រាំ បាននិយាយថា៖ «យើងមានទំនាក់ទំនងដ៏អស្ចារ្យជាមួយជប៉ុន។ ប៉ុន្តែយើងមានកិច្ចព្រមព្រៀងគួរឲ្យចាប់អារម្មណ៍ជាមួយជប៉ុន ដែលយើងត្រូវការពារពួកគេ ប៉ុន្តែពួកគេមិនចាំបាច់ការពារពួកយើង»។

លោកបានបន្តថា៖ «មួយវិញទៀត ពួកគេរកលុយបានច្រើនជាមួយយើងខាងសេដ្ឋកិច្ច។ ខ្ញុំសួរតាមត្រង់ តើអ្នកណាជាអ្នកបង្កើតកិច្ចព្រមព្រៀងទាំងនេះ?»។

ការលើកឡើងនេះ ធ្វើឡើងខណៈដែលរដ្ឋមន្ត្រីក្រសួងពាណិជ្ជកម្មជប៉ុន កំពុងរៀបចំដំណើរទេស្សនកិច្ចទៅកាន់ទីក្រុងវ៉ាស៊ីនតោន ដោយតាមសេចក្ដីរាយការណ៍មានគោលបំណងស្នើសុំការលើកលែងពន្ធពីអាមេរិកលើអាលុយមីញ៉ូម និងដែក។

លោក ត្រាំ បានប្រកាសថា ពន្ធគយ ២៥% លើអាលុយមីញ៉ូម និងដែក ដែលនាំចូលទឹកដីអាមេរិក នឹងត្រូវអនុវត្តចាប់ពីថ្ងៃពុធសប្ដាហ៍ក្រោយ ដោយគ្មានករណីលើកលែងជាដាច់ខាត។

អ្នកនាំពាក្យរដ្ឋាភិបាលជប៉ុន លោក Yoshimasa Hayashi បាននិយាយកាលពីថ្ងៃសុក្រថា ជប៉ុនជឿជាក់លើទីក្រុងវ៉ាស៊ីនតោនក្នុងការរក្សាកាតព្វកិច្ចរបស់ខ្លួនចំពោះសន្ធិសញ្ញាសន្តិសុខរវាងប្រទេសទាំងពីរ។

ចំណែកឯរដ្ឋមន្ត្រីសេដ្ឋកិច្ច ពាណិជ្ជកម្ម និងឧស្សាហកម្មរបស់ទីក្រុងតូក្យូ លោក Yoji Muto បានប្រាប់អ្នកសារព័ត៌មានថា លោកសង្ឃឹមថា ដំណើរទស្សនកិច្ចនៅសហរដ្ឋអាមេរិករបស់លោកនឹងទទួលបានលទ្ធផល «ឈ្នះ-ឈ្នះ សម្រាប់ផលប្រយោជន៍ជាតិរបស់ជប៉ុន និងសហរដ្ឋអាមេរិក»។

សូមបញ្ជាក់ថា សព្វថ្ងៃ បុគ្គលិកយោធាអាមេរិកប្រមាណ ៥៤ ០០០នាក់កំពុងឈរជើងនៅជប៉ុន ដែលភាគច្រើនក្នុងតំបន់អូគីណាវ៉ា ភាគខាងកើតកោះតៃវ៉ាន់។ ក្នុងឆ្នាំ២០១៩ លោក ត្រាំ ធ្លាប់បាននិយាយថា បើអាមេរិកត្រូវបានវាយប្រហារ នោះប្រទេសជប៉ុនអាច«មើលតាមទូរទស្សន៍ Sony» ដោយបញ្ជាក់ពីជំនឿរបស់គាត់ថា ប្រទេសជប៉ុនមិនបានរួមចំណែកគ្រប់គ្រាន់ក្នុងកាតព្វកិច្ចការពារគ្នាទៅវិញទៅមកនោះទេ៕

ដោយ៖ ឈាង