ព័ត៌មានអន្ដរជាតិ

ច្បាប់អ៊ីស្លាមថ្មី៖ ត្រូវសម្លាប់ ត្រាំ បើគាត់គំរាមកំហែង Ayatollah Khamenei

បានផុស

២ សប្តាហ៍ មុន

នៅ

ថ្ងៃអង្គារ ១ កក្កដា ២០២៥

ដោយ

Chheang

មេដឹកនាំសាសនា Naser Makarem Shirazi ដែលជាបព្វជិត Shia ដ៏មានឥទ្ធិពលបំផុតមួយរូបរបស់អ៊ីរ៉ង់ បានចេញក្រឹត្យសាសនា (ច្បាប់អ៊ីស្លាម fatwa) ដែលចែងថា បុគ្គលឬរបបណាមួយ មិនថាជាប្រធានាធិបតីអាមេរិក ដូណាល់ ត្រាំ ដែលគំរាមកំហែងដល់មេដឹកនាំកំពូលរបស់អ៊ីរ៉ង់ Ayatollah Ali Khamenei ត្រូវតែទទួលទោសប្រហារជីវិត។ នេះបើយោងតាមការចុះផ្សាយរបស់សារព័ត៌មាន Telegraph កាលពីថ្ងៃទី៣០ខែមិថុនា។

រូបថតលោក Ayatollah Ali Khamenei (រូបថត៖ Shutterstock)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Makarem Shirazi បានប្រកាសថា ជនណាម្នាក់ ឬរបបណាដែលគំរាមកំហែងដល់ការដឹកនាំ និងសិទ្ធិអំណាចសាសនា ត្រូវបានចាត់ទុកថាជា «mohareb» ដែលជាអ្នកធ្វើសង្គ្រាមប្រឆាំងនឹងព្រះក្រោមច្បាប់អ៊ីស្លាម។ នៅក្នុងប្រព័ន្ធលទ្ធិប្រជាធិបតេយ្យនិងសាសានារបស់អ៊ីរ៉ង់ ការដែលត្រូវចាត់ទុកជា «mohareb» គឺជាបទចោទប្រកាន់ដ៏ធ្ងន់ធ្ងរមួយ ដែលជារឿយៗនាំទៅដល់ការកាត់ទោសប្រហារជីវិត។

ច្បាប់អ៊ីស្លាមថ្មីនេះ មិនបានដៅឈ្មោះចំលោក ត្រាំ ដោយផ្ទាល់ទេ ប៉ុន្តែបញ្ជាក់ថាត្រូវអនុវត្តយ៉ាងទូលំទូលាយចំពោះ«រដ្ឋាភិបាល ឬបុគ្គល»ទាំងឡាយ ដែលចេញសារគំរាមកំហែងប្រឆាំងនឹងលោក Khamenei។ ទាំងលោក ត្រាំ និងមេដឹកនាំអ៊ីស្រាអែល កាលពីពេលថ្មិៗនេះសុទ្ធតែធ្លាប់បានគំរាមកំហែងដល់អាយុជីវិតរបស់មេដឹកនាំកំពូលអ៊ីរ៉ង់។

Telegraph បានដកស្រង់សម្ដីក្រុមអ្នកកាន់សាសនាអ៊ីស្លាមជាន់ខ្ពស់នៅអ៊ីរ៉ង់ ដែលបាននិយាយថា «ក្នុងរយៈពេលប៉ុន្មានថ្ងៃថ្មីៗនេះ យើងមើលឃើញជាក់ស្ដែងថា ប្រធានាធិបតីសហរដ្ឋអាមេរិក និងមេដឹកនាំនៃរបប Zionist (អ៊ីស្រាអែល) បានគំរាមកំហែងម្តងហើយម្តងទៀត ក្នុងការធ្វើឃាតមេដឹកនាំកំពូលនៃបដិវត្តអ៊ីស្លាម និងអ្នកប្រាជ្ញ និងអាជ្ញាធរសាសនាមួយចំនួន» ដោយអំពាវនាវដល់អ្នកកាន់សាសនាអ៊ីស្លាមរាប់លាននាក់នៅទូទាំងពិភពលោកត្រូវ«ធ្វើឲ្យខ្មាំងសត្រូវទាំងនេះសោកស្ដាយចំពោះពាក្យសម្ដី និងកំហុសរបស់ពួកគេ»។

ក្រុមអ្នកវិភាគជឿថា ច្បាប់អ៊ីស្លាមថ្មីទំនងជាមានបំណងជាការព្រមានដល់មេដឹកនាំបរទេស និងជាឧបករណ៍ដើម្បីពង្រឹងភាពស្មោះត្រង់ផ្ទៃក្នុង ចំពេលមានការកើនឡើងទាំងសម្ពាធក្នុងស្រុក និងអន្តរជាតិនៅប្រទេសអ៊ីរ៉ង់៕

ដោយ៖ ឈាង