រញ្ជួយដី កម្រិត៦.១រ៉ិចទ័រវាយប្រហារភាគពាយ័ព្យប្រទេសតួកគីស្លាប់និងរបួសមនុស្សជាច្រើននាក់

យោងតាមការចេញផ្សាយរបស់ទីភ្នាក់ងារព័ត៌មាន AP ​គ្រោះរញ្ជួយដីកម្រិត ៦.១រ៉ិចទ័រ បានវាយប្រហារខេត្ត Balikesir ភាគពាយ័ព្យនៃប្រទេសតួកគី កាលពីថ្ងៃអាទិត្យ ដោយបានសម្លាប់មនុស្សយ៉ាងហោចណាស់ម្នាក់ និងរបួស ២៩នាក់ផ្សេងទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណុចកណ្តាលនៃការរញ្ជួយដីគឺនៅក្នុងទីក្រុង Sindirgi ប៉ុន្តែការរញ្ជួយមានឥទ្ធិពលរញ្ជួយរហូតដល់ទីក្រុងអ៊ីស្តង់ប៊ុលដែលមានចម្ងាយជិត ២០០ គីឡូម៉ែត្រឯណោះ។

ក្នុងអំឡុងពេលរញ្ជួយដីស្ត្រីចំណាស់ម្នាក់ត្រូវបានជួយសង្គ្រោះទាន់ពេលចេញពីអគារបាក់រលំ ប៉ុន្តែក្រោយមកបានស្លាប់ដោយសាររបួសធ្ងន់។ សរុបមានអគារចាស់ៗចំនួន ១៦ ដែលមិនប្រើប្រាស់បាន និងប៉មវិហារអ៊ីស្លាមចំនួនពីរបានដួលរលំក្នុង។

មកដល់ពេលនេះក្រុមជួយសង្គ្រោះបានកំពុងស្វែងរកអ្នកនៅរស់រានមានជីវិត នៅក្រោមគំនរបាក់បែក ខណៈក្រុមមន្ត្រីបានព្រមានថាប្រជាជនឱ្យនៅឆ្ងាយពីអគារដែលរងការខូចខាតដោយសារការរញ្ជួយដីដោយនឹងមានរញ្ជួយដីមកម្រិត ៤.៦ រ៉ិចទ័រម្ដងទៀតអាចវាយប្រហារ។

គួរបញ្ជាក់ថាប្រទេសតួកគី ដែលស្ថិតនៅលើខ្សែបន្ទាត់កំហុសធំៗ ងាយនឹងកើតមានការរញ្ជួយដីជាញឹកញាប់ និងជួនកាលមានការបំផ្លិចបំផ្លាញធ្ងន់ធ្ងរ។ នៅឆ្នាំ ២០២៣ ការរញ្ជួយដីកម្រិត ៧.៨ រ៉ិចទ័របានឆក់យកជីវិតមនុស្សជាង ៥៣.០០០នាក់នៅក្នុងប្រទេសតួកគី និង ៦.០០០ នាក់ទៀតនៅក្នុងប្រទេសស៊ីរី បណ្តាលឱ្យមានការបំផ្លិចបំផ្លាញយ៉ាងទូលំទូលាយ៕

អត្ថបទ៖ ប៊ុន សុភាព