ព័ត៌មានអន្ដរជាតិ

AP៖ ថ្ងៃខួបកំណើតលោក ត្រាំ នឹងមានការហែក្បួនព្យុហយាត្រាទាហាន ៦ ៦០០នាក់

បានផុស

១ year មុន

នៅ

ថ្ងៃសុក្រ ២ ឧសភា ២០២៥

ដោយ

Chheang

កងទ័ពអាមេរិក កំពុងពិចារណាលើក្បួនព្យុហយាត្រាយោធាទ្រង់ទ្រាយធំនៅរដ្ឋធានីវ៉ាស៊ីនតោនឌីស៊ី នាថ្ងៃទី១៤ខែមិថុនាឆ្នាំ២០២៥ ដើម្បីរំលឹកខួបលើកទី២៥០របស់ខ្លួន ហើយក៏ត្រូវជាថ្ងៃខួបកំណើតគម្រប់ ៧៩ឆ្នាំរបស់លោកប្រធានាធិបតី ដូណាល់ ត្រាំ ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមឯកសារដែលទទួលបានដោយទីភ្នាក់ងារព័ត៌មាន AP ព្រឹត្តិការណ៍ដែលបានស្នើឡើងនឹងមានទាហានជាង ៦ ៦០០នាក់ រថយន្តយោធា ១៥០គ្រឿង ឧទ្ធម្ភាគចក្រចំនួន ៥០គ្រឿង ក្រុមតន្រ្តីកងទ័ពចំនួន ៧វង់ និងអាចមានអ្នកចូលរួមជាជនស៊ីវិលរាប់ម៉ឺននាក់ រួមទាំងក្រុមអតីតយុទ្ធជនផងដែរ។

ក្បួនដង្ហែនៅតែស្ថិតក្នុងដំណាក់កាលរៀបចំផែនការ និងរង់ចាំការអនុម័តជាផ្លូវការនៅឡើយ។ បញ្ហាប្រឈមផ្នែកភស្តុភារ ដូចជា លំនៅដ្ឋានរបស់កងទ័ព និងបញ្ហាសន្តិសុខ កំពុងត្រូវបានវាយតម្លៃ។ អភិបាលក្រុង D.C លោកស្រី Muriel Bowser បានសម្តែងការព្រួយបារម្ភអំពីការខូចខាតហេដ្ឋារចនាសម្ព័ន្ធដែលអាចកើតមានពីឧបករណ៍យោធាធុនធ្ងន់ ហើយលោកស្រីបានលើកឡើងពីសំណើក្បួនដង្ហែស្រដៀងគ្នានេះកាលពីឆ្នាំ២០១៨ ដែលត្រូវបានលុបចោលដោយសារតែការចំណាយប៉ាន់ស្មានរហូតដល់ ៩២លានដុល្លារឯណោះ។

បើត្រូវបានអនុម័ត ក្បួនដង្ហែនឹងលាតសន្ធឹងជាង ៦គីឡូម៉ែត្រពីមន្ទីរបញ្ចកោណ ក្នុងទីក្រុង Arlington រដ្ឋ Virginia ទៅកាន់សេតវិមាន។ ការប្រារព្ធពិធីនេះ អាចនឹងត្រូវបញ្ចប់ដោយការប្រគុំតន្ត្រីពេលល្ងាច និងការបាញ់កាំជ្រួច។

អ្នករិះគន់បានលើកឡើងពីការព្រួយបារម្ភអំពីការចំណាយរបស់ក្បួនដង្ហែ និងផលប៉ះពាល់ដែលអាចកើតមានលើហេដ្ឋារចនាសម្ព័ន្ធក្នុងស្រុក ខណៈដែលអ្នកគាំទ្រចាត់ទុកវាជាឱកាសមួយ ដើម្បីគោរពដល់ការចូលរួមបម្រើយោធា និងប្រទេសជាតិ។ យ៉ាងណាមិញ ការសម្រេចចិត្តចុងក្រោយទាក់ទងនឹងក្បួនដង្ហែរ មិនទាន់ត្រូវបានប្រកាសដោយកងទ័ព ឬសេតវិមានជាផ្លូវការនៅឡើយ៕

ដោយ៖ ឈាង