ព័ត៌មានអន្ដរជាតិ

តៃវ៉ាន់ បារម្ភថា ចិនអាចធ្វើសមយុទ្ធអុកឡុក មុនខួបមួយឆ្នាំក្រោយការកាន់តំណែងរបស់លោក Lai

បានផុស

១ year មុន

នៅ

ថ្ងៃសុក្រ ១៦ ឧសភា ២០២៥

ដោយ

Chheang

រដ្ឋាភិបាលតៃវ៉ាន់ បានព្រមានថា ចិនអាចនឹងធ្វើសមយុទ្ធយោធាថ្មីនៅក្បែរដែនកោះរបស់ខ្លួននាសប្ដាហ៍ក្រោយ ដើម្បី«បង្កបញ្ហា» មុនការអបអរខួបមួយឆ្នាំថ្ងៃ២០ឧសភាសម្រាប់ការឡើងកាន់តំណែងជាប្រធានាធិបតីរបស់លោក Lai Ching-te។

អ្នកនាំពាក្យរដ្ឋាភិបាលតៃវ៉ាន់ បាននិយាយថា នេះគឺជាយុទ្ធសាស្ត្រដែលធ្លាប់ប្រើកន្លងមកដោយទីក្រុងប៉េកាំង ដើម្បីអះអាងពីជំហររបស់ខ្លួនលើអធិបតេយ្យភាពរបស់តៃវ៉ាន់។

ទន្ទឹមការបារម្ភនេះ លោក Lai Ching-te បានចុះទៅសួរសុខទុក្ខបុគ្គលិកយោធាដោយផ្ទាល់ក្នុងទីក្រុង Kaohsiung នៅថ្ងៃសុក្រទី១៦ឧសភានេះ ដោយផ្តល់ការគាំទ្រ និងលើកទឹកចិត្ត មុនពេលសមយុទ្ធយោធារបស់ចិនដែលអាចកើតមាននៅជិតកោះតៃវ៉ាន់។ ក្នុងដំណើរទស្សនកិច្ច លោក Lai បានជួបជាមួយវិស្វករកងទ័ព និងក្រុមនាវិកឧទ្ធម្ភាគចក្រប្រឆាំងនាវាមុជទឹក ដោយសង្កត់ធ្ងន់លើតួនាទីសំខាន់របស់ពួកគេក្នុងវិស័យការពារជាតិ។ លោកបានកោតសរសើរចំពោះការលះបង់របស់ពួកគាត់ ដោយបញ្ជាក់ថា ការខិតខំប្រឹងប្រែងរបស់ពួកគេជួយឲ្យប្រជាពលរដ្ឋរស់នៅ និងប្រកបការងារដោយសន្តិភាព និងសុភមង្គល។ លោក Lai ត្រូវបានអមដំណើរដោយរដ្ឋមន្ត្រីការពារជាតិ លោក Wellington Koo និងអគ្គលេខាធិការក្រុមប្រឹក្សាសន្តិសុខជាតិ លោក Joseph Wu។

កន្លងមក ចិនបានហៅលោក Lai ថាជា«ជនផ្ដាច់ខ្លួន» ហើយបានបដិសេធសំណើជាច្រើនរបស់មេដឹកនាំតៃវ៉ាន់សម្រាប់ការចរចា។ លោក Lai ច្រានចោលការទាមទារអធិបតេយ្យភាពរបស់ចិនជុំវិញដែនកោះរបស់ខ្លួន ដោយនិយាយថា មានតែប្រជាជនតៃវ៉ាន់ប៉ុណ្ណោះដែលអាចសម្រេចអនាគតរបស់ពួកគេបាន។

ក្រសួងការពារជាតិចិន និងការិយាល័យកិច្ចការតៃវ៉ាន់របស់ចិន បាននិយាយនៅសប្តាហ៍នេះថា លោក Lai គឺជា«អ្នកបង្កើតវិបត្តិច្រកសមុទ្រតៃវ៉ាន់» ដែលបានបង្កើនការប្រឆាំង និងការប្រឈមមុខដាក់គ្នា និងធ្វើឲ្យខូចសន្តិភាព និងស្ថិរភាព។

ក្នុងប៉ុន្មានឆ្នាំថ្មីៗនេះ ទីក្រុងប៉េកាំងបានធ្វើសមយុទ្ធយោធាជាច្រើនលើកច្រើនសានៅជុំវិញតៃវ៉ាន់ តួយ៉ាងដូចជា សមយុទ្ធ«Strait Thunder» នៅក្នុងខែមេសាឆ្នាំ២០២៥ និងសមយុទ្ធ«Joint Sword» ចំនួនពីរលើកក្នុងឆ្នាំ២០២៤ ដែលលើកទីមួយធ្វើឡើងភ្លាមៗក្រោយលោក Lai ឡើងកាន់តំណែងជាប្រធានាធិបតី និងមួយលើកទៀតនៅក្នុងខែតុលា៕

ដោយ៖ ឈាង