ក្រុមហ៊ុន PTT (ខេមបូឌា) ឆ្លើយតបនឹងគោលនយោបាយរដ្ឋាភិបាល ដោយផ្អាកនាំចូលប្រេងពីថៃ

ភ្នំពេញ ៖ នៅយប់ថ្ងៃទី៨ ខែតុលា ឆ្នាំ២០២៥ ក្រុមហ៊ុន ភីធីធី (ខេមបូឌា) បានចេញសេចក្តីជូនដំណឹងឲ្យដឹងថា ក្រុមហ៊ុនបានអនុវត្តតាមគោលនយោបាយ និងសេចក្តីប្រកាសព័ត៌មានរបស់រាជរដ្ឋាភិបាលកម្ពុជា យ៉ាងខ្ជាប់ខ្ជួន ដោយផ្អែកលើប្រសាសន៍ដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា កាលពីថ្ងៃទី២២ ខែមិថុនា ឆ្នាំ២០២៥ និងសេចក្តីជូនដំណឹងរបស់ អគ្គនាយកដ្ឋានគយ និងរដ្ឋាករកម្ពុជា កាលពីថ្ងៃទី១៦ ខែកក្កដា ឆ្នាំ២០២៥។

តាមសេចក្តីជូនដំណឹងនោះ ក្រុមហ៊ុនបានអនុវត្តន៍ការផ្អាកនាំចូលផលិតផលប្រេងឥន្ធនៈ និងឧស្ម័នឥន្ធនៈគ្រប់ប្រភេទពីប្រទេសថៃជាស្ថាពរ។ ក្រុមហ៊ុនបានបញ្ជាក់ថា ពេលនេះ មិនមានការនាំចូលប្រេងឥន្ធនៈ ឬឧស្ម័នឥន្ធនៈណាមួយ ដែលមានប្រភពមកពីប្រទេសថៃទៀតទេ។

ជំនួសវិញ ក្រុមហ៊ុន PTT (ខេមបូឌា) បានស្វែងរកនិងនាំចូលប្រេងឥន្ធនៈដែលមានគុណភាព និងសុវត្ថិភាពខ្ពស់ពីប្រទេសសិង្ហបុរី ដើម្បីបន្តផ្គត់ផ្គង់អតិថិជនក្នុងប្រទេសឲ្យបានធម្មតា។

ក្រុមហ៊ុនបានបញ្ជាក់ថា ខ្លួនជាក្រុមហ៊ុនដែលប្រតិបត្តិអាជីវកម្មស្របច្បាប់នៃព្រះរាជាណាចក្រកម្ពុជា មានការផ្តល់ឱកាសការងារ ដល់ប្រជាពលរដ្ឋជាច្រើន ហើយបានរួមចំណែកលើកកម្ពស់សហគមន៍ក្នុងវិស័យសង្គមសេដ្ឋកិច្ច។ ក្រុមហ៊ុនបានសហការផ្តល់ទីតាំងឲ្យកសិករ និងសិប្បករខ្មែរ ដើម្បីលក់ផលិតផលដោយឥតគិតថ្លៃ បើទោះជាយ៉ាងណា ក៏បានរួមចំណែកផ្តល់អាហាររូបករណ៍សម្រាប់សិស្សនិស្សិត និងឱកាសការងារដល់ជនពិការ ដើម្បីបង្កើនប្រាក់ចំណូលផងដែរ។

ចុងក្រោយនេះ ក្រុមហ៊ុនបានបញ្ជាក់ថា PTT (ខេមបូឌា) មិនពាក់ព័ន្ធនឹងបញ្ហានយោបាយ ឡើយ ហើយគ្មានបំណងអាក្រក់ណាមួយចំពោះអតិថិជននោះទេ៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត