មេទ័ពជើងទឹកអាមេរិក បារម្ភខ្លាំង ក្រោយបាញ់មីស៊ីលតម្លៃ៣៦លានដុល្លារ អស់ច្រើនគ្រាប់ពេក ដើម្បីការពារអ៊ីស្រាអែល

អំឡុងសវនាការនៅគណៈកម្មាធិការហិរញ្ញវត្ថុព្រឹទ្ធសភាកាលពីថ្ងៃអង្គារទី២៤ខែមិថុនាឆ្នាំ២០២៥ ឧត្តមនាវីឯក James Kilby ប្រធានស្តីទីនៃប្រតិបត្តិការកងទ័ពជើងទឹកអាមេរិក បានបង្ហាញក្តីបារម្ភយ៉ាងខ្លាំងចំពោះការដែលនាវាចម្បាំងអាមេរិក បាញ់មីស៊ីល SM-3 ច្រើនហួសដើម្បីការពារអ៊ីស្រាអែល ក្នុងសង្គ្រាមរយៈពេល១២ថ្ងៃជាមួយអ៊ីរ៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្លើយតបសំណួរព្រឹទ្ធសមាជិក Brian Schatz ដែលសួរថា «ក្នុងជម្លោះថ្មីៗនៅមជ្ឈិមបូព៌ា អាមេរិកប្រើគ្រាប់អស់ច្រើនពេកហើយ ដើម្បីការពារអ៊ីស្រាអែល។ អ៊ីចឹង តើឥឡូវ កងទ័ពជើងទឹកអាមេរិក មានសល់មីស៊ីលមីស៊ីល SM-3 គ្រប់គ្រាន់ ទុកសម្រាប់បំពេញតម្រូវការខ្លួនឯងដើម្បីទប់ទល់នឹងការគំរាមកំហែងជាសកលដែរឬទេ?»។

លោក Kilby ឆ្លើយថា «ជាការពិត យើងបានប្រើមីស៊ីលទាំងនេះក្នុងកម្រិតគួរឲ្យព្រួយបារម្ភមែន ប៉ុន្តែយើងបានប្រើប្រាស់វាយ៉ាងមានប្រសិទ្ធភាព ដើម្បីការពារប្រទេសអ៊ីស្រាអែល ហើយយើងក៏នៅមាន SM-3 គ្រប់គ្រាន់ដែរសម្រាប់កងទ័ពជើងទឹក»។

ទោះបីជាយ៉ាងណាក៏ដោយ មេទ័ពជើងទឹករូបនេះមិនបញ្ជាក់ឡើយថាតើ អាមេរិកបានបាញ់មីស៊ីល SM-3 ប៉ុន្មានគ្រាប់ដើម្បីការពារអ៊ីស្រាអែល ក្នុងសង្គ្រាមជាមួយអ៊ីរ៉ង់។

សូមជម្រាបថា មីស៊ីលដែលមួយគ្រាប់មានតម្លៃ៣៦លានដុល្លារប្រភេទនេះ គឺជាផ្នែកនៃប្រព័ន្ធការពារ Aegis បំពាក់លើនាវាពិឃាតអាមេរិក។ វាគឺជាមីស៊ីលស្ទាក់ចាប់នៅបរិយាកាសខាងក្រៅ ដែលត្រូវបានរចនាឡើងដើម្បីកម្ទេចមីស៊ីលផ្លោងរបស់សត្រូវនៅពាក់កណ្តាលផ្លូវ ពេលគោលដៅកំពុងធ្វើដំណើរឆ្លងកាត់លំហ។ នៅពេលឡើងដល់កម្ពស់សមរម្យ SM-3 នឹងបញ្ចេញ «យានសម្លាប់» ដែលប្រើកម្លាំងបាញ់ទម្លាក់គោលដៅ ។

Version ចុងក្រោយបំផុតនៃ SM-3 Block IIA គឺត្រូវបានរចនាឡើងដើម្បីទប់ទល់នឹងមីស៊ីលផ្លោងរយៈចម្ងាយមធ្យម ដោយបំពេញចន្លោះរវាងប្រព័ន្ធការពារមីស៊ីលនានាដូចជា Patriot និង THAAD ជាដើម។ SM-3 អាច​បាញ់​ដល់​គោលដៅ​នៅ​ចម្ងាយ​អតិបរមា ១ ២០០ គីឡូម៉ែត្រ និង​រយៈ​កម្ពស់ ១០០ គីឡូម៉ែត្រ៕

អត្ថបទ៖ សុខ សុវណ្ណ

ចុចអាន៖ មន្ទីរបញ្ចកោណ៖ ការវាយប្រហាររបស់អាមេរិក មិនបានបំផ្លាញកម្មវិធីនុយក្លេអ៊ែរអ៊ីរ៉ង់ទេ