តំបន់ទេសចរណ៍ទស្សនាសត្វជ្រឹង ស្ទើរក្លាយជាទីរហោស្ថាន

ទីតាំងដែលហ្វូងសត្វជ្រឹងតែងតែទម្លាក់ខ្លួនរយីងរយោងនៅតាមមែកឈើបង្កើតទៅជាទស្សនីយភាពសម្រាប់ទាក់ទាញភ្ញៀវទេសចរឲ្យចូលទៅគយគន់កម្សាន្ត ឥឡូវស្ទើរក្លាយទៅជាតំបន់រហោស្ថានស្ងាត់ជ្រងំ ដោយសារតែហ្វូងសត្វជ្រឹងបានប្ដូរដើមឈើសម្រាប់រស់នៅផង រីឯសួនដែលរៀបចំឡើងសម្រាប់ឲ្យភ្ញៀវទេសចរចូលទៅអង្គុយទស្សនា ក៏មានតែស្មៅដុះទ្រុបទ្រុលតែប៉ុណ្ណោះ។

បើតាមការរៀបរាប់ពីអ្នកភូមិដែលរស់នៅក្នុងតំបន់ជុំវិញបរិវេណវត្តបានបញ្ជាក់ថា កាលពីប៉ុន្មានឆ្នាំកន្លងមក នៅទីអារាមវត្តបាយដំរាំ ស្ថិតក្នុងភូមិបាយដំរាំ ឃុំឈើទាល ស្រុកបាណន់ ខេត្តបាត់ដំបង គឺមានហ្វូងសត្វជ្រឹងបាននាំគ្នាមករស់នៅតាមដើមឈើនៅក្នុងទីអារាមនេះរាប់រយរាប់ពាន់ក្បាល ដោយនៅក្នុងទីអារាមនេះមានដើមឈើធំៗជាច្រើន ដែលជាជម្រកដ៏ល្អសម្រាប់ពពួកសត្វជ្រឹងទាំងនេះ។

អ្នកភូមិបានបន្តថា ក្រោយមកក៏មានក្មេងៗ បាននាំគ្នាយកជំពាមកៅស៊ូតាមបាញ់សត្វជ្រឹងទាំងនេះទើបធ្វើឲ្យហ្វូងជ្រឹងនាំគ្នាហោះហើរមករស់នៅលើដើមជ្រេសមួយដើមដែលស្ថិតនៅខាងមុខវត្តបាយដំរាំនេះវិញ ហើយចាប់តាំងពីពេលនោះមកទាំងព្រះចៅអធិការវត្ត ទាំងអាជ្ញាធរក៏បានដាក់បម្រាមហាមមិនឲ្យបុគ្គលណាមួយធ្វើការបាញ់ប្រហារទៅលើសត្វជ្រឹងទាំងនេះជាដាច់ខាត ដោយទុកឲ្យភ្ញៀវទេសចរចូលមកទស្សនាកម្សាន្ត។

ចាប់តាំងពីពេលនោះមក ហ្វូងសត្វជ្រឹងរាប់រយរាប់ពាន់ក្បាលបានរស់នៅយ៉ាងសុខសាន្តនៅលើដើមជ្រេសដ៏ធំមួយ ដែលស្ថិតនៅខាងមុខវត្ត និងជាប់ដងស្ទឹងសង្កែក្បែរស្ពានបាឡេបាយដំរាំ ហើយក៏តែងមានភ្ញៀវទេសចរជាតិ និងអន្តរជាតិតាមរយៈមគ្គុទេសនាំចូលទៅទស្សនា និងថតរូបទុកជាអនុស្សាវរីយ៍សម្រាប់ហ្វូងសត្វជ្រឹងទាំងនេះផង។

រយៈពេលប្រមាណជាងមួយឆ្នាំកន្លងទៅនេះ រដ្ឋបាលស្រុកបាណន់បានរៀបចំទីតាំងខាងលើដោយឲ្យប្រជាពលរដ្ឋទៅលក់ដូរនៅផ្សារខាងក្រោយវត្តដោយទុកទីតាំងខាងលើនេះដើម្បីរៀបចំជាសួន និងសាលាឆទានទុកឲ្យភ្ញៀវទេសចរមកអង្គុយកម្សាន្ត និងទស្សនាហ្វូងសត្វជ្រឹងទាំងនេះ។ ប៉ុន្តែក្រោយពីបានចាក់ដីរៀបចំដាំដើមឈើ និងធ្វើសាលាឆទានរួចក៏ស្រាប់តែដើមជ្រេសដែលជាជម្រកសត្វជ្រឹងបានងាប់ដោយគ្មានមូលហេតុ ធ្វើឱ្យហ្វូងសត្វជ្រឹងបានផ្លាស់ប្ដូរទីជម្រកទៅរស់នៅតាមដើមគរចំនួនពីរដើមដែលនៅមិនឆ្ងាយពីដើមជ្រេសប៉ុន្មានឡើយ។ ហើយនៅទីស្នាក់អាស្រ័យថ្មីនេះ គឺកាន់តែឆ្ងាយពីភ្នែកទេសចរ រីឯសួនដែលរៀបចំឡើងដើម្បីទទួលស្វាគមន៍ភ្ញៀវទេសចរ គឺមានតែស្មៅដុះទ្រុបទ្រុលហាក់ដូចជាគ្មានអ្នកថែទាំទាល់តែសោះ បានធ្វើឲ្យតំបន់នេះស្ទើរតែប្រែក្លាយទៅជាទីរហោស្ថាន គឺមានតែស្មៅ ដើមជ្រេសក៏ងាប់ ទីជម្រកថ្មីរបស់សត្វជ្រឹងក៏កាន់តែឃ្លាតឆ្ងាយពីក្រសែភ្នែកភ្ញៀវទេសចរថែមទៀតផង ដូច្នេះហើយបានជាសព្វថ្ងៃ គឺលែងមានភ្ញៀវទេសចរជាតិឬអន្តរជាតិចូលទៅទស្សនាទៀតឡើយ ហើយគួរតែអាជ្ញាធរ ពិសេសគឺលោកមេឃុំដែលមានទីលំនៅនៅចំពីក្រោមដើមជ្រេសនោះគួរតែធ្វើយ៉ាងណារៀបចំសួនឲ្យមានសោភ័ណភាពឡើងវិញ មិនគួរណាបណ្ដែតបណ្ដោយទៅតាមយថាកម្មដូច្នេះនោះឡើយ ដែលជាហេតុធ្វើឲ្យបាត់អស់ភ្ញៀវទេសចរ៕

អត្ថបទ៖ សោ និយមរ័ត្ន