ពូទីន សរសើរ ត្រាំ តែក៏ប្រឆាំងដាច់ខាតដែរ ចំពោះការផ្តល់មីស៊ីល Tomahawk ទៅឲ្យអ៊ុយក្រែន

មេដឹកនាំវិមានក្រឹមឡាំង វ្ល៉ាឌីមៀរ ពូទីន បានសរសើរប្រធានាធិបតីអាមេរិក ដូណាល់ ត្រាំ សម្រាប់កិច្ចខិតខំប្រឹងប្រែងជួយឲ្យមានការចរចាសន្តិភាពអ៊ុយក្រែន ប៉ុន្តែក៏ប្រឆាំងនឹងការផ្តល់មីស៊ីល Tomahawk ឲ្យទីក្រុងកៀវផងដែរ ដោយព្រមានថា ទង្វើបែបនេះ ពិតជាប៉ះពាល់ធ្ងន់ធ្ងរដល់ទំនាក់ទំនងរវាងទីក្រុងមូស្គូនិងវ៉ាស៊ីនតោន ជាក់ជាមិនខានឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងវេទិកាអ្នកជំនាញគោលនយោបាយអន្តរជាតិនៅឯទីក្រុងរមណីយដ្ឋានសមុទ្រខ្មៅ Sochi នៃប្រទេសរុស្ស៊ី កាលពីថ្ងៃព្រហស្បតិ៍ទី២ខែតុលាឆ្នាំ២០២៥ លោកពូទីនសរសើរលោកត្រាំថា កិច្ចប្រជុំកំពូលខែសីហានៅអាឡាស្កាក្រោមការរៀបចំរបស់ប្រធានាធិបតីអាមេរិក ពិតជាទទួលបានផ្លែផ្កា។

លោកពូទីននិយាយថា «វាជារឿងដ៏ល្អដែលយើងបានព្យាយាមស្វែងរកគ្រប់មធ្យោបាយ ដើម្បីដោះស្រាយវិបត្តិអ៊ុយក្រែន ហើយលោកស្រណុកចិត្ត ពេលនិយាយជាមួយ ត្រាំ»។

យ៉ាងណា ពូទីន ក៏ជំទាស់ដាច់ខាតផងដែរចំពោះការបញ្ជូនមីស៊ីលរយៈចម្ងាយឆ្ងាយ Tomahawk របស់អាមេរិកទៅឲ្យអ៊ុយក្រែន ដោយនិយាយថា ការសម្រេចចិត្តបែបនេះ ធ្វើឲ្យខូចខាតធ្ងន់ធ្ងរដល់ទំនាក់ទំនង ហើយក៏គ្មានជួយឲ្យកែប្រែស្ថានការណ៍អ្វីនៅសមរភូមិជួរមុខបានដែរ។

ការផ្គត់ផ្គង់មីស៊ីល Tomahawk ទៅឲ្យទីក្រុងកៀវ នឹងក្លាយជាសញ្ញានៃភាពតានតឹងដំណាក់កាលថ្មី រួមទាំងនៅក្នុងទំនាក់ទំនងរវាងរុស្ស៊ី និងសហរដ្ឋអាមេរិកផងដែរ។

កាលពីដើមសប្តាហ៍នេះ អនុប្រធានាធិបតីអាមេរិក JD Vance បញ្ជាក់ថា ទីក្រុងវ៉ាស៊ីនតោនកំពុងពិចារណាសំណើរបស់អ៊ុយក្រែន សុំមីស៊ីលរយៈចម្ងាយឆ្ងាយ Tomahawk យកទៅជួយទីក្រុងកៀវ ប្រយុទ្ធជាមួយកងកម្លាំងរុស្ស៊ី។

យ៉ាងណា សំណើនេះមិនមែនមានន័យថា អាមេរិកជាអ្នកជួយអ៊ុយក្រែនដោយផ្ទាល់នោះទេ ប៉ុន្តែប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី បានស្នើឲ្យទីក្រុងវ៉ាស៊ីនតោន លក់មីស៊ីលរយៈចម្ងាយ២ ៥០០គីឡូម៉ែត្រទាំងនេះទៅឲ្យបណ្តាប្រទេសនៅអឺរ៉ុប ដូច្នេះសម្ព័ន្ធមិត្តទាំងនោះ អាចទិញមីស៊ីលយកទៅផ្គត់ផ្គង់ដល់ទីក្រុងកៀវបាន៕

អត្ថបទ៖ សុខ សុវណ្ណ

ចុចអាន៖ Medvedev បដិសេធ​ការ​អះអាង​របស់ ត្រាំ អំពី​ការដាក់​ពង្រាយ​នាវាមុជ​ទឹកនុយក្លេអ៊ែរ​​​ក្បែរឆ្នេរ​​រុស្ស៊ី