PTT ចាប់ដៃជាមួយក្រុមហ៊ុនជប៉ុន លើគំនិតផ្ដួចផ្ដើមកាត់បន្ថយកាបូន

ក្រុមហ៊ុនថាមពលជាតិថៃ PTT Plc គ្រោង​សហការជាមួយក្រុមហ៊ុនជប៉ុនចំនួន២ លើគំនិតផ្តួចផ្តើមមួយដើម្បីកាត់បន្ថយការបំភាយឧស្ម័នកាបូនឌីអុកស៊ីត និងអភិវឌ្ឍស្តុកចំណីជីវសាស្រ្តសម្រាប់អាជីវកម្មគីមីឥន្ធនៈ។ នេះបើតាម​ការចុះផ្សាយរបស់កាសែតបាងកកប៉ុស្តិ៍។

អនុប្រធានប្រតិបត្តិជាន់ខ្ពស់របស់ PTT សម្រាប់គោលនយោបាយនិរន្តរភាព​ លោក Ratthakorn Kampanathsanyakorn បាន​ឱ្យដឹង​ថា ក្រុមហ៊ុនមានចំណាប់អារម្មណ៍ក្នុងការចាប់ដៃជាមួយ​ក្រុមហ៊ុនសាជីវកម្មអេឡិចត្រូនិកជប៉ុន Mitsubishi Heavy Industries ដើម្បីសិក្សាការប្រើប្រាស់អ៊ីដ្រូសែន​ជំនួសឥន្ធនៈហ្វូស៊ីល ក៏ដូចជាបច្ចេកវិទ្យានៃការចាប់យក​ និងស្តុកទុកកាបូន។

លោក​បន្តថា​ PTT ក៏កំពុងស្វែងរកឱកាស​ ដើម្បីធ្វើការជាមួយក្រុមហ៊ុនគីមីជប៉ុន​ Sunyo Petrochemical Industries លើការ​បង្កើត​វត្ថុធាតុដើម ដែលមិនប៉ះពាល់ដល់បរិស្ថាន។

កិច្ចសហប្រតិបត្តិការជាមួយក្រុមហ៊ុន Mitsubishi Heavy Industries ស្របតាមកិច្ចខិតខំប្រឹងប្រែងរបស់ PTT ដើម្បីរួមចំណែកក្នុងយុទ្ធនាការអន្តរជាតិ ប្រឆាំងនឹងការឡើងកំដៅផែនដី ជំរុញប្រយុទ្ធប្រឆាំងនឹង​ការប្រែប្រួលអាកាសធាតុ​។

លោក Ratthakorn និយាយថា​៖ «យើងមានគោលបំណងកាត់បន្ថយការបញ្ចេញកាបូនឌីអុកស៊ីត និងឧស្ម័នផ្ទះកញ្ចក់ ពីអាជីវកម្មក្រោមក្រុមហ៊ុន PTT ដើម្បីសម្រេចបាននូវអព្យាក្រឹត​កាបូន»។ ​ក្រុមហ៊ុនមាន​គោលដៅអព្យាក្រឹត​កាបូន ត្រឹមឆ្នាំ ២០៤០។

គួរគូសបញ្ជាក់ថា​ ក្រុមហ៊ុន Mitsubishi Heavy Industries កំពុងអភិវឌ្ឍបច្ចេកវិទ្យា ដែលនឹងអនុញ្ញាតឱ្យប្រតិបត្តិកររោងចក្រថាមពល ជំនួស​ឧស្ម័នធម្មជាតិក្នុងបរិមាណជាក់លាក់ ជាមួយនឹងអ៊ីដ្រូសែនវិញ ដើម្បីបង្កើតអគ្គិសនី។

លោក Tozawa Takashi អនុប្រធានក្រុមហ៊ុន Mitsubishi Heavy Industries សម្រាប់ប្រព័ន្ធថាមពលបាននិយាយថា អ៊ីដ្រូសែន​នឹងដើរតួយ៉ាងសំខាន់ក្នុងការកាត់បន្ថយការបញ្ចេញកាបូនឌីអុកស៊ីត ដែលនឹងនាំឱ្យមានតម្រូវការអ៊ីដ្រូសែនកាន់តែច្រើន នៅក្នុងទីផ្សារពិភពលោក។

ក្រៅពីនេះ លោក Ratthakorn បាននិយាយផងដែរ​ថា PTT ​ចង់ធ្វើការជាមួយក្រុមហ៊ុន​ Sunyo Petrochemical Industries ដែលមានបំណងផ្គត់ផ្គង់វត្ថុធាតុដើមថ្មី ដែលផលិតពីអំពៅ និងដំឡូងមីដល់រោងចក្រគីមីឥន្ធនៈនៅខេត្ត Rayong ភាគខាងកើត។

លោក Ratthakorn មានប្រសាសន៍ថា៖ «យើងទើបតែចាប់ផ្តើមពិភាក្សាអំពីគម្រោងកិច្ចសហប្រតិបត្តិការជាមួយក្រុមហ៊ុនជប៉ុន ដោយបើកផ្លូវឱ្យក្រុមហ៊ុន PTT សម្រេចបាននូវគោលដៅបរិស្ថាន»៕