មកស្គាល់កន្លែងបោះតង់ លើទឹកដីទេសចរណ៍ធម្មជាតិដ៏ទាក់ទាញ នៃខេត្តស្ទឹងត្រែង

នៅរដូវធ្លាក់ខ្យល់អំឡុងខែកត្តិកនេះ ជាវេលាអំណោយផលមួយសម្រាប់ដំណើរកម្សាន្តជិះទូកគយគន់ទេសភាព និងបោះតង់លំហែកាយលើឆ្នេរទន្លេដ៏ស្រស់ស្អាត ក្នុងទឹកដីនៃខេត្តស្ទឹងត្រែង។ បើនិយាយពីតំបន់ទេសចរណ៍ទាក់ទាញបំផុតសម្រាប់ខេត្តស្ទឹងត្រែង គឺតំបន់រ៉ាមសារ ព្រោះសម្បូរដោយធនធានធម្មជាតិ ព្រៃលិចទឹក និងជាជម្រកសត្វដ៏សំខាន់មួយនៃប្រទេសកម្ពុជា។

តំបន់ដីសើមមួយនេះ ជាតំបន់កម្សាន្តបោះតង់ដ៏ពេញនិយមបំផុត របស់អ្នកទេចរ ដែលមានកោះសរុបជាង៥០ ដែលក្នុងនោះ កោះចំនួន៧ មានប្រជាសហគមន៍រស់នៅ និងប្រកបរបរកសិកម្មនៅទីនោះផងដែរ។ អ្វី​ដែល​ពិសេស​នៅ​ទីនោះ​ពោ ពេញ​​ដោយ​តំបន់​​ទេសចរណ៍​ដែល​មាន​សក្ដានុពល​សំខាន់​ៗ​ដូចជា ព្រៃ​អ្នកតា កោះ​សំបូរ ក្បាល​កោះ​ស្នែង ក្បាល​កោះ​ទន្លេ​មួយ ភ្នំ​ត្រងើល អន្លង់​ថ្ម​កំបោរ វាល​ព្រលាន ក្បាលកោះ និង​កោះហាន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កន្លែងទេសចរណ៍ទាំងនេះ ជាឋានសួគ៌បៃតង លើដែនទឹកតំបន់អភិរក្សជីវចម្រុះ នៃតំបន់រ៉ាមសារ តាមដងទន្លេមេគង្គលើ​ ទឹកដីនៃខេត្តស្ទឹងត្រែង។ តំបន់ទេសភាពសហគមន៍អេកូទេសចរណ៍កោះតាមដងទន្លេមេគង្គ នៅអំឡុងខែនេះ ពិតជាស្រស់ស្អាតខ្លាំង។

ទេសចរអាចជិះកាយ៉ាក ទស្សនាព្រៃលិចទឹកបៃតងខ្ចី ជាមួយនឹងឆ្នេរ​ខ្សាច់​សក្បុស ភ្លក់អាហារឆ្ងាញ់ ត្រីស្រស់ៗ ដែលចំអិនដោយសហគមន៍ ហើយអ្វីដែលកាន់តែពិសេសទៀតនោះ យើងអាចជិះទស្សនា សត្វស្លាប តំបន់ថ្មកំបោរនៃតំបន់រ៉ាមសារផងដែរ៕