សុខភាព

កុំទុកអ្នកមានគុណឲ្យនៅឯកោ ព្រោះពួកគាត់អាចប្រឈមនឹងហានិភ័យខ្ពស់

បានផុស

៤ years មុន

នៅ

ថ្ងៃសុក្រ ១៩ កុម្ភៈ ២០២១

ដោយ

ភាពឯកោ ធ្វើឲ្យមនុស្សចាស់ប្រឈមគ្រោះថ្នាក់សុខភាពធ្ងន់ធ្ងរជាងការធាត់លើសគីឡូទៅទៀត។ នេះបើតាមការលើកឡើងរបស់ក្រុមអ្នកវិទ្យាសាស្រ្ត។ ក្រុមអ្នកស្រាវជ្រាវនៅសាកលវិទ្យាល័យ Chicago បានបង្ហាញថាភាពឯកោខ្លាំង ឬនៅតែឯង មានគ្រោះថ្នាក់ដល់សុខភាពមនុស្សវ័យចំណាស់ពីរដងខ្ពស់ជាងជំងឺធាត់។

ការលើកឡើងបែបនេះ គឺក្រោយអ្នកស្រាវជ្រាវសិក្សាលើមនុស្ស២ ០០០នាក់វ័យ៥០ឆ្នាំឡើង អស់រយៈពេលជាងប្រាំមួយឆ្នាំ។ ការសិក្សាបញ្ជាក់ថាមនុស្សវ័យចំណាស់ដែលបាននិយាយថាខ្លួនជាមនុស្សរស់នៅតែឯង ឬឯកោ មាន១៤ ភាគរយប្រឈមនឹងអត្រាស្លាប់ខ្ពស់ជាងមនុស្សធម្មតា។

១.ភាពឯកោ និងកត្តាប្រឈមរបស់មនុស្សចាស់

មនុស្សវ័យចំណាស់ មិនសូវមានកូនចៅនៅជាមួយទៀតទេ ក្នុងបរិបទសង្គមសព្វថ្ងៃ។ ការសិក្សារកឃើញថា មនុស្សចាស់ដែលរស់នៅតែឯង មានផលប៉ះពាល់ធ្ងន់ធ្ងរទាំងលើផ្នែកសុខភាពផ្លូវកាយ និងផ្លូវចិត្ត។

សាស្រ្តាចារ្យ John Cacioppo ប្រចាំសាកលវិទ្យាល័យ Chicago បានកត់សម្គាល់ពីភាពធ្លាក់ចុះនៃសុខភាពផ្លូវកាយ និងចិត្ត របស់មនុស្សវ័យចំណាស់ ហើយថាការធ្លាក់ចុះនេះអាចមានកម្រិតផ្សេងគ្នាពីមនុស្សម្នាក់ទៅម្នាក់ទៀតអាស្រ័យលើទំនាក់ទំនងគ្រួសារដែលអ្នកទាំងនោះមាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

២. ភាពឯកោ និងសម្ពាធឈាមខ្ពស់

ការសិក្សារបស់សាកលវិទ្យាល័យ Chicago បានរកឃើញពីទំនាក់ទំនងដោយផ្ទាល់រវាងភាពឯកោយូរអង្វែង និងការកើនឡើងសម្ពាធឈាម។ ការមិនសូវមានទំនាក់ទំនងក្នុងសង្គម អាចជាហេតុផលមួយធ្វើឲ្យអ្នកឯកកោមានសម្ពាធឈាមឡើងខ្ពស់។

ការសិក្សារយៈពេលជាងបួនទៅប្រាំឆ្នាំ លើមនុស្ស២២៩នាក់មានវ័យចន្លោះពី៥០ទៅ៦៨ឆ្នាំ បានរកឃើញថាអ្នកចូលរួមដែលរស់នៅឯកោ សម្ពាធឈាមអ្នកទាំងនោះឡើងដល់១៤,៤មិល្លីម៉ែត្រខ្ពស់ជាងអ្នកមានទំនាក់ទំនង ឬមិត្តភក្តិច្រើនក្នុងសង្គម។ ការសិក្សាបានលើកឡើងថាមនុស្សនៅដាច់តែឯងកាន់តែយូរ បញ្ហាសុខភាពក៏កើតឡើងកាន់តែច្រើនដែរ។

ការសិក្សាបញ្ជាក់ថាដើម្បីបំបាត់ ឬការពារមនុស្សវ័យចំណាស់ពីអារម្មណ៍ឯកកោត្រូវ ឲ្យពួកគាត់ដឹងពី បញ្ហា និងបញ្ឈប់ការគិតបែបអវិជ្ជមានចំពោះគំនិតខ្លួនឯង។ យ៉ាងណាស្ថានប័នធ្វើការលើសុខភាពមនុស្សចាស់ បានលើកឡើងថាមនុស្សវ័យចំណាស់ គួរឧស្សាហ៍ជួបជុំនិយាយគ្នាលេងជាមួយអ្នកជិតខាង ឬមិត្តភក្ដិ ឬអាចធ្វើដំណើរកម្សាន្ត ក៏ដូចជាធ្វើការផ្សេងៗបំបាត់ភាពអផ្សុកជាដើម។ ក្រៅពីនេះ កាយកចិត្តទុកដាក់លើសុខភាពផ្ទាល់ខ្លួន ដូចជាការធ្វើលំហាត់ប្រាណ ជាដើម ក៏សុទ្ធតែ មានប្រយោជន៍ដល់មនុស្សវ័យចំណាស់ដើម្បីកម្ចាត់នូវភាពឯកកោរបស់ខ្លួនផងដែរ៕

អត្ថបទផ្ដល់សិទ្ធិដោយ៖ Hellokrupet

សូមចុចអាន៖ ស្វែងរកការជួយសង្គ្រោះ បើខ្លួនអ្នក ឬមនុស្សដែលអ្នកស្គាល់មានគំនិតចង់សម្លាប់ខ្លួន

សូមចុចអាន៖ មួយថ្ងៃៗញ៉ាំអាហារផ្តេសផ្ដាស ជក់បារី ផឹកស្រា ប្រយ័ត្នកើតជំងឺមហារីកបំពង់អាហារ