ក្រសួង ជំរុញឱ្យពង្រឹងគុណភាពគ្រូពេទ្យឆ្មប ដើម្បីគាំពារមាតា និងទារក

ក្រសួងសុខាភិបាល តាមរយៈរដ្ឋលេធិការក្រសួង លោកស្រីសាស្រ្តាចារ្យ អ៊ឹម សិទ្ធិការ្យ ជំរុញឱ្យពង្រឹងគុណភាពក្រុមការងារឆ្មប និងគ្រូពេទ្យ ក្នុងការផ្តល់សេវាថែទាំស្រ្តីមានផ្ទៃពោះទាំងមុន និងក្រោយពេលសម្រាលឱ្យមានប្រសិទ្ធិភាព ដើម្បីគាំពារមាតា និងទារក។

ការជំរុញនេះ ធ្វើឡើងនៅក្នុងកិច្ចប្រជុំប្រចាំឆ្នាំត្រួតពិនិត្យលទ្ធផលការងារឆ្នាំ ២០២៤ និងការធ្វើផែនការសម្រាប់ឆ្នាំ២០២៥ នៃមជ្ឈមណ្ឌល ជាតិគាំពារមាតា និងទារក កាលពីថ្ងៃទី ០៤ ខែធ្នូ ឆ្នាំ ២០២៤។ កិច្ចប្រជុំនេះធ្វើឡើងក្នុងគោលបំណង ដើម្បីពិនិត្យវឌ្ឍនភាពការងារដែលបានអនុវត្តក្នុងឆ្នាំ២០២៤ បញ្ហាប្រឈមសំខាន់ៗ ទាក់ទងនិងការអនុវត្តផែនការ ព្រមទាំងវឌ្ឍនភាពសម្រាប់កម្មវិធីប្រចាំឆ្នាំ២០២៤-២០២៨។

រដ្ឋលេខាធិការក្រសួងសុខាភិបាល លោកស្រី អ៊ឹម សិទ្ធិការ្យ បានផ្តល់អនុសាសន៍ឱ្យស្វែងរកដំណោះស្រាយរួមគ្នា និងបានជំរុញឱ្យពង្រឹងគុណភាពក្រុមការងារឆ្មប និងគ្រូពេទ្យ ក្នុងការផ្តល់សេវាថែទាំផ្ទៃពោះមុនសម្រាល ពេលសម្រាល និងក្រោយពេលសម្រាលឱ្យមានប្រសិទ្ធិភាព។ លោកស្រីបន្តថា ការថែទាំក្រោយសម្រាល ត្រូវគិតអំពីគុណភាពសេវា EmONC ដែលត្រូវពិនិត្យឡើងវិញ ទៅលើធនធានមនុស្ស និងធនធានសម្ភារ ជាពិសេសការពិនិត្យប្រអប់សង្គ្រោះបន្ទាន់ក្នុងបន្ទប់សម្រាល ឱ្យបានជារៀងរាល់ថ្ងៃ ។

លោកស្រីមានប្រសាសន៍ថា៖« បង្កើតប្រព័ន្ធ គណៈកម្មការអង្កេតតាមដាន មរណភាពមាតា និងទារកជុំវិញកំណើត ឱ្យមានប្រសិទ្ធិភាព ដើម្បីពង្រឹងសេវាថែទាំផ្ទៃពោះឱ្យកាន់តែប្រសើរ ក៏ដូចសេវាសង្គ្រោះផ្នែកសម្ភពនិងថែទាំទារកក្រោយកើត» ។ ជាមួយគ្នានេះ លោកស្រីលើកទឹកចិត្តឱ្យពិនិត្យលើការទទួលសេវារបស់ស្ត្រី កុមារ និងយុវវ័យ ជាពិសេសក្រុមដែលងាយរងគ្រោះពីឧបសគ្គផ្សេងៗ ។

កិច្ចប្រជុំនេះ រៀបចំដោយមជ្ឈមណ្ឌលជាតិគាំពារមាតា និងទារកនៃក្រសួងសុខាភិបាល និងឧបត្ថម្ភដោយ មូលនិធិសហប្រជាជាតិ (UNFPA) ដោយមានការចូលរួមពី សមាគមឆ្មបកម្ពុជា នាយកដ្ឋានមន្ទីរពេទ្យ ប្រធាន អនុប្រធានផ្នែកគាំពារមាតា និងទារក ទាំង១១ ខេត្ត រួមមាន ខេត្តកំពង់ចាម ត្បូងឃ្មុំ ក្រចេះ ស្ទឹងត្រែង មណ្ឌលគិរី រតនគិរី ព្រះវិហារ កំពង់ធំ សៀមរាប កំពង់ស្ពឺ និងខេត្តតាកែវ៕