អ្នកធ្លាប់ចាក់វ៉ាក់សាំងចិនទាំង២ប្រភេទ មិនចាំបាច់ចាក់ Astra Zeneca ជាដូសជំរុញក៏បានដែរ

អ្នកធ្លាប់ចាក់វ៉ាក់សាំង Sinovac ឬ Sinopharm កន្លងមក ពុំចាំបាច់ចាក់វ៉ាក់សាំង AstraZeneca ជាដូសជំរុញក៏បាន ដោយអាចប្រើវ៉ាក់សាំង Sinovac ឬ Sinopharm ដដែលនេះបាន។ នេះបើយោងតាមលិខិតចុះផ្សាយរបស់ក្រសួងសុខាភិបាល នៅថ្ងៃទី ២៥ ខែសីហា ឆ្នាំ២០២១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងសុខាភិបាលកម្ពុជា បានឱ្យដឹងថា ចំពោះមន្ត្រីជួរមុខ និងបុគ្គលអាយុចាប់ពី ៦០ឆ្នាំឡើងទៅ ឬអ្នកមានប្រព័ន្ធភាពស៊ាំខ្សោយ អាចចាក់ដូសជំរុញបានក្រោយចាក់ពីរដូសដំបូងបាន ៤-៦ខែ។

ក្នុងនោះដែរ អ្នកធ្លាប់ចាក់វ៉ាក់សាំង Sinovac ឬ Sinopharm នៅតែអាចប្រើវ៉ាក់សាំងដែល ដោយមិនចាំបាច់ប្ដូរប្រភេទវ៉ាក់សាំងនោះទេ។ បន្ថែមពីលើនេះ អ្នកក៏អាចចាក់វ៉ាក់សាំង Pfizer និង Modena បានដែរ។

កន្លងមក រាជរដ្ឋាភិបាលកម្ពុជា រួមទាំងក្រសួងសុខាភិបាល មិនទាន់អនុម័តឱ្យមានការប្រើប្រាស់វ៉ាក់សាំងដូសជំរុញណាផ្សេងក្រៅពី AstraZeneca របស់អង់គ្លេសឡើយ។ ប៉ុន្តែពេលនេះ ក្រសួងបានយល់ព្រមឱ្យប្រើប្រាស់ប្រភេទវ៉ាក់សាំងដដែលសម្រាប់អ្នកធ្លាប់ចាក់វ៉ាក់សាំងរបស់ចិនទាំង២គឺ Sinovac និង Sinopharm។

ដោយឡែក អ្នកដែលធ្លាប់ចាក់វ៉ាក់សាំង AstraZeneca ឬ វ៉ាក់សាំង Johnson & Johnson ពីមុនមករួចរាល់ ក៏អាចចាក់វ៉ាក់សាំងប្រភេទដដែល ឬអាចចាក់វ៉ាក់សាំងបច្ចេកវិទ្យា mRNA បានគឺ Pfizer និង Modena៕

អត្ថបទ៖ សន្យា

ចុចអាន៖ វ៉ាក់សាំងដូសជំរុញ អាចបង្កើនកម្រិតអង់ទីគ័រខ្ពស់ ប្រឆាំង Delta និងវីរុសបំប្លែងខ្លួនថ្មីផ្សេងទៀត

ចុចអាន៖ ករណីមិនទាន់គ្រប់ខែច្រឡំទៅចាក់ដូសទី ៣ វ៉ាក់សាំងពិតជាមានប្រសិទ្ធភាពក្នុងរាងកាយឬអត់?