បង្រ្កាបទីតាំងសិប្បកម្មកែច្នៃឈើខុសច្បាប់ចំនួន៥តីតាំងនៅស្រុកត្បែងមានជ័យ

ព្រះវិហារ៖ ទីតាំងសិប្បកម្មកែច្នៃឈើខុសច្បាប់ចំនួន៥កន្លែងក្នុងភូមិពោធិ៍ ឃុំពោធិ៍ ស្រុកត្បែងមានជ័យ ខេត្តព្រះវិហារ ត្រូវបានសមត្ថកិច្ចជំនាញ ក្រោមការដឹកនាំបញ្ជាផ្ទាល់ពីតំណាងអយ្យការអមសាលាដំបូងខេត្តព្រះវិហារ ធ្វើការបង្ក្រាប និងដកហូតវត្ថុតាងមួយចំនួនធំ បញ្ជូនទៅចាត់ការទៅតាមច្បាប់

លោក មឿន សុភេទ ប្រធានមន្ទីរបរិស្ថានខេត្តព្រះវិហារ បានឲ្យដឹងថា នៅថ្ងៃទី២៨ ខែឧសភា ឆ្នាំ២០២៦ លោក និល វ៉ាន់ដេត ព្រះរាជអាជ្ញារងអមសាលាដំបូងខេត្តព្រះវិហារ បានដឹកនាំលោកប្រធានការិយាល័យ មន្រ្តីឧទ្យានុរក្សនៃដែនជម្រកសត្វព្រៃព្រះរកា-ឆែប ចំនួន ០៦នាក់ កងរាជអាវុធហត្ថ ចំនួន០២នាក់ នគរបាល ចំនួន ០២នាក់ សមាជិកក្រុមប្រឹក្សាឃុំពោធិ៍ ចំនួន ០១នាក់ កម្លាំងសរុប ចំនួន ១៤នាក់ ចុះត្រួតពិនិត្យ និងបង្រ្កាបទីតាំងកែច្នៃឈើដោយគ្មានលិខិតអនុញ្ញាត ចំនួន ០៥ទីតាំង ស្ថិតនៅក្នុងភូមិពោធិ៍ ឃុំពោធិ៍ ស្រុកត្បែងមានជ័យ ខេត្តព្រះវិហារ។

ជាលទ្ធផល កម្លាំងសមត្ថកិច្ចបានដកហូតម៉ាស៊ីនតាបឈូស, ម៉ូទ័រស្វាន, ម៉ូទ័រឈូស និងឈើល្មើសច្បាប់ ជាច្រើនម៉ែត្រគូបទៀត រួចបញ្ជូនទៅរក្សាទុកនៅស្នាក់ការបរិស្ថាន ដើម្បីចាត់ការទៅតាមច្បាប់

លោកសង្កត់ធ្ងន់ថា ទីតាំងសិប្បកម្មកែច្នៃឈើនៅកន្លែងណាក៏ដោយ ដែលគ្មានច្បាប់អនុញ្ញាតត្រឹមត្រូវ គឺត្រូវតែធ្វើការបង្រ្កាប៕

ដោយ៖ជុន កុសល