ព័ត៌មានជាតិ

ផ្សោតខេត្តស្ទឹងត្រែង និងខេត្តក្រចេះរស់នៅដាច់ស្រឡះពីគ្នា ទោះបីស្ថិតក្នុងខ្សែទឹកទន្លេតែមួយ

បានផុស

៤ ខែ មុន

នៅ

ថ្ងៃព្រហស្បតិ៍ ២៦ មីនា ២០២៦

ដោយ

«ផ្សោតនៅខេត្តស្ទឹងត្រែងនិងខេត្តក្រចេះ បែងចែកការរស់នៅដាច់ស្រឡះពីគ្នា ទោះបីស្ថិតនៅក្នុងខ្សែទឹកទន្លេតែមួយក៏ដោយ។ ពួកវាមិនព្រមរស់នៅលាយឡំគ្នាឡើយ ដោយផ្សោតស្ទឹងត្រែងមិនចុះទៅក្រចេះ ហើយផ្សោតក្រចេះក៏មិនឡើងមកស្ទឹងត្រែងដែរ»។ នេះបើតាមលោក សរ សុពុត្រា អភិបាលខេត្តស្ទឹងត្រែង។

ឆ្លើយតបសំនួររបស់អ្នកសារព័ត៌មានពីវត្តមានផ្សោត នៅក្នុងដំណើរទស្សនកិច្ចផ្សព្វផ្សាយពីសក្តានុពលខេត្តស្ទឹងត្រែង លោក សរ សុពុត្រាបានបញ្ជាក់ថា «ផ្សោតនេះដូចបែងចែកតំបន់គ្នារស់នៅ។ ផ្សោតខេត្តស្ទឹងត្រែងមិនទៅរស់នៅក្នុងទឹកដីខេត្តក្រចេះគឺរស់នៅដាច់ស្រលះពីគ្នា»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សរ សុពុត្រា អភិបាលខេត្តស្ទឹងត្រែង

កាលពីចុងឆ្នាំ ២០២៤ មានកូនផ្សោតមួយក្បាលបានកើតនៅក្នុងទឹកដីខេត្តស្ទឹងត្រែង។ ដោយឡែកកាលពីថ្ងៃទី ២១ ខែមីនា ឆ្នាំ២០២៦ កូនផ្សោតកើតថ្មីក៏ត្រូវបានក្រុមការងារស្រាវជ្រាវរួមគ្នារវាងខណ្ឌរដ្ឋបាលជលផល និងអង្គការ WWF ប្រទះឃើញនៅចំណុចអន្លង់កោះសន្ទក់ ក្នុងឃុំកោះស្រឡាយ ស្រុកសៀមបូក ខេត្តស្ទឹងត្រែង។ នេះគឺជាកូនផ្សោតដំបូងបង្អស់សម្រាប់ខេត្តស្ទឹងត្រែង និងជាកូនផ្សោតទី៤ សម្រាប់ទូទាំងប្រទេសគិតចាប់តាំងពីដើមឆ្នាំ២០២៦ មក។

លោក សរ សុពុត្រា គូសបញ្ជាក់ថា ទោះបីជាក្នុងខេត្តស្ទឹងត្រែងចំនួនផ្សោតសរុបមិនមានការកើនឡើងខ្លាំង ប៉ុន្តែក៏មិនមានការបាត់បង់ដែរ។

វត្តមានរបស់សត្វផ្សោតគឺជាសញ្ញាបញ្ជាក់ថា ទឹកទន្លេនៅតំបន់នោះមានសុខភាពនិងគុណភាពល្អ។ ប្រសិនបើទឹកទន្លេខូចគុណភាព ផ្សោតមិនអាចរស់នៅបានឡើយ ដូចជាករណីនៅប្រទេសជិតខាងដែលបានបាត់បង់សត្វផ្សោតអស់។

ពាក់ព័ន្ធការងារអភិរក្សសត្វដ៏កម្រនេះ អភិបាលខេត្តស្ទឹងត្រែងបានបញ្ជាក់ថា នៅក្នុងភូមិសាស្រ្តទឹកដីខេត្តស្ទឹងត្រែង មានក្រុមឆ្មាំទន្លេដែលយាមល្បាតការពារយ៉ាងសកម្ម ក្រោមការដឹកនាំរបស់ក្រសួងកសិកម្មនិងមានការចូលរួមពីអង្គការអន្តរជាតិ។

បន្ថែមពីនេះលោកថា នៅសួនច្បារក្នុងខេត្តស្ទឹងត្រែង អាជ្ញាធរខេត្តបានសាងសង់រូបសំណាក់គ្រួសារផ្សោតមានឪពុក ម្តាយ និងកូន ដែលតំណាងឱ្យសុភមង្គលនិងសិរីសួស្ដីសម្រាប់ប្រជាជននៅក្នុងខេត្ត៕