អាជ្ញាធររតនគិរីរឹតបន្តឹងកម្លាំងឈរជើងព្រំប្រទល់ខេត្តទ្វេដង

លោក ថង សាវុន អភិបាលខេត្តរតនគិរីបានឲ្យដឹងថា រាល់កម្លាំងឈរជើងរវាងខេត្តនិងខេត្ត ត្រូវអនុវត្តរឹតបន្តឹងឲ្យបានទ្វេដង គិតចាប់ពីថ្ងៃនេះតទៅរយ:ពេល១សប្តាហ៍ ដើម្បីទប់ស្កាត់ការឆ្លងរីករាលដាលកូវីដ-១៩ចូលក្នុងសហគមន៍ឲ្យមានប្រសិទ្ធភាព។
ការថ្លែងបែបនេះរបស់លោក ថង សាវុន អភិបាលខេត្តរតនគិរី​ក្នុងឱកាសដែលលោកបានដឹកនាំកម្លាំងចុះពិនិត្យតាមគោលដៅឈរជើងកម្លាំងចម្រុះរបស់ខេត្តរតនគិរីនិងខេត្តមណ្ឌលគិរីត្រង់ចំណុចអូរវាក់ ក្នុងភូមិជ័យឧត្តម ឃុំជ័យឧត្តម ស្រុកលំផាត់។

ក្នុងឱកាសនោះ លោកក៏បានលើកឡើងថាក្រោយពីបានទទួលដំណឹងនៅខេត្តមណ្ឌលគិរីមានស្ត្រីម្នាក់វិជ្ជមានកូវីដ-១៩ នៅក្នុងក្រុងសែនមនោរម្យ លោកបានផ្ដាំផ្ញើទៅដល់កម្លាំងឈរជើងឲ្យរឹតបន្តឹងឲ្យបានទ្វេដងចាប់ពីថ្ងៃនេះតទៅរយ:​ពេល១​សប្តាហ៍។

ហើយចំពោះរថយន្តដឹកទំនិញចេញចូលនិងរថយន្តដឹកអ្នកដំណើរឬគ្រប់ក្រុមហ៊ុនដែលឆ្លងកាត់ខេត្តមណ្ឌលគិរីមិនបានត្រូវអនុញ្ញាតឲ្យចូលក្នុងខេត្តរតនគិរីនោះទេ បើទំនិញ ត្រូវយករថយន្តមកសាងត្រង់ចំណុចកម្លាំងឈរជើងព្រំប្រទល់ខេត្តនិងខេត្ត។

លោកអភិបាលខេត្តក៏ថ្លែងឲ្យកម្លាំងឈរជើងទាំងអស់មិនត្រឹមតែត្រួតពិនិត្យតាមផ្លូវគោកនោះទេ រួមទាំងផ្លូវទឹកផងដោយខេត្តរតនគិរីនិងខេត្តមណ្ឌលគិរីមានព្រំប្រទល់ខណ្ឌដោយទន្លេហើយចំពោះការឆ្លងរបស់បងប្អូនប្រជាពលរដ្ឋដែលសម្រុក​ចូលគឺតែងតែមានឆ្លៀតឱកាសគ្រប់ច្រកល្ហកទាំងអស់៕

អត្ថបទ៖វុទ្ធឦសាន