តើអ៊ីរ៉ង់អាចបិទច្រកសមុទ្រនាំប្រេង Hormuz ចំពេលមានភាពតានតឹងកើនឡើងដែរឬទេ?

បន្ទាប់ពីការទម្លាក់គ្រាប់បែករបស់សហរដ្ឋអាមេរិកទៅលើទីតាំងនុយក្លេអ៊ែរសំខាន់ៗរបស់អ៊ីរ៉ង់ ការភ័យខ្លាចបានកើតឡើងថា អ៊ីរ៉ង់អាចនឹងសងសឹកដោយការព្យាយាមបិទច្រកសមុទ្រ Hormuz ដែលជាផ្លូវទឹកដ៏តូចចង្អៀត ប៉ុន្តែមានសារៈសំខាន់ខ្លាំងចំពោះរំ​ហូរប្រេង​ទៅ​កាន់​ពិភពលោក។ នេះបើយោងតាមការចេញផ្សាយរបស់សារព័ត៌មាន ​CNA នៅថ្ងៃទី២៣ខែមិថុនានេះ។

ច្រកសមុទ្រ Hormuz គឺជាផ្លូវទឹកតូចចង្អៀតដែលតភ្ជាប់ឈូងសមុទ្រពែរ្សទៅកាន់មហាសមុទ្រឥណ្ឌា ដែលមានព្រំប្រទល់ជាប់នឹងប្រទេសអ៊ីរ៉ង់ អារ៉ាប់រួម និងអូម៉ង់។ វាជាផ្លូវប្រេងដ៏សំខាន់របស់ពិភពលោក ដែលមានប្រេងប្រហែល ១៦.៥ លានបារ៉ែល និងជាង ២០% នៃឧស្ម័នធម្មជាតិរាវរបស់ពិភពលោក (ភាគច្រើនមកពីប្រទេសកាតា) ឆ្លងកាត់ជារៀងរាល់ថ្ងៃ។ ទទឹងតូចចង្អៀត និងជម្រៅរាក់របស់ច្រកនេះ ធ្វើឱ្យវាងាយរងការវាយប្រហារ និងការរំខាន។

អ៊ីរ៉ង់តែងតែគំរាមបិទច្រកសមុទ្រ Hormuz ហើយបានវាយប្រហារ ឬរឹបអូសនាវាពីមុនមក ប៉ុន្តែវាមិនដែលរារាំងទាំងស្រុងនោះទេ។ ប្រសិនបើអ៊ីរ៉ង់ព្យាយាមបិទច្រកសមុទ្រដោយកម្លាំង សហរដ្ឋអាមេរិក និងសម្ព័ន្ធមិត្តទំនងជានឹងឆ្លើយតបយ៉ាងខ្លាំង។ ផ្ទុយទៅវិញ អ៊ីរ៉ង់អាចបង្កបញ្ហាដោយប្រើយន្តហោះគ្មានមនុស្សបើក មីស៊ីល ឬទូកល្បឿនលឿន ដើម្បីបន្លាចកប៉ាល់ពាណិជ្ជកម្ម។

ការ​បិទច្រក​សមុទ្រ​នេះ​ក៏​នឹង​ប៉ះពាល់​ដល់​អ៊ីរ៉ង់​ដែរ ព្រោះ​អ៊ីរ៉ង់ក៏​អាស្រ័យ​លើ​ការ​នាំ​ចេញ​ប្រេង​របស់​ខ្លួនតាមច្រកនេះដែរ។ លើសពីនេះប្រសិនបើបិទវា​ក៏​អាច​ធ្វើឱ្យ​ចិន​ខកចិត្ត​ផងដែរ ដែលចិនជា​អ្នកទិញ​ប្រេង​សំខាន់​មួយ​របស់​អ៊ីរ៉ង់​។

កាលពីមុន សហរដ្ឋអាមេរិក និងប្រទេសផ្សេងទៀតតែងតែការពារនាវានៅក្នុងតំបន់នេះ ជាមួយនឹងការល្បាត និងឆ្មាំជើងទឹក។ ទោះបីជាការយកចិត្តទុកដាក់ជាសកលបានផ្លាស់ប្តូរនាពេលថ្មីៗនេះចំពោះការវាយប្រហារនៅសមុទ្រក្រហមក៏ដោយ ច្រកសមុទ្រ Hormuz នៅតែជាផ្លូវដ៏សំខាន់សម្រាប់ការនាំចេញប្រេងពីប្រទេសអ៊ីរ៉ាក់ គុយវ៉ែត កាតា និងប្រទេស បារ៉ែន។ សុវត្ថិភាពរបស់ច្រកនេះមានសារៈសំខាន់ខ្លាំងណាស់សម្រាប់សេដ្ឋកិច្ចពិភពលោក៕

អត្ថបទ៖ ប៊ុន សុភាព