មិនត្រឹមតែបាញ់សម្លាប់ទេ កងទ័ពមីយ៉ាន់ម៉ា ថែមទាំងដុតបាតុករទាំងរស់ទៀតផង

កងទ័ពមីយ៉ាន់ម៉ា បានសម្លាប់មនុស្សយ៉ាងតិច១១៤នាក់កាលពីថ្ងៃសៅរ៍ ដោយរួមទាំងកុមារផងដែរ។

BBC បានឲ្យដឹងថា កងទ័ពបានបាញ់សម្លាប់អ្នកណាក៏ដោយ ដែលពួកគេបានឃើញនៅតាមដងផ្លូវ។ កងកម្លាំងសន្តិសុខបានបាញ់ចូលអគារលំនៅដ្ឋាន ហើយបើកការវាយឆ្មក់ពេលយប់និងចាប់ខ្លួន។

យោងតាមតួលេខចុងក្រោយបំផុតបានបង្ហាញថា ចំនួនអ្នកស្លាប់ក្នុងភាពចលាចលនៅប្រទេសប្រទេសមីយ៉ាន់ម៉ា បានកើនលើស៥០០នាក់ហើយ គិតត្រឹមថ្ងៃអង្គារនេះ។

ក្នុងចំណោមជនរងគ្រោះកាលពីថ្ងៃសៅរ៍ គឺមានអ្នកក្រុង Mandalay អាយុ៤០ឆ្នាំម្នាក់ ដែលត្រូវកងទ័ពបាញ់និងដុតទាំងរស់។

ការបាញ់សម្លាប់បានបន្តចូលដល់ថ្ងៃអាទិត្យ រួមទាំងរបាយការណ៍ដែលថា កងកម្លាំងសន្តិសុខបានបើកការបាញ់ប្រហារក្នុងពិធីបុណ្យសពរបស់សិស្សអាយុ២០ឆ្នាំម្នាក់នៅទីក្រុង Bago ផងដែរ។

​សមាគម​ជំនួយ​សម្រាប់​អ្នក​ទោសនយោបាយ (AAPP) បាន​និយាយថា ជន​ស៊ីវិល​១៤​នាក់​ត្រូវ​បាន​សម្លាប់​កាល​ពី​ថ្ងៃ​ចន្ទ ម្សិល​មិញហើយ​ ​៨​នាក់​ត្រូវ​បាន​សម្លាប់​នៅ​ខណ្ឌ South Dagon ក្នុង​ទី​ក្រុង​យ៉ាំងហ្គោន។

ការបង្ហូរឈាមកាលពីថ្ងៃសៅរ៍ បានជំរុញឲ្យមានសេចក្តីថ្លែងការណ៍រួមដ៏កម្រមួយពីរដ្ឋមន្រ្តីការពារជាតិនៃប្រទេសចំនួន១២រួមមានសហរដ្ឋអាមេរិក អង់គ្លេស ជប៉ុន អូស្ត្រាលី កាណាដា ដាណឺម៉ាក អាល្លឺម៉ង់ ក្រិក អ៊ីតាលី ណូវែលសែឡង់ និងកូរ៉េខាងត្បូង។

សេចក្តីថ្លែងការណ៍នោះបាននិយាយថា “យោធាអាជីពត្រូវធ្វើតាមស្តង់ដារអន្តរជាតិសម្រាប់ការប្រព្រឹត្តិនិងទំនួលខុសត្រូវក្នុងការការពារ មិនបង្កអន្តរាយដល់ប្រជាជនដែលខ្លួនបម្រើ”។

ទោះបីជាយ៉ាងណាក៏ដោយ ប្រទេសចិននិងរុស្ស៊ី មិនបានចូលរួមក្នុងការរិះគន់ជាអន្តរជាតិជុំវិញការធ្វើរដ្ឋប្រហារនោះទេ ដែលនេះមានន័យថា សកម្មភាពណាមួយតាមរយៈក្រុមប្រឹក្សាសន្តិសុខអង្គការសហប្រជាជាតិគឺមិនអាចទៅរួចនោះទេ៕

ប្រែសម្រួលដោយ៖ Vann Vann

ប្រភព៖ Business Insider

ចុចអាន៖ មេទ័ពមីយ៉ាន់ម៉ា ជប់លៀងផឹកស៊ីហ៊ឹកហ៊ាក់ នៅថ្ងៃមនុស្សជាង១០០នាក់ត្រូវបានសម្លាប់