កូរ៉េខាងជើង បាញ់សាកល្បង​មីស៊ីលបាលិស្ទិក​លើក​ទី​៦​ក្នុង​ឆ្នាំ​២០២៥​នេះ

បើ​យោង​តាម​អគ្គសេនាធិការ​ចម្រុះ​របស់​កូរ៉េខាងត្បូង ទីក្រុង​ព្យុងយ៉ាង​បាន​បាញ់​មី​ស៊ី​ល​បាលិស្ទិក​​រយៈ​ចម្ងាយ​ខ្លី​ជាច្រើន​គ្រាប់​ចូលទៅក្នុង​ដែនទឹក​ភាគ​ខាងកើត​របស់ខ្លួន​​​នៅ​ព្រឹក​ថ្ងៃ​ព្រហស្បតិ៍​ទី​៨​ឧសភា​នេះ​​។

មីស៊ីល​ត្រូវបានបាញ់ចេញពីតំបន់ជុំវិញទីក្រុង Wonsan នៅម៉ោងប្រហែល ៨​និង​១០​នាទីព្រឹកម៉ោងក្នុងស្រុក ដែល​នេះ​​គឺ​ជា​ការបាញ់មីស៊ីលលើកទី​៦​ របស់​កូរ៉េ​ខាង​ជើង​ក្នុងឆ្នាំ​២០២៥ និងជាលើកដំបូង​គិត​ចាប់តាំងពីថ្ងៃទី​១០​ខែមីនា។

មន្ត្រីយោធាកូរ៉េខាងត្បូង កំពុងតាមដានស្ថានការណ៍យ៉ាងដិតដល់ និងបានបង្កើនសកម្មភាពឃ្លាំមើលដោយមានការសម្របសម្រួលជាមួយសហរដ្ឋអាមេរិក និងជប៉ុន។ ការបាញ់មីស៊ីល​នេះ ត្រូវបានគេមើលឃើញថា​ជាការបំពានដោយផ្ទាល់លើសេចក្ដី​សម្រេច​របស់ក្រុមប្រឹក្សាសន្តិសុខអង្គការសហប្រជាជាតិ ដែលហាមឃាត់ប្រទេសកូរ៉េខាងជើង ពីការបាញ់សាកល្បងមីស៊ីល​បាលិស្ទិក។

ការបង្កហេតុចុងក្រោយនេះ កើតឡើងចំពេលដែលភាពតានតឹងក្នុងតំបន់កាន់តែកើនឡើង ខណៈដែលមេដឹកនាំកូរ៉េខាងជើងលោក គីម ជុងអ៊ុន បន្តជំរុញកម្មវិធីនុយក្លេអ៊ែរ និងមីស៊ីលរបស់ខ្លួន។ មួយថ្ងៃមុនការបាញ់មីស៊ីល លោក គីម បានជំរុញ​ឲ្យ​រោងចក្រផលិតគ្រាប់រំសេវ បង្កើនការផលិតគ្រាប់កាំភ្លើងធំ ដែលជាសញ្ញាបង្ហាញពីការពង្រឹងផ្នែកយោធាជាមួយរុស្ស៊ី។

នាពេលថ្មីៗនេះ កូរ៉េខាងជើងបានបញ្ជាក់ពីការដាក់ពង្រា​យ​ទ័ព​ ដើម្បីជួយដល់កងកម្លាំងរុស្ស៊ីនៅក្នុងតំបន់ Kursk នៃប្រទេសអ៊ុយក្រែន។ ការប៉ាន់ប្រមាណរបស់ចារកម្មកូរ៉េខាងត្បូង បានបង្ហាញថា ទាហានកូរ៉េខាងជើងប្រហែល ១៥ ០០០​នាក់ត្រូវបានបញ្ជូនទៅកាន់​រុស្ស៊ី ដោយមានប្រហែល ៥ ០០០​នាក់បានស្លាប់ ឬរងរបួសនៅក្នុងការប្រយុទ្ធ។ បន្ថែមពីលើនេះ អាមេរិក និងកូរ៉េខាងត្បូង បានចោទប្រកាន់កូរ៉េខាងជើងថាបានផ្គត់ផ្គង់សម្ភារៈយោធាដល់រុស្ស៊ី រួមទាំងប្រព័ន្ធកាំភ្លើងធំ និងមីស៊ីលបាលិស្ទិក។

សហគមន៍អន្តរជាតិ បានថ្កោលទោសទង្វើរបស់កូរ៉េខាងជើង ដោយ​អគ្គលេខាធិការអង្គការសហប្រជាជាតិ លោក Antonio Guterres បានជំរុញ​ឲ្យ​ទីក្រុងព្យុងយ៉ាងវិលត្រឡប់ទៅរកកិច្ចសន្ទនាវិញ ដោយសង្កត់ធ្ងន់លើតម្រូវការសម្រាប់ដំណោះស្រាយការទូតចំពោះភាពតានតឹងដែលកំពុងបន្ត។ ទន្ទឹមនឹងនោះ នាយករដ្ឋមន្ត្រីជប៉ុន លោក Fumio Kishida បានបញ្ជាក់ថា ទីក្រុងតូក្យូបានដាក់ការតវ៉ាប្រឆាំងនឹងការបាញ់មីស៊ីលនេះ ដោយបញ្ជាក់ជាថ្មីពីការប្តេជ្ញាចិត្តរបស់ជប៉ុនចំពោះសន្តិសុខក្នុងតំបន់៕

ដោយ៖ ឈាង