KPT+

វិធីសាស្ត្រសាមញ្ញ តែមានប្រសិទ្ធភាព ដើម្បីជួយអ្នកជំងឺបាក់ទឹកចិត្ត

បានផុស

២ years មុន

នៅ

ថ្ងៃពុធ ២៧ មេសា ២០២២

ដោយ

ជំងឺធ្លាក់ទឹកចិត្ត (Depression) ជាវិបត្តិជំងឺផ្លូវចិត្តដ៏ធ្ងន់ធ្ងរ ដែលអាចកើតមានទៅលើមនុស្សគ្រប់វ័យ។ យ៉ាងណាក៏ដោយ វានៅតែជាជំងឺមួយដែលមនុស្សមួយចំនួនធំខ្វះការយល់ដឹង មានភាពព្រងើយកន្តើយ ក្នុងករណីខ្លះអាចឈានទៅដល់ការសើចចំអក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាពិសេស ចំពោះអ្នកជំងឺដែលគាត់មិនហ៊ានបើកចំហរ និងនិយាយប្រាប់សូម្បីអ្នកនៅជុំវិញអំពីស្ថានភាពបាក់ទឹកចិត្តរបស់ខ្លួន។ ហេតុនេះបើសិនជាអ្នកមានមិត្តភ័ក្ដិ ឬមនុស្សជិតស្និទ្ធណាដែលកំពុងប្រឈមនឹងជំងឺបាក់ទឹកចិត្ត គន្លឹះសាមញ្ញៗខាងក្រោមនេះអាចជួយសម្រួលផ្លូវចិត្តពួកគាត់បានខ្លះ។

១. ស្វែងយល់អំពីជំងឺធ្លាក់ទឹកចិត្ត

មុនពេលយើងចង់ជួយដល់អ្នកដែលបាក់ទឹកចិត្ត យើងត្រូវអប់រំខ្លួនឯង ស្វែងយល់ពីជំងឺមួយនេះឱ្យបានច្បាស់សិន។ បើសិនជាអ្នកមិនធ្លាប់ធ្លាក់ក្នុងស្ថានភាពបាក់ទឹកចិត្តទេ វាអាចនឹងមានភាពលំបាកខ្លះៗក្នុងការធ្វើការកត់សម្គាល់អ្នកដែលកំពុងប្រឈមនឹងជំងឺធ្លាក់ទឹកចិត្តនេះ។ ដូចនេះ អ្នកអាចរៀន និងស្រាវជ្រាវពីជំងឺនេះបាន ដែលមាននៅលើគេហទំព័រអនឡាញរបស់បរទេស អាចទុកចិត្តបាន។

២. ចាត់ទុកជំងឺធ្លាក់ទឹកចិត្តជាបញ្ហាសំខាន់

ជំងឺធ្លាក់ទឹកចិត្តមិនមែនជារឿងធម្មតាដែលយកមកលេងសើច ហើយអាចព្យាបាលបានដោយងាយស្រួលនោះទេ ក្នុងករណីធ្ងន់ធ្ងរ អ្នកត្រូវដឹងថា ជំងឺផ្លូវចិត្តមិនមែនអាចជាសះស្បើយបានក្នុងរយៈពេលតែមួយយប់ឡើយ។ ជាក់ស្ដែង នៅក្នុងអំឡុងពេលអ្នកនិយាយជាមួយអ្នកជំងឺបាក់ទឹកចិត្ត កុំព្យាយាមមើលស្រាលពីជំងឺនេះ ពីព្រោះវាធ្ងន់ធ្ងរលើសពីអ្វីដែលអ្នកគិត។ បន្ថែមពីនេះ អ្នកមិនអាចជួយដល់អ្នកជំងឺបាក់ទឹកចិត្ត ដោយគ្រាន់តែប្រាប់ពួកគេនូវពាក្យពីរបីម៉ាត់ ដូចជា “កុំពិបាកចិត្តអី ធ្វើចិត្តឱ្យសប្បាយ” ជាដើម។

