ហ្សេលេនស្គី ដឹកដៃ​សម្ព័ន្ធមិត្ត​ ធ្វើ​ដំណើរទៅ​សេតវិមាន និយាយ​ពី​បញ្ហា​សង្គ្រាម​នៅ​អ៊ុយក្រែន

ប្រធានាធិបតីអាមេរិក លោក ដូណាល់ ត្រាំ នឹងជួបជាមួយ​មេ​ដឹក​នាំ​អ៊ុយក្រែន លោក វ៉ូឡូឌីមៀរ ហ្សេលេនស្គី នៅ​សេតវិមាន​នា​ថ្ងៃចន្ទ​ទី​១៨​ខែ​សីហា​ឆ្នាំ​២០២៥​នេះ ដែលជាការពិភាក្សាទល់មុខគ្នាលើកដំបូងរបស់ពួកគេ ចាប់តាំងពីជំនួប​ដ៏ក្តៅគគុកកាលពីដើមឆ្នាំ។ លើកនេះ លោក ហ្សេលេនស្គី បាន​ដៃដឹក​មេដឹកនាំអឺរ៉ុបសំខាន់ៗ រួមទាំងអគ្គលេខាធិការអង្គការ​ណាតូ លោក ម៉ាក រូតេ និងនាយករដ្ឋមន្ត្រីអង់គ្លេស លោក Keir Starmer ចូលរួម​ផង​ដែរ ដើម្បីពិភាក្សាអំពីការបញ្ចប់សង្គ្រាមជាមួយរុស្ស៊ី។

កិច្ចប្រជុំនេះ ធ្វើឡើងបន្ទាប់ពីកិច្ចប្រជុំកំពូលនៅរដ្ឋ​អាឡាស្ការបស់លោក ត្រាំ ជាមួយសមភាគី​រុស្ស៊ីលោក វ្ល៉ាឌីមៀរ ពូទីន ជាកន្លែងដែលសហរដ្ឋអាមេរិកទាមទារ​ឲ្យ​មាន​បទឈប់បាញ់ ដើម្បី​ឈាន​ដល់​កិច្ចព្រមព្រៀងសន្តិភាពអចិន្ត្រៃយ៍។ យោង​តាម BBC បេសកជនអាមេរិកម្នាក់បានបង្ហើបថា លោក ពូទីន បានយល់ព្រមជាបណ្ដោះអាសន្នចំពោះកតិកាសញ្ញា​ធានា​​សន្តិសុខ​​ដូចអង្គការណាតូសម្រាប់អ៊ុយក្រែន ដែលជំរុញ​ឲ្យ​លោក ត្រាំ ប្រកាស​ថាមាន​ «ការរីកចម្រើន​ដ៏ធំលើរុស្ស៊ី»។

ប្រធានាធិបតីបារាំង Emmanuel Macron អធិការបតីអាល្លឺម៉ង់ Friedrich Merz និងមេដឹកនាំអឺរ៉ុបផ្សេងទៀត ក៏កំពុងធ្វើដំណើរទៅកាន់ទីក្រុងវ៉ាស៊ីនតោនសម្រាប់កិច្ចពិភាក្សានេះ ដែលជាសញ្ញានៃភាពបន្ទាន់ដែលមិនធ្លាប់មានពីមុនមក។ ប្រភព​ការទូត​​ជាច្រើន​បង្ហាញ​ពី​ក្តីបារម្ភ​ថា លោក ត្រាំ អាច​នឹង​ដាក់​សម្ពាធ​លើ​លោក ហ្សេលេនស្គី ឲ្យ​​ធ្វើការ​​សម្បទានទឹកដី ទោះបីជា​មន្ត្រី​អាមេរិក​បដិសេធ​ការអះអាង​បែបនេះ​ក៏ដោយ​។

ចំណែក​ឯ​លោក ហ្សេលេនស្គី បានរំលឹកម្ដង​ហើយ​ម្ដង​ទៀត​ថា សម្បទានទឹកដីគឺជា​រឿង​ដែល​មិន​អាចចរចា​គ្នា​បាន​ឡើយ ដោយទទូចថា ការពិភាក្សាណាមួយត្រូវតែពាក់ព័ន្ធនឹងកិច្ចពិភាក្សាដោយផ្ទាល់រវាង​អ៊ុយក្រែន រុស្ស៊ី និង​អាមេរិក។

សូម​រឭក​ថា ភាពតានតឹងរវាងលោក ត្រាំ និង​លោក ហ្សេលេនស្គី បានធូរស្រាលចាប់តាំងពីការប៉ះទង្គិចគ្នានៅខែកុម្ភៈ ជាមួយនឹងកិច្ចពិភាក្សាឯកជននាពេលថ្មីៗនេះ និងឆន្ទៈរបស់អ៊ុយក្រែន ក្នុងការផ្តល់មូលនិធិដល់សព្វាវុធរបស់សហរដ្ឋអាមេរិកដើម្បីកែលម្អទំនាក់ទំនង។ ទន្ទឹមនឹងនេះដែរ លោក ត្រាំ បានបង្កើនការរិះគន់ចំពោះការឈ្លានពានរបស់លោក ពូទីន ហើយ​ថែមទាំង​គំរាមកំហែងការដាក់ទណ្ឌកម្ម​ដ៏​ធ្ងន់ធ្ងរ​​ទៀត​ផង៕

ដោយ៖ ឈាង