ព័ត៌មានជាតិ

កាត់បន្ថយនាំចូលត្រី ១ ០០០ តោនមួយថ្ងៃ ក្រុមហ៊ុន ម៉ុង ឫទ្ធី ពង្រីកអភិវឌ្ឍវារីវប្បកម្មចិញ្ចឹមត្រីបន្ថែម ដើម្បីបង្កើតតម្លៃសេដ្ឋកិច្ចក្នុងស្រុក

បានផុស

៣ ខែ មុន

នៅ

ថ្ងៃសៅរ៍ ២៨ កុម្ភៈ ២០២៦

ដោយ

ក្រុមហ៊ុន ម៉ុង ឫទ្ធី បានចាប់ផ្តើមគម្រោងពង្រីកវិស័យវារីវប្បកម្មចិញ្ចឹមត្រី ដើម្បីកាត់បន្ថយការនាំចូលត្រីពីបរទេស និងបង្កើនតម្លៃសេដ្ឋកិច្ចក្នុងស្រុកបន្ថែម។

បច្ចុប្បន្នក្រុមហ៊ុន បានរៀបចំហេដ្ឋារចនាសម្ព័ន្ធស្រះចិញ្ចឹមត្រីចំនួន ៣៧ ស្រះ ដែលកំពុងចិញ្ចឹមប្រភេទត្រីប្រា និងត្រីទីឡាបព្យារួមនឹងត្រីផ្សេងៗទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក លី ឡាវីល នាយកចាត់ការទូទៅផ្នែកចិញ្ចឹមសត្វរបស់ក្រុមហ៊ុន ម៉ុង ឫទ្ធី បានឲ្យដឹងថា គម្រោងនេះគឺដើម្បីជំរុញវិស័យចិញ្ចឹមសត្វទឹកនៅកម្ពុជាឱ្យមានភាពរីកចម្រើន។

លោកថា គោលដៅចម្បងគឺកាត់បន្ថយការនាំចូលត្រីពីបរទេស និងពង្រឹងសមត្ថភាពផលិតនៅក្នុងស្រុកដោយខ្លួនឯង។

បច្ចុប្បន្ន កម្ពុជាមានតម្រូវការផ្គត់ផ្គង់ត្រីប្រហែល ៨០០ ទៅ ១០០០ តោនក្នុងមួយថ្ងៃ។ ប្រសិនបើអាចផលិតក្នុងស្រុកបាន វានឹងជួយពង្រីកផ្ទៃដីដាំដុះ ពោត ដំឡូង និងឧស្សាហកម្មម៉ាស៊ីនស្រូវ សម្រាប់យកមកធ្វើជាចំណីត្រី។

លោក លី ឡាវីល គូសបញ្ជាក់ដូច្នេះថា «ប្រសិនបើយើងផលិតក្នុងស្រុកបាន វានឹងជួយពង្រីកទីផ្សារកសិផល ដូចជា ពោត ដំឡូង និងឧស្សាហកម្មម៉ាស៊ីនកិនស្រូវបានបន្ថែមរហូតដល់ ៣០ ម៉ឺនតោន ពោលនេះសម្រាប់តែវិស័យត្រីមួយប៉ុណ្ណោះ ខណៈការនាំចូលត្រី ១ ០០០ តោនពីបរទេស ស្មើនឹងការបាត់បង់ឱកាសប្រើប្រាស់ចំណីប្រហែល ១ ៥០០ តោនក្នុងមួយថ្ងៃ ដែលយើងគួរតែផលិតបានក្នុងស្រុក»។

គម្រោងពង្រីកវិស័យវារីវប្បកម្មចិញ្ចឹមត្រីរបស់ក្រុមហ៊ុន ម៉ុង ឫទ្ធី បានចាប់ផ្ដើមអនុវត្តនៅក្នុងឆ្នាំនេះ ដើម្បីប្រែក្លាយកម្ពុជាឱ្យមានសមត្ថភាពផ្គត់ផ្គង់ត្រីដោយខ្លួនឯង និងលើកកម្ពស់ជីវភាពកសិករ។

បើតាមលោក លី ឡាវីល គោលដៅទៅថ្ងៃអនាគតរបស់ក្រុមហ៊ុនគឺការបង្កើតស្ថានីយភ្ញាស់ និងបង្កាត់ពូជត្រីដូនតាដើម្បីផលិតពូជត្រីដែលមានគុណភាពល្អសម្រាប់ចែកចាយដល់កសិករទូទាំងប្រទេស៕