កងកម្លាំង​អ៊ីស្រាអែល​រឹបអូស​ទូកដឹក​​ជំនួយ​នៅព្រំដែនហ្គាហ្សាឃាត់ខ្លួនបានសកម្មជនល្បីៗ

កងកម្លាំងអ៊ីស្រាអែលបានស្ទាក់ចាប់ទូកដឹកជំនួយនៅជាប់ព្រំដែនហ្គាហ្សា ដែលជារបស់ Madleen ជាផ្នែកមួយនៃអង្គការ Freedom Flotilla Coalition ដែលធ្វើយុទ្ធនាការប្រឆាំងនឹងការ​ឡោមព័ទ្ធតំបន់​ហ្គាហ្សារបស់អ៊ីស្រាអែល។ នេះបើយោងតាមការចេញផ្សាយរបស់ទីភ្នាក់ងារព័ត៌មាន ​Reuters នៅថ្ងៃទី០៩ខែមិថុនានេះ។

ក្នុងពេលស្ទាក់ចាប់់នោះ អ៊ីស្រាអែល បានឃាត់ខ្លួនសកម្មជន Greta Thunberg ដែលជាមេដឹកនាំពិភពលោកឱ្យចាត់វិធានការជាបន្ទាន់ដើម្បីកាត់បន្ថយផលប៉ះពាល់នៃការប្រែប្រួលអាកាសធាតុ និងមនុស្ស្១១នាក់ផ្សេងទៀតដែលប៉ុនប៉ងបំបែកការបិទផ្លូវនៅលើទឹកដីប៉ាឡេស្ទីនដែលហែកហួរដោយសង្រ្គាម។

ក្រុមដែលរៀបចំដោយអង្គការ Freedom Flotilla Coalition នេះមានគោលបំណងផ្តល់ការផ្គត់ផ្គង់សំខាន់ៗ និងប្រឆាំងយុទ្ធនាការយោធារបស់អ៊ីស្រាអែលនៅហ្គាហ្សា។ ក្រុមនេះបានចាប់ផ្តើមដំណើររបស់ពួកគេមួយសប្តាហ៍មុនពីទីក្រុងSicily ប្រទេសអ៊ីតាលីហើយក៏បានជួយសង្គ្រោះជនចំណាកស្រុកមួយចំនួននៅជិតប្រទេសលីប៊ីក្នុងអំឡុងពេលធ្វើដំណើរផងដែរ។

ទូកនេះត្រូវបានរឹបអូសក្នុងដែនទឹកអន្តរជាតិ ដែលក្រុមអ្នករិះគន់ហៅប្រតិបត្តិការនេះថាជា «ការចាប់ជំរិត» និងអះអាងថា សកម្មជនដែលគ្មានអាវុធត្រូវបានឃុំខ្លួនដោយខុសច្បាប់ ខណៈពេលដែលកំពុងដឹកទឹកដោះគោ អាហារ និងជំនួយផ្នែកវេជ្ជសាស្រ្ត។ ប៉ុន្តែក្រសួង​ការ​បរទេស​អ៊ីស្រាអែល​បាន​និយាយ​ថាទូកនឹងត្រូវយកទៅកាន់កំពង់ផែ Ashdod របស់អ៊ីស្រាអែល ហើយជំនួយនៅលើទូកនឹងត្រូវបញ្ជូនទៅ ហ្គាហ្សា តាមរយៈបណ្តាញដែលអនុញ្ញាត។

ទោះយ៉ាងណា Greta Thunberg រួមជាមួយនឹងអ្នកផ្សេងទៀតរួមទាំងអ្នកនយោបាយបារាំងលោកស្រី Rima Hassan ត្រូវបានឃុំខ្លួន។ នាងបានស្នើឱ្យមនុស្សជុំវិញពិភពលោកដាក់សម្ពាធលើរដ្ឋាភិបាលរបស់ពួកគេឱ្យជួយដោះលែងពួកគេ។

គួរបញ្ជាក់ថាឧបទ្ទវហេតុនេះបង្ហាញពីភាពតានតឹងកាន់តែខ្លាំងឡើងលើការឡោមព័ទ្ធតំបន់ហ្គាហ្សា ដែលបានដាក់ចាប់តាំងពីក្រុមហាម៉ាស់បានកាន់កាប់ក្នុងឆ្នាំ ២០០៧។ ចំពេលមានជម្លោះដ៏សាហាវដែលបានឆក់យកជីវិតជនជាតិប៉ាឡេស្ទីនជាង ៥៤,០០០ នាក់ និងបានជម្លៀសប្រជាជន ៩០% នៃតំបន់ហ្គាហ្សា ខណៈជំនួយអន្តរជាតិនៅតែមានការរារាំងទោះបីជាមានការព្រមានអំពីទុរ្ភិក្សក៏ដោយ៕

អត្ថបទ៖ ប៊ុន សុភាព