អាជ្ញាធរខេត្តតាកែវ រកឃើញរោងចក្រ «ផ្កាយទឹកកក» រំលោភដីសហគមន៍ព្រៃឈើ និងឱ្យរុះរើមុនដំណាច់ខែមិថុនា

អាជ្ញាធរខេត្តតាកែវ និងមន្ត្រីជំនាញពាក់ព័ន្ធ បានចុះពិនិត្យទីតាំងជាក់ស្តែងជាបន្ទាន់ ក្រោយមានការបង្ហោះ និងចែកចាយព័ត៌មានលើបណ្តាញសង្គមហ្វេសប៊ុក ដោយចោទប្រកាន់ថា រោងចក្រទឹកកកមួយកន្លែងឈ្មោះ «ផ្កាយទឹកកក» ស្ថិតក្នុងស្រុកត្រាំកក់ បានកាប់ឆ្ការព្រៃ និងទន្ទ្រានយកដីភ្នំធ្វើជាកម្មសិទ្ធិផ្ទាល់ខ្លួន។

ប្រតិបត្តិការចុះត្រួតពិនិត្យនេះ ដឹកនាំដោយលោក ឆយ ម៉ុនលី ប្រធានមន្ទីរបរិស្ថានខេត្តតាកែវ ដោយមានការចូលរួមពីខណ្ឌរដ្ឋបាលព្រៃឈើតាកែវ រដ្ឋបាលស្រុកត្រាំកក់ ក្រុមប្រឹក្សាឃុំត្រាំកក់ និងអាជ្ញាធរមូលដ្ឋានពាក់ព័ន្ធ កាលពីថ្ងៃ​ទី​២០ ខែមិថុនា ឆ្នាំ២០២៦ ដើម្បីស្រាវជ្រាវ និងបញ្ជាក់ការពិតជុំវិញការចោទប្រកាន់ខាងលើ។

ជាលទ្ធផលនៃការត្រួតពិនិត្យ ក្រុមការងារចម្រុះបានរកឃើញថា ម្ចាស់រោងចក្រទឹកកក «ផ្កាយទឹកកក» មានឈ្មោះ ខូវ ស៊ាង ង៉ុន់ ពិតជាបានរំលោភយកដីសហគមន៍ព្រៃឈើនៅខាងក្រោយរោងចក្ររបស់ខ្លួនប្រាកដមែន។ ការរំលោភនេះ ត្រូវបានធ្វើឡើងតាមរយៈការចាក់បង្គោលរបងបេតុងចំនួន ១៣ បង្គោល និងបណ្តុះបង្គោលដែកចំនួន ៣១ ដើម ចូលទៅក្នុងដីសហគមន៍ព្រៃឈើត្រាំកក់។

ក្រោយពីរកឃើញបទល្មើសជាក់ស្តែង ក្រុមការងារជំនាញបានកោះហៅម្ចាស់ទីតាំង និងតំណាងពាក់ព័ន្ធមកធ្វើការណែនាំ អប់រំ និងពន្យល់អំពីច្បាប់ស្តីពីព្រៃឈើ ព្រមទាំងផលវិបាកផ្លូវច្បាប់ដែលអាចកើតមាន ប្រសិនបើនៅតែបន្តសកម្មភាពរំលោភបំពានលើដីសហគមន៍។

ក្នុងជំនួបនោះ លោក ម៉េង ពាច ដែលជាតំណាងម្ចាស់ទីតាំង បានទទួលស្គាល់កំហុស និងយល់ព្រមអនុវត្តតាមការណែនាំរបស់អាជ្ញាធរ ដោយសន្យាថា នឹងវាយកម្ទេច និងរុះរើរបងទាំងអស់ដែលបានសាងសង់រំលោភលើដីសហគមន៍ព្រៃឈើចេញវិញ។

ជាមួយគ្នានេះ ក្រុមការងារជំនាញបានដាក់ឱសានវាទឱ្យម្ចាស់ទីតាំង បញ្ចប់ការរុះរើ និងស្ដារស្ថានភាពដីឱ្យដូចដើមឡើងវិញ ឱ្យបានរួចរាល់ទាំងស្រុង មុនថ្ងៃទី៣០ ខែមិថុនា ឆ្នាំ២០២៦។ ក្នុងករណីមិនអនុវត្តតាមការកំណត់ អាជ្ញាធរនឹងចាត់វិធានការតាមផ្លូវច្បាប់ដោយមិនមានការលើកលែងឡើយ។

មន្ទីរបរិស្ថានខេត្តតាកែវ បានបញ្ជាក់ថា ករណីនេះបង្ហាញពីប្រសិទ្ធភាពនៃការចូលរួមរបស់ប្រជាពលរដ្ឋ និងបណ្តាញសង្គម ក្នុងការរាយការណ៍អំពីបទល្មើសធនធានធម្មជាតិ។ អាជ្ញាធរ និងមន្ត្រីជំនាញនឹងបន្តតាមដានយ៉ាងដិតដល់ ដើម្បីធានាថា ការអនុវត្តច្បាប់ត្រូវបានអនុវត្តយ៉ាងតឹងរ៉ឹង ស្របតាមគោលការណ៍តម្លាភាព និងការពារផលប្រយោជន៍សាធារណៈ​៕

​អត្ថបទ៖ វីរៈ