តោះ! មកស្គាល់ហាងកាហ្វេសត្វឆ្កែ ៥កន្លែង សម្រាប់អ្នកស្រឡាញ់ឆ្កែ នៅក្នុងទីក្រុងភ្នំពេញ

អ្នកស្រឡាញ់សត្វឆ្កែ ប្រាកដជាពេញចិត្តស្តូកជាមួយនឹងហាងកាហ្វេ ៥កន្លែង ដែលមានទីតាំងផ្សេងៗគ្នា ក្នុងរាជធានីភ្នំពេញ ដែលសម្បូរទៅដោយកូនឆ្កែស្អាតៗ និងគួរឲ្យស្រឡាញ់ ជាមួយនឹងកាហ្វេ និងភេសជ្ជៈផ្សេងៗទៀត។

១.Doggo Café

ហាង Doggo Café មានទីតាំងនៅជិតរង្វង់មូល កាំកូស៊ីធី ដែលមានលក់កាហ្វេ និងភេសជ្ជៈផ្សេងៗជាមួយនឹងទីធ្លារធំទូលាយ ផាសុខភាព ព្រមទាំងមានសេវាកម្មលេងសត្វឆ្កែដោយសេរីផងដែរ។ សត្វឆ្កែ ដែលមានពូជចម្រុះគ្នា ច្បាស់ជាធ្វើឲ្យអ្នកដែលស្រឡាញ់ឆ្កែខ្លាំងពេញចិត្តជាមិនខាន។

២.ហាងកាហ្វេ Corgi in Town

ហាងកាហ្វេ Corgi in Town មានទីធ្លារធំល្អ តុបតែងដោយរុក្ខជាតិពណ៌ប៉ៃតង និងមានលក់ភេសជ្ជៈ ព្រមទាំងកាហ្វេផងដែរ។ បរិយាកាសល្អជាមួយនឹងការរួសរាយរាក់ទាក់ពីសត្វឆ្កែផងនោះ នឹងធ្វើឲ្យអារម្មណ៍របស់អ្នកមានភាពធូស្រាលពីភាពតានតឹងទាំងឡាយ ហើយអាចទទួលទានកាហ្វេយ៉ាងមានក្តីសុខ។ មិនត្រឹមតែជាហាងកាហ្វេដែលមានសត្វចិញ្ចឹមនោះទេ នៅ Corgi in Town ក៏មានលក់ចំណីសត្វ និងសម្ភារៈប្រើប្រាស់ផ្សេងៗទៀតរបស់ឆ្កែទៀតផង។ ចំពោះទីតាំងវិញ គឺស្ថិតនៅខណ្ឌសែនសុខ ជិតវត្តសំរោងអណ្តែត។

៣.ហាង Aigo Café

Aigo Café មិនត្រឹមតែជាហាងកាហ្វេដែលមានឆ្កែប្រលែងលេងជាមួយនោះទេ តែក៏ជាហាងកាហ្វេបែបកូរ៉េ ដែលមានទាំងអាហាសម្រន់ និងនំផ្សេងៗទៀត។ ហាង Aigo Café មានទីតាំងនៅជិតផ្សារទំនើបអ៉ីអន១ តាមបណ្តោយផ្លូវសុធារស ចាប់បើកតាំងពីម៉ោង ១១ព្រឹក ដល់ម៉ោង ៧ព្រឹក។

៤. Angel Café 

ហាង Angel Café  ជាហាងកាហ្វេដែលមានការតុបតែងបែបសាមញ្ញៗ ពណ៌ស និងខ្មៅ ប៉ុន្តែ ស្រស់ស្អាតត្រជាក់ភ្នែក។ មិនតែប៉ុណ្ណោះ ក៏មានឆ្កែស្អាតៗ និងអាហារសម្រន់ផ្សេងៗ ទាំងអាហារបែបបរទេស និងអាហារបែបខ្មែរក៏មានផងដែរ។ មួយវិញទៀត ប្រសិនជាអ្នកមានសត្វចិញ្ចឹមផ្ទាល់ខ្លួន រួចចង់ឲ្យមានគ្នាប្រលែងលេងជាមួយ លោកអ្នកក៏អាចយកសត្វឆ្កែចិញ្ចឹមរបស់លោកអ្នកមកលេងជាមួយនឹងឆ្កែនៅហាង Angel Café  បានដូចគ្នា ដែលមានទីតាំងនៅទួលទំពូង។​

៥.Dog pub and café

ហាង Dog pub and café មានទីតាំងនៅលើវិថីបូឡារីស ក្នុងទីក្រុងភ្នំពេញ ដែលមានការរចនាហាងបែបលក្ខណៈគ្រួសារ មានលក់កាហ្វេ និងអាហារសម្រន់ផ្សេងៗទៀត។ Dog pub and café ក៏មានលក់ចំណី​ និងសម្ភារៈផ្សេងៗរបស់ឆ្កែដូចហាងឯទៀតដែរ។

គួរបញ្ជាក់ ចំពោះតម្លៃរបស់កាហ្វេ និងអាហារផ្សេងៗរបស់ហាងនីមួយៗ គឺមានលក្ខណៈខុសៗតាមហាងរបស់ពួកគេ។ ក៏ប៉ុន្តែ ជាទូទៅ សម្រាប់ហាងកាហ្វេដែលមានឆ្កែលេងជាមួយនេះ គឺគេគិតតម្លៃសេវាកម្មលេងឆ្កែផ្សេង និងតម្លៃរបស់កាហ្វេ ព្រមទាំងភេសជ្ជៈ ឬ អាហារនានាផ្សេងទៅតាមនោះ៕

ដោយ៖ អុន ស្រីមាន