មេ​ដឹក​នាំពិភពលោក នាំ​គ្នា​បញ្ចេញ​ប្រតិកម្ម​ជុំវិញ​សង្គ្រាម​ឥណ្ឌា-ប៉ាគីស្ថាន

នៅថ្ងៃទី​៧​ខែឧសភា​ឆ្នាំ​២០៥ ឥណ្ឌាបានធ្វើការវាយប្រហារតាមអាកាស និង​បាញ់​មីស៊ីល​ ដែលត្រូវបានគេដាក់ឈ្មោះថា​ប្រតិបត្តិការ «Sindoor» សំដៅទៅលើទីតាំងសកម្មប្រយុទ្ធចំនួន​៩​កន្លែង​នៅក្នុងប្រទេសប៉ាគីស្ថាន និងតំបន់កាស្មៀរដែលគ្រប់គ្រងដោយប៉ាគីស្ថាន។ ទាំងប្រធានាធិបតីអាមេរិក លោក ដូណាល់ ត្រាំ និងអគ្គលេខាធិការអង្គការសហប្រជាជាតិ លោក Antonio Guterres សុទ្ធ​តែ​បានអំពាវនាវជាសាធារណៈ​ឲ្យ​មានការបន្ធូរបន្ថយ​ភាព​តាន​តឹង​ជាបន្ទាន់។

លោក ដូណាល់ ត្រាំ បាន​ថ្លែងទៅកាន់ប្រព័ន្ធផ្សព្វផ្សាយនៅសេតវិមាន ដោយ​បានហៅជម្លោះដែលកំពុងកើនឡើងរវាងប្រទេស​ប្រដាប់អាវុធនុយក្លេអ៊ែរទាំងពីរថា «ជាការអាម៉ាស់» ហើយបានសង្កត់ធ្ងន់លើតម្រូវការសំខាន់សម្រាប់ភាព​អត់ធ្មត់​នា​ពេល​នេះ។

លោក ត្រាំ បាននិយាយថា៖ «អ្វីដែលកំពុងកើតឡើងរវាងឥណ្ឌា និងប៉ាគីស្ថានគឺជាការអាម៉ាស់មួយ។ យើងទើបតែបានឮអំពីវា។ ពួកគេបានប្រយុទ្ធគ្នាជាយូរណាស់មកហើយ។ ខ្ញុំគ្រាន់តែសង្ឃឹមថាវានឹងបញ្ចប់យ៉ាងឆាប់រហ័ស»។

ចំណែក​ឯ​រដ្ឋមន្ត្រីការបរទេសអាមេរិក លោក Marco Rubio ក៏​បាន​​ឲ្យ​ដឹង​​នៅ​លើ​បណ្ដាញ​សង្គម​ X ផង​ដែរ​ថា លោកកំពុង«តាមដានស្ថានការណ៍រវាងឥណ្ឌា និងប៉ាគីស្ថានយ៉ាងដិតដល់» ខណៈពេលដែលបន្ថែមថា ទីក្រុងវ៉ាស៊ីនតោន នឹងបន្តចូលរួមជាមួយភាគី​ជម្លោះ​ទាំង​ពីរ​ ដើម្បី​ឆ្ពោះទៅរក «ដំណោះស្រាយសន្តិភាព»។

ដោយឡែក អគ្គលេខាធិការអង្គការសហប្រជាជាតិ លោក Antonio Guterres បានចេញសេចក្តីអំពាវនាវជាបន្ទាន់មួយ​​ឲ្យ​រក្សា​ភាពស្ងប់ស្ងាត់ ដោយសម្តែងការព្រួយបារម្ភយ៉ាងខ្លាំងចំពោះការវាយប្រហារតាមអាកាស និងសកម្មភាពសងសឹក។

លោក Stéphane Dujarric អ្នកនាំពាក្យរបស់ប្រធានអង្គការសហប្រជាជាតិ បាននិយាយថា៖ «លោក​អគ្គលេខាធិការមានការភ័យព្រួយយ៉ាងខ្លាំងចំពោះការកើនឡើងផ្នែកយោធារវាងឥណ្ឌា និងប៉ាគីស្ថាន។ គាត់ជំរុញ​ឲ្យ​ភាគីទាំងពីរធ្វើសកម្មភាពដោយអត់ធ្មត់បំផុត និងជៀសវាងការបង្កហេតុបន្ថែមទៀត»។

លោក Guterres បានអំពាវនាវ​ឲ្យ​បញ្ឈប់ជាបន្ទាន់នូវអរិភាព និងបានលើកទឹកចិត្តប្រទេសទាំងពីរ​ឲ្យ​ដោះស្រាយការខ្វែងគំនិតគ្នាតាមរយៈការទូត និងការគោរពច្បាប់អន្តរជាតិ។ លោក​ក៏​បាន​ផ្តល់​ការ​គាំទ្រ​ពី​អង្គការ​សហ​ប្រជាជាតិ ​ក្នុង​ការ​សម្របសម្រួល​កិច្ច​សន្ទនា​ប្រសិន​បើ​មាន​ការ​ស្នើ​សុំ។

ប្រតិកម្ម​ពី​មេ​ដឹក​នាំ​ពិភព​លោក​ផ្សេងៗ​ទៀត៖

• ចិន៖ រដ្ឋមន្ត្រីការបរទេសចិន លោក Wang Yi បានជំរុញ​ឲ្យ​ភាគីទាំងពីរ កាត់បន្ថយភាពតានតឹង។
• រុស្ស៊ី និងចក្រភពអង់គ្លេស៖ ប្រទេសទាំងពីរបានចេញសេចក្តីណែនាំអំពីការធ្វើដំណើរ ដោយព្រមានពលរដ្ឋរបស់ពួកគេប្រឆាំងនឹងការធ្វើដំណើរទៅកាន់ប្រទេសប៉ាគីស្ថាន បន្ទាប់ពីការវាយប្រហារ​នៅ​ក្រុង​ Pahalgam ​តំបន់ Jammu និង​តំបន់​កាស្មៀរ។
• អ៊ីរ៉ង់៖ ទីក្រុង​តេហេរ៉ង់​បានផ្តល់​ដំណោះស្រាយ​សម្រុះសម្រួល សំដៅកាត់បន្ថយភាពតានតឹងរវាងប៉ាគីស្ថាន និងឥណ្ឌា។
• បង់ក្លាដែស និងអេមីរ៉ាត់អារ៉ាប់រួម៖ ប្រទេស​ទាំង​ពីរ​បានបង្ហាញការគាំទ្រចំពោះការចរចាសន្តិភាព៕

ដោយ៖ ឈាង

ចុចអាន៖ សង្គ្រាម ឥណ្ឌា-ប៉ាគីស្ថាន ផ្ទុះឡើងហើយ!