រដ្ឋបាលខេត្តកែប ត្រៀមបើកការដ្ឋានស្ថាបនាផ្លូវបេតុងជុំវិញភ្នំអង្កោលតូច ដើម្បីលើកកម្ពស់សោភ័ណភាព និងសក្តានុពលតំបន់ទេសចរណ៍

កាលពីថ្ងៃទី៩ ខែមីនា ឆ្នាំ២០២៦ លោក ហ៊ួរ មិថុនា អភិបាលរងខេត្តកែប បានចុះត្រួតពិនិត្យគម្រោងស្ថាបនាផ្លូវបេតុងនៅជុំវិញភ្នំអង្កោលតូច ដែលស្ថិតនៅក្នុងភូមិអង្កោល ឃុំអង្កោល ស្រុកដំណាក់ចង្អើរ ខណៈចាប់ផ្តើមបញ្ជូនគ្រឿងចក្រចូលអនុវត្តការងារគម្រោងជាផ្លូវការ បន្ទាប់ពីកិច្ចសម្របសម្រួលជាមួយប្រជាពលរដ្ឋនៅក្នុងតំបន់ត្រូវបានបញ្ចប់ដោយជោគជ័យ។

លោក ហ៊ួរ មិថុនា អភិបាលរងខេត្តកែប បានលើកឡើងថា រូបលោកដែលជាអ្នកទទួលបន្ទុកផ្ទាល់ បានជំរុញអាជ្ញាធរក្នុងមូលដ្ឋាន និងបានណែនាំយ៉ាងម៉ឺងម៉ាត់ដល់ក្រុមហ៊ុនម៉ៅការសាងសង់ផ្លូវ ត្រូវគោរពតាមបទដ្ឋានបច្ចេកទេស និងកិច្ចសន្យាឱ្យបានត្រឹមត្រូវក្នុងការស្ថាបនាផ្លូវឲ្យបានល្អបំផុត។

អភិបាលរងខេត្តកែប បានសង្កត់ធ្ងន់ថា គម្រោងធ្វើផ្លូវបេតុងនៅជុំវិញភ្នំអង្កោលតូចមួយនេះ ត្រូវមានគុណភាពផ្លូវ គឺជាអាទិភាពចម្បង ដើម្បីធានាឱ្យសំណង់នេះប្រើប្រាស់បានយូរអង្វែង បម្រើដល់ផលប្រយោជន៍ និងការធ្វើដំណើររបស់បងប្អូនប្រជាពលរដ្ឋ។

លោក​អភិបាលរងខេត្តកែបបានបញ្ជាក់ថា ការស្ថាបនាផ្លូវបេតុងជុំវិញភ្នំអង្កោលតូចនេះ មិនត្រឹមតែជួយសម្រួលដល់ការធ្វើដំណើររបស់ពលរដ្ឋក្នុងមូលដ្ឋានប៉ុណ្ណោះទេ ប៉ុន្តែក៏ជាផ្នែកមួយក្នុងការលើកកម្ពស់សោភ័ណភាព និងសក្តានុពលតំបន់ទេសចរណ៍នៅក្នុងស្រុកដំណាក់ចង្អើរ ឱ្យកាន់តែប្រសើរឡើងថែមទៀតផងដែរ៕

អត្ថបទ៖ សឹង រ៉ាត់