ពលរដ្ឋថា អាចទទួលយកបាននូវតម្លៃប្រេងសាំង ដែលម្ចាស់ស្ថានីយលក់ក្នុងតម្លៃក្រសួងកំណត់

ប្រជាពលរដ្ឋដែលជាអ្នកធ្វើការ និងអ្នកប្រកបអាជីវកម្មរត់រថយន្តឈ្នួល ទទួលយកបានចំពោះទីតាំងស្ថានីយប្រេងឥន្ធនៈទាំងឡាយណាដែលលក់សាំងក្នុងតម្លៃដែលក្រសួងបានកំណត់ ជៀសវាងការកេងប្រវ័ញ្ចតាមរយៈការដំឡើងថ្លៃដែលធ្វើឲ្យប៉ះពាល់ដល់ជីវភាពប្រជាពលរដ្ឋក្នុងកាលៈទេសៈដែលបច្ចុប្បន្ននេះ បណ្តាប្រទេសទាំងអស់នៅលើសកលលោក កំពុងទទួលរងវិបត្តិសេដ្ឋកិច្ច ដោយសារឥទ្ធិពលពីសង្គ្រាមនៅបណ្តាប្រទេសមួយចំនួនលើសកលលោក ។

គិតត្រឹមថ្ងៃទី០៩ ខែមីនា ឆ្នាំ២០២៦នេះ ស្ថានីយ៍ប្រេងឥន្ទនៈជាច្រើនក្នុងរាជធានីភ្នំពេញ បានចូលរួមគោរពតាមការជូនដំណឹងរបស់ក្រសួងពាណិជ្ជកម្ម ដោយបានដាក់តម្លៃលក់ស្របតាមការណែនាំនៅលើផ្លាកតម្លៃរបស់ខ្លួន លើកលែងតែសាំងស៊ុបព័រ និងហ្គាសប៉ុណ្ណោះ ដែលអាចមានតម្លៃខុសៗពីគ្នា ព្រោះពីរប្រភេទនេះ ពុំមានកំណត់ក្នុងសេចក្តីជូនដំណឹងរបស់ក្រសួងពាណិជ្ជកម្ម។

លោកស្រី ដោ សម្ផស្ស នាយិការងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ បានឲ្យដឹងថា រដ្ឋបាលរាជធានី ភ្នំពេញបានតាមដានយ៉ាងយកចិត្តទុកដាក់នូវប្រក្រតីភាពតម្លៃប្រេងឥន្ឋនៈ នៅក្នុងភូមិសាស្រ្តរាជធានីភ្នំពេញ។

កាលពីថ្ងៃទី០៨ ខែមីនា ឆ្នាំ២០២៦ ក្រសួងពាណិជ្ជកម្ម បានចេញសេចក្តីជូនដំណឹងស្តីពីការលក់រាយប្រេងឥន្ទនៈនៅតាមស្ថានីយ៍ សម្រាប់ការអនុវត្តចាប់ពីថ្ងៃទី៨ ដល់ថ្ងៃទី១០ ខែមីនា ឆ្នាំ២០២៦ ដោយកំណត់សាំងធម្មតាលក់ក្នុងតម្លៃ ៤,៤០០រៀល/លីត្រ និង ៥,១៥០រៀល/លីត្រ សម្រាប់ប្រេងម៉ាស៊ូត ៕

អត្ថបទ៖ សុភា