Connect with us

ព័ត៌មានអន្ដរជាតិ

ពូទីន សួរ ត្រាំ ថា បើរុស្ស៊ីជាខ្លាក្រដាស ចុះណាតូ ជាស្អីវិញ?

បានផុស

នៅ

បើរុស្ស៊ីជាខ្លាក្រដាស ចុះណាតូជាស្អីវិញ? នេះគឺជាសំណួររបស់ប្រមុខវិមានក្រឹមឡាំង វ្ល៉ាឌីមៀរ ពូទីន សួរបកទៅប្រធានាធិបតីអាមេរិក ដូណាល់ ត្រាំ។

ប្រធានាធិបតីរុស្ស៊ី វ្ល៉ាឌីមៀរ ពូទីន (រូបថត៖ Reuters)
សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងវេទិកា Valdai ដែលរៀបចំឡើងនៅទីក្រុងរមណីយដ្ឋានសមុទ្រខ្មៅ Sochi កាលពីថ្ងៃព្រហស្បតិ៍ទី២ខែតុលាឆ្នាំ២០២៥ ផ្សាយដោយសារព័ត៌មាន AP, មេដឹកនាំរុស្ស៊ីបានឆ្លើយតបទៅលោកត្រាំថា «ខ្លា​ក្រដាស? តើមានអ្វីបន្តទៀត? យើងកំពុងប្រឈមមុខនឹងក្រុមសម្ព័ន្ធអង្គការណាតូទាំងមូល ប៉ុន្តែយើងនៅតែរក្សាបាននូវសន្ទុះនិងមានអារម្មណ៍ជឿជាក់។ ប្រសិនបើអ្នកហៅរុស្ស៊ីថាជា ខ្លាក្រដាស ចុះតើណាតូជាស្អីវិញ? សាកតទល់ជាមួយខ្លាក្រដាសនេះទៅ»។

លោកបន្តថា «សមាជិក ណាតូ កំពុងបន្តផ្តល់ទាំងព័ត៌មានសម្ងាត់ សព្វាវុធនិងការហ្វឹកហ្វឺនដល់យោធាអ៊ុយក្រែន។ ដូច្នេះហើយ យើងកំពុងប្រយុទ្ធជាមួយប្លុកនេះទាំងមូល»។

ប្រធានាធិបតីរុស្ស៊ី វ្ល៉ាឌីមៀរ ពូទីន (រូបថត៖ Reuters)

រម្លឹកទៅខែមុន លោកត្រាំបានបង្ហោះសារលើបណ្តាញសង្គមថា រុស្ស៊ីជាខ្លាក្រដាសព្រោះពួកគេមិនអាចសូម្បីយកឈ្នះលើអ្នកជិតខាងដែលតូចជាងខ្លួន ក្នុងការច្បាំងគ្នាអស់រយៈពេល ៣ឆ្នាំកន្លះ។

យ៉ាងណាមិនទុកយូរឡើយ ភ្លាមៗនោះរុស្ស៊ីក៏ឆ្លើយតបទៅលោក ត្រាំ វិញភ្លាម ដោយអ្នកនាំពាក្យវិមានក្រឹមឡាំង Dmitry Peskov និយាយថា «រុស្ស៊ីគឺជាខ្លាឃ្មុំ មិនមែនខ្លាក្រដាសទេ»។

វិមានក្រឹមឡាំងក៏ច្រានចោលការអះអាងរបស់លោក ត្រាំ ដែលថា អ៊ុយក្រែនអាចដណ្តើមយកទឹកដីរបស់ខ្លួនមកវិញផងដែរ ដោយទទូចថា រុស្ស៊ីគ្មាន​ជម្រើស​អ្វីក្រៅពី​​បន្តសង្គ្រាម​ទៅ​មុខ​នោះ​ទេ ដើម្បី​ពលរដ្ឋ​ជំនាន់​ក្រោយ​របស់​ខ្លួន។

សូមជម្រាបជាថ្មី រុស្ស៊ីបានបើកប្រតិបត្តិការយោធាពេញទំហឹងលើអ៊ុយក្រែន នៅថ្ងៃទី២៤ខែកុម្ភៈឆ្នាំ ២០២២ ជាមួយនឹងការលុកលុយគ្រប់ទិស។ យោងតាមតួលេខពីឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស, សង្គ្រាមអាយុកាលជាង៣ឆ្នាំមួយនេះ បានសម្លាប់ជនស៊ីវិល ១៣ ៨៨៣នាក់ និងរបួស ៣៥ ៥៤៨នាក់៕

អត្ថបទ៖ សុខ សុវណ្ណ

ចុចអាន៖ ពូទីន សរសើរ ត្រាំ តែក៏ប្រឆាំងដាច់ខាតដែរ ចំពោះការផ្តល់មីស៊ីល Tomahawk ទៅឲ្យអ៊ុយក្រែន

Helistar Cambodia - Helicopter Charter Services
Sokimex Investment Group
Sokha Hotels

ព័ត៌មានពេញនិយម