សាលារៀន៥២ កន្លែងក្នុងខេត្តចំនួន៤បន្តផ្អាកការសិក្សាដោយសារការឈ្លានពានយោធាថៃមកលើកម្ពុជា

សាលារៀនចំនួន៥២កន្លែង ក្នុងខេត្តចំនួន៤ នៅបន្តបិទទ្វារមិនទាន់អាចដំណើរការសិក្សាបាននៅឡើយដោយសារការឈ្លានពានពីសំណាក់យោធាថៃមកលើបូរណភាពដែនដីកម្ពុជាដែលបានបង្ខំឱ្យសិស្សភៀសសឹកត្រូវរៀនតាមថ្នាក់រៀនបណ្តោះអាសន្ន រៀនតាមអនឡាញ ឬទៅសិក្សានៅតាមសាលានៅក្បែរជំរំស្នាក់នៅរបស់ពួកគេ។

លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជននិងកីឡា បានឱ្យដឹងនៅថ្ងៃទី៥ ខែកុម្ភៈនេះថា សាលារៀនចំនួ៥២ ដែលបន្តបិទទ្វារមិនទាន់អាចដំណើរការសិក្សាបានរួមមាននៅខេត្ត ឧត្តរមានជ័យ ព្រះវិហារ ពោធិ៍សាត់ និងខេត្តបន្ទាយមានជ័យ។ លោកស្រីបញ្ជាក់ថា ៖«សាលារៀនដែលមិនទាន់ដំណើរការឡើងវិញ ដោយសារសាលាទាំងនោះ រងការខូចខាតដោយសារសង្គ្រាម និងមានគ្រាប់យុទ្ធភណ្ឌមិនទាន់ផ្ទុះរាយប៉ាយបណ្តាលមកពីការឈ្លានពានរបស់យោធាថៃមកលើដែនអធិបតេយ្យកម្ពុជា»។

វិធានការចំពោះមុខ ក្នុងការដោះស្រាយការសិក្សាជូនកុមារ និងយុវជនភៀសសឹក ក្រសួងអប់រំ បានបង្កើតសាលារៀនបណ្តោះអាសន្ននៅតាមជំរំ និងរៀនតាមអនឡាញ ដែលនឹងជួយឱ្យពួកគេទទួលបានគុណភាពចំណេះដឹងដ៏ទំនើប និងសម្បូរបែបសម្រាប់ការសិក្សាស្រាវជ្រាវបន្ថែម។

បេសកកម្មនេះ មានគោលបំណងឆ្លើយតបបន្ទាន់ ដើម្បីធានាថាការសិក្សារបស់សិស្សានុសិស្សជាជនភៀសសឹកដែលរងផលប៉ះពាល់ពីជម្លោះព្រំដែន មិនត្រូវបានរអាក់រអួល ឬបោះបង់ចោលឡើយ។ លោកស្រីថា«ក្រសួងអប់រំបានរៀបចំឱ្យមានថ្នាក់រៀនបណ្តោះអាសន្ននៅតាមជំរំភៀសសឹកសម្រាប់កម្រិតមត្តេយ្យសិក្សា និងបឋមសិក្សា និងបានសម្រប សម្រួលឱ្យប្អូនៗភៀសសឹកចូលរៀនតាមសាលារៀនទូទាំងប្រទេសដែលប្អូនៗរស់នៅក្បែរ អាចធ្វើដំណើរទៅរៀនបាន»។

ដោយឡែកពាក់ព័ន្ធជនភៀសសឹកវិញ គិតត្រឹមព្រឹកថ្ងៃទី៤ ខែកុម្ភៈ ឆ្នាំ២០២៦ មានពលរដ្ឋភៀសសឹកចំនួន៦.២២១នាក់បន្ថែមទៀត បានបន្តវិលត្រឡប់ទៅលំនៅឋានវិញ។ ក្នុងចំណោមពលរដ្ឋភៀសសឹកសរុបជាង៦សែន៤ម៉ឺននាក់ មានជាង៥សែន៥ម៉ឺននាក់ ឬជិត៨៥% បានវិលត្រឡប់ទៅលំនៅឋានវិញហើយ។ មានពលរដ្ឋភៀសសឹកចំនួន៩៧.៨៧៨នាក់ទៀត កំពុងបន្តស្នាក់អាស្រ័យតាមជំរំនានា៕

អត្ថបទ៖ សំអឿន