រដ្ឋបាលខេត្តបាត់ដំបង នឹងរៀបចំ «ព្រឹត្តិការណ៍ផ្លែឈើបាត់ដំបង ២០២៦» រយៈពេល១០ថ្ងៃ នាខែកក្កដា ខាងមុខ

«ព្រឹត្តិការណ៍ផ្លែឈើបាត់ដំបង ២០២៦» (Battambang Fruits Event 2026) របស់រដ្ឋបាលខេត្តបាត់ដំបង នឹងរៀបចំឡើង រយៈពេល១០ថ្ងៃ ចាប់ផ្ដើមពីថ្ងៃទី១០ ដល់ថ្ងៃទី១៩ ខែកក្កដា ឆ្នាំ២០២៦។

តាមរយៈទំព័រហ្វេសប៊ុករបស់រដ្ឋបាលខេត្តបាត់ដំបង បានឱ្យដឹងថា ក្នុង«ព្រឹត្តិការណ៍ផ្លែឈើបាត់ដំបង ២០២៦» នេះ រដ្ឋបាលខេត្ត ក៏បានរៀបចំឱ្យមាន កម្មវិធីប៊ូហ្វេទុរេន រយៈពេល០៣ថ្ងៃ គឺថ្ងៃទី១០-១១-១២ ខែកក្កដា ឆ្នាំ២០២៦ ដើម្បីឱ្យប្រជាពលរដ្ឋមានឱកាសទទួលទានទុរេនដ៏មានឱជារសផ្អែមឆ្ងាញ់ ជាទុរេនមានប្រភពច្បាស់លាស់មកពីចំការរបស់អ្នកបាត់ដំបងផ្ទាល់១០០% ព្រមទាំងផ្លែឈើជាច្រើនមុខទៀតផងដែរ។

ក្នុងព្រឹត្តិការនេះ ប្រជាពលរដ្ឋ អាចពិសាទុរេន និងផ្លែឈើបាត់ដំបងជាច្រើនប្រភេទដោយឥតកំណត់ ដែលមានរយៈពេល ៨០នាទី ចាប់ពីម៉ោង ៥:០០នាទីល្ងាចតទៅ នៅក្នុងរោងម៉ាស៊ីនត្រជាក់ប្រកបដោយផាសុកភាព ព្រមទាំងមានភ្លេងខ្មែរប្រគំកំដរផងដែរ។

សម្រាប់តម្លៃចូលរួម ចំពោះកុមារកម្ពស់ក្រោម ១.២ម៉ែត្រ តម្លៃ ៣០,០០០រៀល ចំណែកមនុស្សធំ តម្លៃ ៥០,០០០រៀល។ ក្នុងកម្មវិធីប៊ូហ្វេទុរេននេះ លោកអ្នកអាចពិសាទឹកបរិសុទ្ធដោយឥតគិតថ្លៃ៕