​ក្រសួងទេសចរណ៍អះអាងថា កម្ពុជា​នៅតែជា​គោលដៅ​ទេសចណ៍ ​សុវត្ថិភាព​

ក្រសួងទេសចរណ៍នៅថ្ងៃទី ១៩ ខែមករា ឆ្នាំ ២០២៦ ​បានប្រកាសថា ​កម្ពុជា ​នៅ​តែ​ជាគោលដៅ​ទេសចណ៍​សុវត្ថិភាព សន្តិសុខ និង​ស្ថិរភាព សម្រាប់ភ្ញៀវទេសចរជាតិ និងអន្តរជាតិ។

ការបំភ្លឺរបស់ក្រសួងទេសចរណ៍បានធ្វើឡើង ដើម្បីឆ្លើយតបចំពោះការណែនាំ និងការធ្វើដំណើរមកកម្ពុជាដោយ​ស្ថានតំណាងបរទេសមួយចំនួនប្រចាំកម្ពុជា។​

ក្រសួងទេសចណ៍បញ្ជាក់ថា ​ពាក់ព័ន្ធនឹងព័ត៌មាន និងការបង្ហាញផែនទីផ្សព្វផ្សាយ នាពេលកន្លងមក អាចបង្កឱ្យមានការភាន់ច្រឡំក្នុងចំណោមសាធារណជន និងភ្ញៀវទេសចរ ជាពិសេសភ្ញៀវទេសចរ​អន្តរ​ជាតិ អំពីស្ថានភាព ទូទៅនៃសុវត្ថិ​ភាព​​​​ទេសចរនៅកម្ពុជា ដោយការប្រុងប្រយ័ត្នខ្ពស់​ដែលបាន​លើកឡើង គឺមានលក្ខណៈកំណត់ នៅតាមតំបន់ព្រំដែនខ្លះៗប៉ុណ្ណោះ ប៉ុន្តែមិនអាចទាញ​ជាការ​សន្និដ្ឋាន​អំពីកត្តាសុខសុវត្ថិភាពទូទៅនៅទូទាំងព្រះរាជាណាចក្រកម្ពុជាបានទេ។ ​

​ក្រសួងបញ្ជាក់ថា ​តំបន់ទេសចរណ៍សំខាន់ៗ ដូចជារាជធានីភ្នំពេញ ខេត្តសៀមរាប ខេត្តព្រះសីហនុ និងគោលដៅទេសចរណ៍ផ្សេងៗទៀត នៅតែបន្តបើកដំណើរការធម្មតា និងទទួល​ស្វាគមន៍ភ្ញៀវទេសចរជាបន្តបន្ទាប់ ក្រោមការធានាសុវត្ថិភាពពី​សំណាក់​អាជ្ញាធរ។

​ក្រសួងទេសចរណ៍៖«កម្ពុជាតែងតែបើកចំហរក្នុងកិច្ចសហប្រតិបត្តិការ និងការផ្តល់ព័ត៌មានពាក់ព័ន្ធ​នឹងទេស​ចរណ៍ ​និងសភាពការណ៍ពិត ដើម្បីធានាបានថា ព័ត៌មានដែលបានផ្សព្វផ្សាយមានភាពត្រឹមត្រូវ តុល្យភាព និងគាំទ្រដល់ការសម្រេចចិត្តរបស់ភ្ញៀវទេសចរអន្តរជាតិអំពី​គម្រោងធ្វើ​ដំណើរ​មក​កាន់​ប្រទេសកម្ពុជាប្រកបដោយសុវត្ថិភាព»។

​ក្រសួងទេសចរណ៍ ​អំពាវនាវដល់សាធារណជន អង្គទូត បរទេសប្រចាំកម្ពុជា អ្នកសារព័ត៌មានជាតិ-អន្តរជាតិ ភ្ញៀវទេសចរ និងភាគីពាក់ព័ន្ធទាំងអស់ជ្រាប និងចូលរួមផ្សព្វផ្សាយប្រកបដោយ​ស្មារតី​ទទួលខុសត្រូវខ្ពស់៕

អត្ថបទ៖ ឡេង ដេត