ក្រសួងការងារ នឹងបើកកិច្ចប្រជុំជាមួយតំណាងនិយោជក និងសហជីពនៅរសៀលថ្ងៃនេះដើម្បីដោះស្រាយផលលំបាករបស់កម្មករដែលកើតចេញពីការកើនឡើងតម្លៃប្រេង

ក្រសួងការងារ និងបណ្តុះបណ្តាលវិជ្ជាជីវៈ នឹងបើកកិច្ចប្រជុំបន្ទាន់មួយជាមួយតំណាងនិយោជក និងសហជីពនៅរសៀលថ្ងៃទី២០ ខែមីនា ឆ្នាំ២០២៦នេះ ដើម្បីដោះស្រាយផលលំបាករបស់កម្មករដែលកើតចេញពីការកើនឡើងតម្លៃប្រេងជាសកលថ្មីៗនេះ។

ការបើកកិច្ចប្រជុំបន្ទាន់នេះ បានធ្វើឡើងបន្ទាប់ពីសម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា នៅយប់ថ្ងៃទី១៩ ខែមីនា ឆ្នាំ២០២៦ បានដាក់បញ្ជាឱ្យរដ្ឋមន្រ្ដីក្រសួងការងារ ប្រជុំជាមួយតំណាងនិយោជក និងសហជីព ដើម្បីដោះស្រាយផលលំបាករបស់កម្មករដែលកើតចេញពីការកើនឡើងតម្លៃប្រេងឱ្យបានឆាប់បំផុត។

លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍នៅព្រឹកថ្ងៃទី២០មីនានេះថា បន្ទាប់ពីសម្តេចនាយករដ្ឋមន្ត្រីបានចេញសារភ្លាម លោករដ្ឋមន្ត្រី និងក្រុមការងារបានធ្វើការងារភ្លាមតែម្តងដោយនឹងបើកកិច្ចប្រជុំជាមួយភាគីពាក់ព័ន្ធទាំងអស់នៅរសៀលថ្ងៃទី២០មីនានេះ ដើម្បីពិភក្សា និងរកវិធីដោះស្រាយសម្រាប់​បងប្អូនកម្មករកម្មការិនីតាមបទបញ្ជារបស់សម្តេចនាយករដ្ឋមន្ត្រី។

លោកបានបន្តថា តាមរយៈសាររបស់សម្តេចនាយករដ្ឋមន្ត្រីបង្ហាញពីការយកចិត្តទុកដាក់គ្រប់ជ្រុងជ្រោយទៅលើសុខទុក្ខរបស់របស់បងប្អូនកម្មករកម្មកការិនីក្នុងកាលៈទេសៈដែលតម្លៃប្រេងមានការកើនឡើងជាសកលដែលប្រទេសណាក៏ជួបប្រទះដែរ ហើយការយកចិត្តទុកដាក់នេះ គឺជាសំណាងរបស់បងប្អូនកម្មករកម្មកការិនីរបស់យើង។

កាលពីយប់ថ្ងៃទី១៩ ខែមីនា ឆ្នាំ២០២៦ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានសរសេរសារបញ្ជាឱ្យរដ្ឋមន្រ្ដីក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ ប្រជុំជាមួយតំណាងនិយោជក និងសហជីពដើម្បីពិនិត្យដោះស្រាយផលវិបាកដែលកើតចេញពីការកើនឡើងតម្លៃប្រេងឥន្ធនៈជាសកលនាពេលថ្មីៗនេះ។ សម្ដេចធិបតី នាយករដ្ឋមន្រ្ដីបានសរសេរថា «ដើម្បីពិនិត្យដោះស្រាយផលវិបាកដែលកើតចេញពីការកើនឡើងតម្លៃប្រេងឥន្ធនៈជាសកលនាពេលថ្មីៗនេះ ខ្ញុំបានណែនាំឱ្យឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ រៀបចំកិច្ចប្រជុំជាមួយតំណាងភាគីនិយោជក និងភាគីសហជីព ដែលតំណាងបងប្អូនកម្មករនិយោជិត ដើម្បីពិនិត្យពិភាក្សាស្វែងរកលទ្ធភាពជួយសម្រាលបន្ទុកចំណាយថ្លៃធ្វើដំណើររបស់បងប្អូនកម្មករនិយោជិតយើង នៅក្នុងរយៈពេលអន្តរកាលនេះ ឱ្យបានឆាប់បំផុត»។

សម្ដេចធិបតីបានសរសេរទៀតថា «ខ្ញុំសង្ឃឹមថា ភាគីនិយោជក និងភាគីសហជីព នឹងអាចរកបាននូវចំណុចប្រសព្វសមរម្យមួយ ដែលអាចជួយសម្រាលបន្ទុកថ្លៃធ្វើដំណើររបស់បងប្អូនកម្មករផង និងអាចរក្សាបាននូវភាពប្រកួតប្រជែងនៃឧស្សាហកម្មរបស់យើងផង»៕

អត្ថបទ៖ សំអឿន