ព័ត៌មានអន្ដរជាតិ

តើនាយករដ្ឋមន្ត្រីថ្មីរបស់អង់គ្លេស កំពុងនាំប្រទេសជាតិឲ្យធ្លាក់ចូលទៅក្នុងជម្លោះផ្ទាល់ជាមួយ អ៊ីរ៉ង់ ដែរទេ?

បានផុស

២ នាទី មុន

នៅ

ថ្ងៃព្រហស្បតិ៍ ២៣ កក្កដា ២០២៦

ដោយ

ការសម្រេចចិត្តដ៏គួរឲ្យភ្ញាក់ផ្អើលរបស់នាយករដ្ឋមន្ត្រីថ្មីរបស់អង់គ្លេស លោក Andy Burnham ក្នុងការបើកភ្លើងខៀវអនុញ្ញាតឲ្យសហរដ្ឋអាមេរិកប្រើប្រាស់មូលដ្ឋានទ័ពអាកាសរបស់អង់គ្លេស ដើម្បីប្រតិបត្តិការវាយប្រហារលើអ៊ីរ៉ង់ កំពុងតែរុញច្រានទីក្រុងឡុងដ៍ឲ្យខិតជិតទៅរកហានិភ័យនៃការធ្លាក់ចូលក្នុងជម្លោះយោធាដោយផ្ទាល់នៅតំបន់មជ្ឈិមបូព៌ា។

**នាយករដ្ឋមន្ត្រីអង់គ្លេស លោក Andy Burnham (រូបភាព៖Reuters)**

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិធានការនេះបានបង្កើតឲ្យមានការជជែកដេញដោល និងការព្រួយបារម្ភយ៉ាងខ្លាំងអំពីសន្តិសុខជាតិ ស្របពេលដែលស្ថានភាពរវាងទីក្រុងវ៉ាស៊ីនតោន និងទីក្រុងតេហេរ៉ង់ កំពុងតែឡើងកម្តៅយ៉ាងខ្លាំង ក្រោយពេលកិច្ចព្រមព្រៀងបទឈប់បាញ់បណ្តោះអាសន្នបានដួលរលំ។ នេះបើយោងតាមសារព័ត៌មាន Bloomberg។

នៅក្នុងសេចក្តីរាយការណ៍លម្អិត រដ្ឋាភិបាលអង់គ្លេសបានយល់ព្រមឲ្យកងទ័ពអាកាសអាមេរិកប្រើប្រាស់មូលដ្ឋានទ័ពអាកាសសំខាន់ៗ រួមមានមូលដ្ឋានទ័ព RAF Fairford នៅក្នុងប្រទេសអង់គ្លេសផ្ទាល់ និងមូលដ្ឋានទ័ព Diego Garcia ស្ថិតនៅឯនាយសមុទ្រ ដើម្បីគាំទ្រដល់ប្រតិបត្តិការវាយប្រហារផ្លូវអាកាសទៅលើគោលដៅយោធារបស់អ៊ីរ៉ង់។

ទោះបីជា ភាគីអង់គ្លេស និងរដ្ឋបាលរបស់ប្រធានាធិបតីដូណាល់ ត្រាំ ព្យាយាមពន្យល់ថា សកម្មភាពយោធានេះធ្វើឡើងក្នុងគោលបំណង «ការពារខ្លួន» និងកាត់បន្ថយការគំរាមកំហែងក៏ដោយ ប៉ុន្តែការសម្រេចចិត្តនេះបានរងការរិះគន់យ៉ាងចាស់ដៃពីសំណាក់គណបក្សប្រឆាំងនៅក្នុងសភាអង់គ្លេស ដែលមើលឃើញថា នេះជាការលះបង់អធិបតេយ្យភាពជាតិ និងការទាញអង់គ្លេសឲ្យទៅធ្វើជាខែលការពារឲ្យអាមេរិកនៅក្នុងសង្គ្រាមដែលមិនមែនជារបស់ខ្លួន។

ដើមចម និងផ្ទៃរឿងនៅពីក្រោយភាពតានតឹងនេះ គឺកើតឡើងបន្ទាប់ពីអាមេរិក និងអ៊ីរ៉ង់ បានបើកការវាយប្រហារសងសឹកដាក់គ្នាទៅវិញទៅមកយ៉ាងខ្លាំងក្លា បន្ទាប់ពីការដួលរលំនៃបទឈប់បាញ់កាលពីមួយខែមុន។

ស្របពេលជាមួយគ្នានេះ ភាគីអ៊ីរ៉ង់តាមរយៈអ្នកនាំពាក្យក្រសួងការបរទេស ក៏បានចេញមុខព្រមានចំៗរួចជាស្រេច ទៅកាន់បណ្តាប្រទេសសម្ព័ន្ធមិត្តរបស់អាមេរិកទាំងអស់ថា រាល់ការអនុញ្ញាតឲ្យអាមេរិកប្រើប្រាស់ទឹកដី ឬមូលដ្ឋានយោធាដើម្បីវាយប្រហារលើអ៊ីរ៉ង់ នឹងត្រូវចាត់ទុកថាជា «អ្នកសមគំនិតក្នុងសង្គ្រាម និងឧក្រិដ្ឋកម្មឈ្លានពាន» ដែលការណ៍នេះ ធ្វើឲ្យអង់គ្លេសប្រឈមមុខខ្ពស់នឹងការក្លាយជាគោលដៅសងសឹកពីសំណាក់ទីក្រុងតេអេរ៉ង់ ទាំងផ្នែកយោធា និងការវាយប្រហារតាមប្រព័ន្ធអ៊ីនធឺណិត ៕

អត្ថបទ ៖ សាង ស្រីល័ក្ខ