ព័ត៌មានជាតិ

ឯកសារវិនិច្ឆ័យការចុះបញ្ជីដីធ្លីជាប្រព័ន្ធ ជាង ១ ម៉ឺនក្បាលដី បានប្រកាសបិទផ្សាយជាសាធារណៈ នៅស្រុកសូទ្រនិគម

បានផុស

៥ ខែ មុន

នៅ

ថ្ងៃសុក្រ ៦ កុម្ភៈ ២០២៦

ដោយ

កាលពីព្រឹកថ្ងៃទី ៦ ខែកុម្ភៈ ឆ្នាំ ២០២៦ នេះ ឯកសារវិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធចំនួន ១៤ ៧៨០ ក្បាលដី ស្ថិតក្នុងឃុំតាយ៉ែក ស្រុកសូទ្រនិគម ខេត្តសៀមរាប ត្រូវបានមន្ទីររៀបចំដែនដីខេត្ត សហការជាមួយរដ្ឋបាលស្រុក បិទផ្សាយជាសាធារណៈ ដើម្បីឱ្យប្រជាពលរដ្ឋ និងអ្នកកាន់កាប់ ឬម្ចាស់ក្បាលដី ធ្វើការពិនិត្យផ្ទៀងផ្ទាត់មុននឹងឈានដល់ការទទួលបានបណ្ណកម្មសិទ្ធិសម្គាល់ម្ចាស់អចលនទ្រព្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហ៊ី សាយ ប្រធានមន្ទីររៀបចំដែនដីខេត្ត បានបញ្ជាក់ថា ក្បាលដីដែលបិទផ្សាយនាពេលនេះ ស្ថិតក្នុងភូមិបឹងង៉ត ភូមិដាក់ផ្កា ភូមិត្រាវបាក់ ភូមិផ្ការំចេក ភូមិចំប៉ី ភូមិប៉ោយស្មាច់ ភូមិប្រវ៉ាល ភូមិបឹងវៀន និងភូមិតាយ៉ែក នៃឃុំតាយ៉ែក។ ការបិទផ្សាយនេះ មានរយៈពេល ១៥ ថ្ងៃ ដោយគិតចាប់ពីថ្ងៃទី ៦ ដល់ទី ២០ ខែកុម្ភៈ ឆ្នាំ ២០២៦ ក្នុងបរិវេណវត្តវត្តតាយ៉ែកឯករង្សី ដើម្បីឱ្យម្ចាស់ដី ឬអ្នកកាន់កាប់ដី ព្រមទាំងស្ថាប័ន និងអង្គភាពពាក់ព័ន្ធ ចូលរួមពិនិត្យផ្ទៀងផ្ទាត់មើលទិន្នន័យឱ្យបានគ្រប់ៗ គ្នា ធានាបាននូវភាពសុក្រឹតត្រឹមត្រូវក្នុងការចេញវិញ្ញាបនបត្រសម្គាល់ម្ចាស់អចលនវត្ថុជូន។

លោក ហ៊ី សាយ ក៏បានសំណូមពរដល់ម្ចាស់ក្បាលដី និងអ្នកកាន់កាប់ដី ព្រមទាំងអ្នកពាក់ព័ន្ធ សូមពិនិត្យផ្ទៀងផ្ទាត់ទិន្នន័យក្បាលដីរបស់ខ្លួនឱ្យបានគ្រប់ៗ គ្នា ទៅលើឈ្មោះម្ចាស់ដី សាវតារ ទំហំដី ប្រភេទទ្រព្យ ព្រោះនេះជាឱកាសចុងក្រោយដែលអ្នកពាក់ព័ន្ធទាំងអស់មានសិទ្ធិធ្វើការកែតម្រូវ ឬជំទាស់តវ៉ា ចំពោះករណីមានកំហុសឆ្គង សូមប្រជាពលរដ្ឋប្រាប់ទៅមន្ត្រីជំនាញប្រចាំការនៅទីនោះ ដើម្បីឱ្យពួកគាត់ធ្វើការពិនិត្យ និងកែតម្រូវជូន សំដៅធានាបាននូវភាពត្រឹមត្រូវទាំងលក្ខណៈបច្ចេកទេស និងលក្ខណៈច្បាប់។

លោក គឹម វណ្ណៈ អភិបាលស្រុកសូទ្រនិគម មានប្រសាសន៍ថា ការចុះបញ្ជីដីមានលក្ខណៈជាប្រព័ន្ធ ធ្វើឡើងដើម្បីផ្តល់បណ្ណកម្មសិទ្ធិជូនប្រជាពលរដ្ឋដែលជាម្ចាស់ដី ឬអ្នកកាន់កាប់ដី ដើម្បីយកទៅប្រើប្រាស់ក្នុងតម្រូវការផ្សេងៗ។ មុននឹងឈានទៅចេញបណ្ណកម្មសិទ្ធិជូនប្រជាពលរដ្ឋដែលជាម្ចាស់ដី ឬអ្នកកាន់កាប់ដី តាមនីតិវិធីតម្រូវឱ្យមានការបិទផ្សាយជាសាធារណៈនូវឯកសារវិនិច្ឆ័យការចុះបញ្ជីដីធ្លីមានលក្ខណៈជាប្រព័ន្ធ ដើម្បីផ្ទៀងផ្ទាត់ ធ្វើការកែតម្រូវ ឬជំទាស់តវ៉ា បើពួកគាត់ពិនិត្យឃើញថា មានចំណុចខុសឆ្គង។

លោកអភិបាលស្រុក ក៏បានសំណូមពរដល់ម្ចាស់ក្បាលដី និងអ្នកកាន់កាប់ដី សូមរួសរាន់ចូលរួមពិនិត្យ ផ្ទៀងផ្ទាត់ ឱ្យបានគ្រប់គ្នា ដើម្បីធានាបាននូវភាពត្រឹមត្រូវ ច្បាស់លាស់ គ្មានកំហុសឆ្គង ព្រោះវាជាឱកាសចុងក្រោយ ដែលម្ចាស់ក្បាលដីអាចមានសិទ្ធិពិនិត្យតវ៉ា បើអាក់ខាន ឬយឺតយ៉ាវ នឹងនាំឱ្យបាត់បង់ផលប្រយោជន៍របស់ប្រជាពលរដ្ឋ៕

អត្ថបទ ៖ គឿនវេត