រដ្ឋបាលខេត្តបាត់ដំបង ប្រាប់ឱ្យប្រុងប្រយ័ត្នក្នុងការអុជធូបទៀន ក្រដាសសែន នាឱកាសបុណ្យចូលឆ្នាំចិនខាងមុខ

រដ្ឋបាលខេត្តបាត់ដំបង បានណែនាំឱ្យមានការប្រុងប្រយ័ត្នខ្ពស់ចំពោះការអុជធូបទៀន ក្រដាសសែន ភ្លើងចង្ក្រាន ចរន្តអគ្គិសនី ដែលអាចបង្កឱ្យមានគ្រោះថ្នាក់ ជាយថាហេតុ នាឱកាសបុណ្យចូលឆ្នាំប្រពៃណីចិន និងវៀតណាម ដែលនឹងឈានចូលមកដល់ក្នុងពេលឆាប់ៗខាងមុខនេះ។

តាមរយៈសេចក្តីណែនាំ ចុះថ្ងៃទី១០ ខែកុម្ភៈ រដ្ឋបាលខេត្តបាត់ដំបង បានណែនាំដល់បណ្តាគ្រឹះស្ថានសាធារណៈ រោងចក្រ សហគ្រាស ក្រុមហ៊ុន លំនៅដ្ឋាន និងគ្រប់ទីកន្លែង កំសាន្តនានា ត្រូវរក្សានូវសន្តិសុខ សុវត្ថិភាព សណ្ដាប់ធ្នាប់សាធារណៈ និងមានការប្រុងប្រយ័ត្ន ខ្ពស់ក្នុងការអុជធូបទៀន ក្រដាសសែន ភ្លើងចង្ក្រាន ចរន្តអគ្គិសនី ដែលអាចបង្កឱ្យមានគ្រោះថ្នាក់ ជាយថាហេតុ និងហាមមិនឱ្យមានការដុតផាវ កាំជ្រួច ឬបង្កជាសម្លេងរំខាន ព្រមទាំងការលេងល្បែងស៊ីសងគ្រប់រូបភាព។

ការហាមឃាត់នេះ គឺដើម្បីរក្សាបាននូវសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ ក្នុងខេត្តបាត់ដំបង នាឱកាសបុណ្យចូលឆ្នាំប្រពៃណីចិន និងវៀតណាម ដែលនឹងប្រព្រឹត្តទៅចាប់ពីថ្ងៃទី១៦ ដល់ថ្ងៃទី១៩ ខែកុម្ភៈ ឆ្នាំ២០២៦៕