៣. ធ្វើជាអ្នកស្ដាប់ដ៏ល្អ

នៅពេលដែលមនុស្សធ្លាក់ក្នុងស្ថានភាពបាក់ទឹកចិត្ត ពួកគេតែងតែមានអារម្មណ៍ថាខ្លួនឯងឯកោជានិច្ច។ ពេលខ្លះ ពួកគេគិតថា គ្មាននរណាម្នាក់ចូលចិត្ត ឬចង់និយាយជាមួយពួកគេអំពីបញ្ហាទាំងនោះទេ។ ដោយសារវាមានភាពស្មុគស្មាញ និងពិបាក សម្រាប់មនុស្សធ្លាក់ទឹកចិត្តក្នុងការ និយាយបើកកកាយអំពីបញ្ហាសុខភាពផ្លូវចិត្តទាំងនោះ។ ដូចនេះអ្នកអាចនៅក្បែរពួកគេ ដោយបង្ហាញថាអ្នកនៅទីនោះរងចាំស្ដាប់ជានិច្ច។ ការគាំទ្ររបស់អ្នកពិតជាមានសារៈសំខាន់ក្នុងការជួយពួកគាត់។

៤. លើកទឹកចិត្តពួកគាត់ទៅជួបអ្នកជំនាញ

បើសិនជាស្ថិតក្នុងដំណាក់កាលធ្ងន់ធ្ងរ អ្នកជំងឺចាំបាច់ត្រូវស្វែងរកអ្នកជំនាញ ដើម្បីពិគ្រោះមើលឱ្យបានច្បាស់លាស់។ ទោះបីនៅក្នុងប្រទេសកម្ពុជាមិនទាន់មានមន្ទីពេទ្យព្យាបាលផ្លូវចិត្តពេញលេញក៏ដោយ អ្នកក៏អាចជំរុញទឹកចិត្តអ្នកជំងឺឱ្យណាត់ជួប ពិគ្រោះយោបល់ជាមួយក្រុមគ្រូពេទ្យជំនាញនៅតាមមន្ទីពេទ្យរដ្ឋធំៗ និងតាមប្រព័ន្ធអនឡាញបាន។ ជាពិសេសត្រូវលើកទឹកចិត្តពួកគាត់ថា ជំងឺបាក់ទឹកចិត្តអាចព្យាបាលបាន មិនមែនត្រូវសង្ងំទុកម្នាក់ឯងនោះទេ។

៥. ផ្ដល់ជំនួយជាក់ស្តែង

មនុស្សបាក់ទឹកចិត្តពេលខ្លះមិនខ្វល់ជាមួយនឹងកិច្ចការផ្ទះប្រចាំថ្ងៃនោះទេ។ ជាក់ស្ដែង អ្នកអាចសង្កេតឃើញថា ពួកគេមិនមានអាហារគ្រប់គ្រាន់នៅក្នុងទូទឹកកក មិនរៀបចំផ្ទះសម្បែងជាដើម មិនខ្វល់ថានរណាបានផ្ញើសារមកខ្លះ និងមិនត្រួតពិនិត្យវិក្កយបត្រជាប្រចាំខែ ជាដើម។ អ្នកត្រូវចាំថាអ្នកមិនមែនជាគ្រូពេទ្យជំនាញអាចព្យាបាលជំងឺផ្លូវចិត្តបានទេ ប៉ុន្តែអ្នកអាចជួយសម្រួលទុក្ខវិបត្តិរបស់អ្នកជំងឺបាក់ទឹកចិត្តបាន។ ជាក់ស្ដែង ពេលអ្នកទៅផ្សារអ្នកអាចជួយទិញទំនិញប្រើប្រាស់ ឬម្ហូបអាហារសម្រាប់ពួកគាត់។ រឿងតូចតាចធម្មតាបែបនេះ ពិតជាមានអត្ថន័យ និងជួយសម្រាលទុក្ខដល់អ្នកជំងឺផ្លូវចិត្តបាន៕

ប្រែសម្រួល៖ លីលី

ចុចអាន៖៣ វិធីងាយៗ កម្ចាត់អារម្មណ៍ឯកា តាមរយៈសកម្មភាពថ្មីៗ

ចុចអាន៖៥ យ៉ាង គួរដឹងពីភាពវិជ្ជមាន និងអវិជ្ជមាន នៃចំណង់ផ្ទាល់ខ្លួន ចៀសវាងជ្រើសគោលដៅខុសនឹងជីវិត