តុលាការរាជធានីសម្រេចផ្អាកសវនាការក្នុងអំឡុងពេលបិទខ្ទប់រាជធានីភ្នំពេញ

សាលាដំបូងរាជធានីភ្នំពេញបានសម្រេចផ្អាកការធ្វើសវនាការជាបណ្តោះអាសន្ន ក្នុងអំឡុងពេលបិទខ្ទប់រាជធានីភ្នំពេញដើម្បីទប់ស្កាត់ការឆ្លងរាលដាលនៃជំងឺកូវីដ១៩។

យោងតាមសេចក្តីជូនដំណឹងស្ដីពីការបំពេញការងាររបស់សាលាដំបូងរាជធានីភ្នំពេញ ក្នុងអំឡុងពេលបិទខ្ទប់រាជធានីភ្នំពេញ ដើម្បីទប់ស្កាត់ការឆ្លងរាលដាលនៃជំងឺកូវីដ១៩ បានឲ្យដឹងថា «យោងតាមសេចក្តីសម្រេចលេខ ៤៩សសរចុះថ្ងៃទី១៤ខែមេសាឆ្នាំ២០២១ ស្តីពីការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅខេត្តកណ្ដាល ដើម្បីទប់ស្កាត់ការឆ្លងរាលដាលនៃជំងឺកូវីដ១៩ ក្នុងអំឡុងពេលបិទខ្ទប់រាជធានីភ្នំពេញ ដែលបានកំណត់ចន្លោះពីថ្ងៃទី១៥ដល់ថ្ងៃទី២៨ ខែមេសា ឆ្នាំ២០២១ សាលាដំបូងរាជធានីភ្នំពេញសូមជូនដំណឹងដល់សាធារណជន មន្ត្រីទាំងអស់ និងភាគីពាក់ព័ន្ធឲ្យបាន​ជ្រាបថា រាល់កម្មវិធីសវនាការ និងកិច្ចនីតិវិធីផ្សេងទៀត ត្រូវបានលើកពេល»។ ប៉ុន្តែលើកលែងតែសំណុំរឿងមួយចំនួនដែលត្រូវការចាំបាច់ធ្វើកិច្ចនីតិវិធីតាមការពិនិត្យជាក់ស្ដែងដោយចៅក្រម។

ជាមួយគ្នានេះសាលាដំបូងរាជធានីភ្នំពេញនៅផ្ដល់ជូនសេវាចាំបាច់មួយចំនួនទៀតដោយចាត់តាំងឱ្យមានមន្ត្រីប្រចាំការទទួលបន្ទុកការងារ៕

អត្ថបទ ៖ សំអឿន