មីស៊ីលទំនើបទាំង៥ប្រភេទរបស់អ៊ីរ៉ង់ ដែលគេល្បីថា ខ្លាំង

តាមការបញ្ជាក់ពីការិយាល័យនាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ, គិតត្រឹមថ្ងៃពុធទី១៨ខែមិថុនាឆ្នាំ២០២៥ អ៊ីរ៉ង់ បានបាញ់មីស៊ីលជាង៤០០គ្រាប់ និងបញ្ជូនដ្រូនរាប់រយគ្រឿងទៀត មកវាយប្រហារខ្លួនលើ៤០ទីតាំងទូទាំងប្រទេស សម្លាប់មនុស្ស២៤នាក់ និងជាង៨០០នាក់ រងរបួស។

ដ្បិតជាប្រទេសល្បីថាមានខែលការពារដែនអាកាសរឹងមាំបំផុតក៏ដោយ ប៉ុន្តែអ៊ីរ៉ង់នៅតែមានវិធីសាស្រ្តបាញ់ទម្លុះបាន ជាពិសេសអ៊ីរ៉ង់មានមីស៊ីលខ្លាំងមួយប្រភេទគឺ Khaibar ដែលពោរពេញដោយអនុភាព។

ក្រៅពី Khaibar អ៊ីរ៉ង់ក៏នៅមានមីស៊ីលខ្លាំងៗច្រើនប្រភេទទៀតដែរ ហើយថ្ងៃនេះ កម្ពុជាថ្មី សូមបង្ហាញជូននូវមីស៊ីលសាហាវនិងទំនើបបំផុតទាំង៥របស់អ៊ីរ៉ង់៖

1. Kheibar (Khorramshahr-4)

• ប្រភេទ: មីស៊ីលបាលិស្ទិករយៈចម្ងាយមធ្យម (MRBM)
• រយៈចម្ងាយ: ប្រមាណ ២ ០០០ គីឡូម៉ែត្រ
• ក្បាលគ្រាប់: ១ ៥០០ គីឡូក្រាម (អាចបំពាក់ក្បាលគ្រាប់បានច្រើន)
• លក្ខណៈពិសេស: ប្រើប្រាស់ឥន្ធនៈរាវ ជាមួយនឹងសមត្ថភាពបត់បែនខ្ពស់, រចនាឡើងដើម្បីគេចចេញពីប្រព័ន្ធការពារមីស៊ីល និងអាចផ្ទុកក្បាលគ្រាប់ធម្មតា (conventional) ឬមិនធម្មតា (unconventional)

2. Sejjil-2

• ប្រភេទ: មីស៊ីលបាលិស្ទិករយៈចម្ងាយមធ្យមដើរដោយឥន្ធនៈរឹង (Solid-Fueled MRBM)
• រយៈចម្ងាយ: ចន្លោះពី ២ ០០០–២ ៥០០ គីឡូម៉ែត្រ
• ក្បាលគ្រាប់: ប្រមាណ ៧៥០ គីឡូក្រាម
• លក្ខណៈពិសេស: ជាមីស៊ីលឥន្ធនៈរឹងពីរដំណាក់អាចបាញ់បានលឿន និងមានសមត្ថភាពវាយប្រហារចំគោលដៅបានយ៉ាងជាក់លាក់ក្នុងរយៈចម្ងាយឆ្ងាយ។

3. Fattah-2 

• ប្រភេទ: មីស៊ីលល្បឿនលឿនជាងសំឡេង
• ល្បឿនលឿនជាងសំឡេង ៥ដង (អាចឈានដល់ ១៣ដង)
• រយៈចម្ងាយ: ចន្លោះពី ១ ៤០០–១ ៥០០ គីឡូម៉ែត្រ
• លក្ខណៈពិសេស: ល្បឿនលឿននិងភាពរហ័សរហួន ពិបាកស្ទាក់ចាប់ និងអាច​ជ្រាប​ចូល​ប្រព័ន្ធ​ការពារ​មីស៊ីល​គ្រប់ប្រភេទ

4. Dezful

• ប្រភេទ: មីស៊ីលផ្លោងកូនកាត់រយៈចម្ងាយជិត
• រយៈចម្ងាយ: ចន្លោះពី ១ ០០០–១ ៣០០ គីឡូម៉ែត្រ
• ក្បាលគ្រាប់: ចន្លោះពី ៤៥០ទៅ៦០០ គីឡូក្រាម
• លក្ខណៈពិសេស: ប្រើប្រាស់ឥន្ធនៈរឹងនិងអាចចល័តតាមផ្លូវបាន, មានសមត្ថភាពកំណត់គោលដៅកាន់តែច្បាស់ជាមួយនឹងប្រព័ន្ធនាំផ្លូវប្រសើរជាងមុន និងមានសមត្ថភាពបាញ់បង្ហោះលឿនជាងមីស៊ីល Shahab ជំនាន់មុនៗ។

5. Raad-500

• ប្រភេទ: មីស៊ីលផ្លោងរយៈចម្ងាយជិត
• រយៈចម្ងាយ: ប្រមាណ ៥០០ គីឡូម៉ែត្រ
• ក្បាលគ្រាប់: ចន្លោះពី ២០០ទៅ២៥០ គីឡូក្រាម
• លក្ខណៈពិសេស: ប្រើប្រាស់សមាសធាតុផ្សំដែលមានទម្ងន់ស្រាល (មានទម្ងន់ត្រឹមពាក់កណ្តាលនៃ Fateh-110 ប៉ុណ្ណោះ), ប្រព័ន្ធបញ្ជាទំនើបសម្រាប់វាយប្រហារចំគោលដៅជាក់លាក់ និងអាចដាក់ពង្រាយបានលឿន៕

អត្ថបទ៖ សុខ សុវណ្ណ

ចុចអាន៖ ឆ្ងល់​អត់ ហេតុអ្វី​​មីស៊ីលភាគច្រើនត្រូវ​បាន​បាញ់នៅពេលយប់ជាជាងពេល​ថ្ងៃ ក្នុងអំឡុងពេលសង្គ្រាម?