ពូទីន៖ បទឈប់បាញ់បុណ្យ Easter ស្តែងឲ្យឃើញច្បាស់ថា អ៊ុយក្រែន មិនចង់បានសន្តិភាព

ប្រធានាធិបតីរុស្ស៊ី វ្ល៉ាឌីមៀរ ពូទីន បានប្រកាសបញ្ចប់បទឈប់បាញ់ពិធីបុណ្យ Easter ហើយអះអាងថា បទឈប់បាញ់នេះ សបញ្ជាក់យ៉ាងច្បាស់ថា អ៊ុយក្រែន មិនចង់បានសន្តិភាពនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃសៅរ៍ទី១៩ខែមេសាឆ្នាំ២០២៥ មេដឹកនាំវិមានក្រឹមឡាំងរូបនេះ បានប្រកាសបទឈប់បាញ់មនុស្សធម៌រយៈពេល៣០ម៉ោងដោយឯកតោភាគី ដើម្បីឲ្យប្រជាជនទាំងពីរប្រទេស ប្រារព្ធពិធីបុណ្យនិងប្រតិបត្តិសាសនា ដោយសុខសន្តិភាព។

យ៉ាងណា មិនដូចអ្វីគិតឡើយ ក្នុងអំឡុងពេលនោះ ភាគីទាំងសងខាងបានចោទដាក់គ្នាអំពីការរំលោភបទឈប់បាញ់នេះ ដោយរុស្ស៊ីចោទអ៊ុយក្រែនថារំលោភជាង ១ ៣០០ដង ចំណែកអ៊ុយក្រែន ចោទរុស្ស៊ីរំលោភជិត ៣ ០០០ដង ហើយក្រោយចប់បទឈប់បាញ់ភ្លាមៗ ទីក្រុងមូស្គូក៏បើកការវាយប្រហារចាស់ដៃលើអ៊ុយក្រែន តែម្តង។

ថ្លែងកាលពីថ្ងៃចន្ទទី២១ខែមេសាឆ្នាំ២០២៥ លោកពូទីនអះអាងថា «ច្បាស់ណាស់ បទឈប់បាញ់នេះស្តែងឲ្យឃើញថា ទីក្រុងកៀវមិនចង់ស្វែងរកដំណោះស្រាយសន្តិភាពទេ ខុសពីទីក្រុងមូស្គូ។ យើងតែងគោរពបទឈប់បាញ់ជានិច្ច ហើយនោះជាហេតុផលដែលយើងតែងលើកសំណើនេះឡើង ជាពិសេសអំឡុងពេលថ្ងៃបុណ្យ Easter ដ៏ពិសិដ្ឋ ហើយយើងក៏បានឃើញពីប្រតិកម្មរបស់ទីក្រុងកៀវដែរ»។

យ៉ាងណា មុននេះប្រធានាធិបតីរុស្ស៊ីក៏ប្រកាសរួចហើយដែរថា លោកបើកចិត្តជានិច្ចចំពោះការចរចាសន្តិភាពដោយផ្ទាល់ជាមួយអ៊ុយក្រែន ប៉ុន្តែលោកព្រមានថា ទីក្រុងមូស្គូ នឹងនៅតែកំណត់គោលដៅលើហេដ្ឋារចនាសម្ព័ន្ធស៊ីវិល ព្រោះកងទ័ពអ៊ុយក្រែននិងបរទេស បានប្រើទីតាំងទាំងនេះជាកន្លែងលាក់ខ្លួន និងធ្វើជាខែល ហើយយកទីតាំងទាំងនោះដើម្បីប្រព្រឹត្តអំពើឧក្រិដ្ឋកម្ម។

រឿងនេះទៀតសោត កើតឡើងស្របពេលប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី ប្រកាសថា អ៊ុយក្រែននឹងចូលរួមក្នុងកិច្ចចរចាសន្តិភាពជាមួយ​ចក្រភពអង់គ្លេស បារាំង និងសហរដ្ឋអាមេរិកនៅទីក្រុងឡុងដ៍នៅថ្ងៃពុធ​ទី​២៣​ខែ​មេសា​ឆ្នាំ​២០២៥។

លោក ហ្សេលេនស្គី បាន​ឲ្យ​ដឹង​កាល​ពីថ្ងៃ​ចន្ទ​ថា កិច្ចពិភាក្សា​នេះ​មានគោលបំណងសម្រេចបានបទឈប់បាញ់ដោយគ្មានលក្ខខណ្ឌ និងបង្កើតសន្តិភាពយូរអង្វែងចំពេលមានជម្លោះកំពុងបន្តជាមួយរុស្ស៊ី៕

អត្ថបទ៖ សុខ សុវណ្ណ

ចុចអាន៖ ពូទីន ប្រកាសបើកចិត្ត ចរចាដោយផ្ទាល់ជាមួយអ៊ុយក្រែន ដើម្បីបញ្ចប់សង្គ្រាម