ធនាគារពិភពលោកសន្យាជួយកម្ពុជាឱ្យឈាននូវការសម្រេចបានចក្ខុវិស័យឆ្នាំ២០៥០

ធនាគារពិភពលោកសន្យាបន្តចូលរួមជួយអភិវឌ្ឍកម្ពុជា ឈានទៅសម្រេចបានចក្ខុវិស័យកម្ពុជាឆ្នាំ២០៥០។ ការសន្យានេះ គឺបានលើកឡើងដោយអនុប្រធានធនាគារពិភពលោក លោកបណ្ឌិត Carlos Felipe Jaramillo នៅក្នុងជំនួបជាមួយសម្ដេចនាយករដ្ឋមន្ត្រីកម្ពុជា ក្នុងទីក្រុងគូឡាឡាំពួ។

លោកបណ្ឌិត Carlos Felipe Jaramillo អនុប្រធានធនាគារពិភពលោកទទួលបន្ទុកតំបន់អាស៊ីបូព៌ា និងប៉ាស៊ីហ្វិក បានវាយតម្លៃខ្ពស់ចំពោះកិច្ចសហប្រតិបត្តិការដ៏ល្អរវាងរាជរដ្ឋាភិបាលកម្ពុជា និងធនាគារពិភពលោក និងបានសម្តែងក្តីសង្ឃឹមយ៉ាងមុតមាំថា កិច្ចសហប្រតិបត្តិការនេះនឹងបន្តរីកចម្រើនបន្ថែមទៀត។

ពីជំនួបក្រៅកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ នៅម៉ាឡេស៊ី កាលពីថ្ងៃទី២៦ ខែតុលា ឆ្នាំ២០២៥ លោកបណ្ឌិត Carlos Felipe Jaramillo ក៏បានបង្ហាញបំណងចង់ស្វែងយល់បន្ថែមពីវិស័យអាទិភាពរបស់រាជរដ្ឋាភិបាលកម្ពុជា ក្នុងគោលដៅឈានទៅសម្រេចបាននូវចក្ខុវិស័យកម្ពុជាឆ្នាំ២០៥០។

អនុប្រធានធនាគារពិភពលោក បានកោតសរសើរ និងវាយតម្លៃខ្ពស់ចំពោះមាគ៌ាច្បាស់លាស់ប្រកបដោយមហិច្ឆតារបស់រាជរដ្ឋាភិបាលកម្ពុជា ក្នុងការឈានទៅសម្រេចបាននូវចក្ខុវិស័យកម្ពុជា ឆ្នាំ២០៥០ ខណ:ដែលពិភពលោកពោរពេញទៅដោយភាពមិនច្បាស់លាស់ និងបញ្ហាប្រឈម។ លោក បានគូសបញ្ជាក់ជាថ្មីថា ធនាគារពិភពលោកត្រៀមខ្លួនជានិច្ចដើម្បីបន្តសហការ និងចូលរួមជាមួយកម្ពុជា សំដៅជំរុញការសម្រេចទិសដៅរបស់កម្ពុជានាពេលអនាគត។

សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានគូសបញ្ជាក់ថា កម្ពុជាបានដាក់ចេញ និងកំពុងអនុវត្តនូវយុទ្ធសាស្ត្របញ្ចកោណ ដំណាក់កាលទី១ ដែលផ្ដោតសំខាន់ជាអាទិ៍ទៅលើវិស័យអប់រំ សម្រាប់អភិវឌ្ឍធនធានមនុស្សប្រកបដោយគុណភាព និងគុណវុឌ្ឍិគ្រប់គ្រាន់ សំដៅជំរុញផលិតភាពការងារ។

ចំពោះវិស័យហេដ្ឋារចនាសម្ព័ន្ធ សម្ដេចនាយករដ្ឋមន្ត្រី បញ្ជាក់ ក៏ជាវិស័យសំខាន់សម្រាប់បម្រើសកម្មភាពសេដ្ឋកិច្ច ជាពិសេសការលើកស្ទួយវិស័យដឹកជញ្ជូន និងភស្តុភារ។ ខណៈការធានាបាននូវការផ្គត់ផ្គង់ថាមពលកកើតឡើងវិញ ក៏ជាអាទិភាព ដែលបច្ចុប្បន្ន កម្ពុជាប្រើប្រាស់ប្រភពថាមពលកកើតឡើងវិញចំនួន ៦២% និងប្ដេជ្ញាចិត្តក្នុងការបង្កើនឱ្យបាន ៧០% នៅឆ្នាំ២០៣០។

បន្ថែមពីនេះ បច្ចេកវិទ្យា និងឌីជីថលូបនីយកម្ម ក៏ស្ថិតក្នុងយុទ្ធសាស្រ្តបញ្ចកោណរបស់រដ្ឋាភិបាលកម្ពុជា។ តាមសម្ដេចធិបតី បច្ចេកវិទ្យា និងឌីជីថលូបនីយកម្ម ដែលអនុញ្ញាតឱ្យកម្ពុជាអាចគ្រប់គ្រងបាននូវហានិភ័យ ក៏ដូចជាជំរុញសកម្មភាពសេដ្ឋកិច្ចឱ្យកាន់តែល្អប្រសើរជាមួយនឹងប្រសិទ្ធភាពខ្ពស់ ផលិតភាពខ្ពស់ និងគុណភាពខ្ពស់ ព្រមការការធានាបាននូវកំណើន និងការអភិវឌ្ឍប្រកបដោយចីរភាព៕