សង្គ្រាម ឥណ្ឌា-ប៉ាគីស្ថាន ផ្ទុះឡើងហើយ!

ទីបំផុត សង្គ្រាមឥណ្ឌា-ប៉ាគីស្ថាន បានផ្ទុះឡើងហើយ ដោយឥណ្ឌាបើកការវាយប្រហារលើទីតាំង៩កន្លែងក្នុងតំបន់កាស្មៀរខាងប្រទេសប៉ាគីស្ថាន ខណៈទីក្រុងអ៊ីស្លាម៉ាបាដ ប្រកាសសងសឹកវិញដោយមិនប្រណីដៃឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC ដោយដកស្រង់ប្រភពយោធាប៉ាគីស្ថាននៅថ្ងៃពុធទី៧ខែឧសភាឆ្នាំ២០២៥, មីស៊ីលឥណ្ឌា បានសម្លាប់មនុស្ស៧នាក់ ក្នុងនោះរួមមានទាំងកុមារ២នាក់ផងដែរ ចំណែកមនុស្ស១២នាក់រងរបួស ខណៈការផ្ទុះដ៏ធំបានអង្រួនតំបន់ Muzaffarabad។

ដ្បិតតែភាគីឥណ្ឌាអះអាងថា ពួកគេវាយប្រហារនេះដើម្បីកម្ទេចជំរំក្រុមភេរវករក៏ដោយ ប៉ុន្តែរដ្ឋមន្ត្រីការពារជាតិប៉ាគីស្ថាន Khawaja Asif ប្រាប់ទូរទស្សន៍រដ្ឋថា ឥណ្ឌាបាញ់មីស៊ីលចេញពីដែនអាកាសរបស់ខ្លួន ធ្លាក់ចំតំបន់ស៊ីវិល ហើយការអះអាងពីការកំណត់គោលដៅភេរវករនោះ គឺមិនពិតទេ។

ក្នុងការវាយប្រហារនោះដែរ ភាគីប៉ាគីស្ថានបានបាញ់ទម្លាក់យន្តហោះចម្បាំងឥណ្ឌា៣គ្រឿងនិងដ្រូនមួយគ្រឿង ប៉ុន្តែមិនបញ្ជាក់ទីតាំងនៃការធ្លាក់ឡើយ។

ក្រោយឥណ្ឌាបើកប្រតិបត្តិការយោធា នាយករដ្ឋមន្ត្រីប៉ាគីស្ថាន បានកោះប្រជុំជាបន្ទាន់ជាមួយគណៈកម្មការសន្តិសុខជាតិ ហើយហៅការវាយប្រហារនេះថាជា «ទង្វើនៃសង្គ្រាម» និងប្រកាសពីសិទ្ធការពារខ្លួននិងប្តេជ្ញាសងសឹកទៅវិញ តាមពេលវេលានិងទីកន្លែងដែលខ្លួនជ្រើសរើស។

ដោយសារតែស្ថានការណ៍ធ្ងន់ធ្ងរ ប៉ាគីស្ថាន បានសម្រេចបិទដែនអាកាសនៅជុំវិញទីក្រុង Lahore នាភាគខាងជើងប្រទេស និងទីក្រុង Karachi ខណៈយន្តហោះមួយចំនួនត្រូវប្តូរផ្លូវហោះហើរ។

សូមជម្រាបថា ការវាយប្រហារថ្ងៃពុធនេះ គឺជាលើកទីមួយហើយចាប់តាំងពីឆ្នាំ២០១៩ ដែលឥណ្ឌាបាញ់ចូលដីប៉ាគីស្ថាន បន្ទាប់ពីខ្លួនបានស្តីបន្ទោសទីក្រុងអ៊ីស្លាម៉ាបាដ សម្រាប់ការវាយប្រហារដោយគ្រាប់បែកអត្តឃាតដែលបានសម្លាប់យោធាឥណ្ឌាយ៉ាងតិច៤០នាក់៕

អត្ថបទ៖ សុខ សុវណ្ណ

ចុចអាន៖ ឥណ្ឌា-ប៉ាគីស្ថាន ប្រើធម៌ក្តៅសងសឹកដាក់គ្នា ធ្វើឲ្យពិភពលោក ភ័យផ្ទុះសង្គ្រាមធំ