ថ្នាំគ្រាប់ Molnupiravir អាចព្យាបាលអ្នកជំងឺកូវីដបំប្លែងខ្លួនបានកម្រិតណា?

ថ្នាំគ្រាប់ Molnupiravir របស់ក្រុមហ៊ុន Merck កំពុងជោគជ័យលើការសាកល្បង និងត្រូវបានប្រទេសមួយចំនួនបានបញ្ជារទិញជាបណ្ដើរៗហើយ ខណៈក្រសួងសុខាភិបាលនៃព្រះរាជាណាចក្រកម្ពុជាក៏បានចេញសេចក្តីប្រកាសអនុញ្ញាតឲ្យប្រើប្រាស់ថ្នាំព្យាបាលជំងឺកូវីដ-១៩ប្រភេទនេះ ក្នុងលក្ខខណ្ឌបន្ទាន់ផងដែរ។

ជាមួយនឹងប្រសិទ្ធភាពនៃការព្យាបាលអ្នកជំងឺកូវីដ-១៩ ថ្នាំគ្រាប់ប្រភេទនេះ ក៏អាចព្យាបាលអ្នកជំងឺដែលផ្ទុកវីរុសកូវីដបំប្លែងខ្លួនបានល្អដូចគ្នា។

បើយោងតាមប្រភពពី Yale Medicine បានឱ្យដឹងថា ថ្នាំគ្រាប់ Molnupiravir មិនត្រឹមតែអាចសង្គ្រោះអ្នកជំងឺកូវីដ-១៩ ប៉ុណ្ណោះទេ ប៉ុន្តែក្នុងការស្រាវជ្រាវដែលធ្វើឡើងនៅក្នុងសហរដ្ឋអាមេរិក និងបណ្តាប្រទេសផ្សេងទៀត បានបង្ហាញអំពីប្រសិទ្ធភាពថ្នាំដែលអាចប្រឆាំងនឹងវីរុសបំប្លែងខ្លួនខ្លាំងៗដូចជា Delta, Gamma, និង Mu ថែមទៀតផង។

ដោយឡែករបៀបប្រើថ្នាំគ្រាប់ Molnupiravir ដែលផ្ដល់ប្រសិទ្ធភាពបំផុត សម្រាប់អ្នកឆ្លងកូវីដទម្រង់ដើម និងវីរុសបំប្លែងខ្លួន គឺត្រូវលេបបន្ទាប់ពីចេញរោគសញ្ញានៃជំងឺ។ នៅក្នុងការសាកល្បងព្យាបាលដោយក្រុមហ៊ុន Merck ថ្នាំ Molnupiravir ត្រូវលេបចំនួន៤គ្រាប់ និងលេបពីរដងក្នុងមួយថ្ងៃ ក្នុងរយៈពេលប្រាំថ្ងៃជាប់ៗគ្នា រាប់ចាប់ពីថ្ងៃចេញរោគសញ្ញាដំបូង​ នោះអាការនឹងប្រសើរឡើង។

វេជ្ជបណ្ឌិត Albert Shaw អ្នកឯកទេសជំងឺឆ្លងប្រចាំគេហទំព័រ Yale Medicine ពន្យល់ថា នៅពេលអ្នកជំងឺលេបថ្នាំនេះ វានឹងចូលទៅក្នុងចរន្តឈាម រួចរារាំងឬបញ្ឈប់សមត្ថភាពរបស់វីរុសមិនឱ្យរាលដាលនៅក្នុងរាងកាយបានទៀតឡើយ៕

ប្រែសម្រួល៖ សន្យា

ចុចអាន៖ ៧ ចំណុច គ្រប់គ្នាចង់ដឹងបំផុតអំពីថ្នាំគ្រាប់ព្យាបាលកូវីដ-១៩

ចុចអាន៖ ពិភពលោកទទួលបានអាវុធពិសេសមួយទៀត ដើម្បីសម្លាប់ កូវីដ