ពងទាស្ងោរ ១ម៉ឺនគ្រាប់រៀបចំជាពិសេសសម្រាប់អ្នកទេសចរ និងពលរដ្ឋដែលចូលរួមលេងកម្សាន្ដ​សង្ក្រាន្ដអូររាំងឪ

ក្រសួងបរិស្ថាន សហការជាមួយរដ្ឋបាលស្រុកអូររាំងឪ និងយុវជននៃសហភាពសហព័ន្ធយុវជនកម្ពុជាខេត្តត្បូងឃ្មុំ បានផ្ដួចផ្ដើមរៀបចំពិធីសង្ក្រាន្ដ អូររាំងឪ ដោយនៅថ្ងៃចូលឆ្នាំទី២នេះ មានទទួលជាពិសេសនូវពងទាស្ងោរចំនួន១ម៉ឺនគ្រាប់ ជូនដល់ប្រជាពលរដ្ឋ និងអ្នកទេសចរមកពីទីជិតទីឆ្ងាយដែលបានចូលរួមសប្បាយរីករាយលេងល្បែងប្រជាប្រិយ រាំកម្សាន្តតាមបទប្រពៃណីជាតិ។ ពិធីសង្ក្រាន្ដអូររាំងឪនេះ ត្រូវបានរៀបចំឡើងនៅឧទ្យានទន្លេស្ងួត ក្នុងភូមិសាស្រ្តឃុំព្រះធាតុ ស្រុកអូររាំងឪ ខេត្តត្បូងឃ្មុំ។

សង្រ្កាន្តអូររាំងឪ រៀបចំឡើងដោយក្រសួងបរិស្ថាន រដ្ឋបាលស្រុកអូររាំងឪ និងយុវជននៃសហភាពសហព័ន្ធយុវជនកម្ពុជាខេត្តត្បូងឃ្មុំ មានរយៈពេល៤ថ្ងៃ ចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៦។

លោក អ៊ាង សុផល្លែត រដ្ឋមន្រ្តីក្រសួងបរិស្ថាន និងជាប្រធានក្រុមការងារថ្នាក់ជាតិចុះមូលដ្ឋានខេត្តត្បូងឃ្មុំ បានផ្តួចផ្តើមការរៀបចំ និងបានអញ្ជើញចូលរួមបើកដំណើរជាផ្លូវការ សង្ក្រាន្តអូររាំងឪឆ្នាំ២០២៦ នាសៀលថ្ងៃទី១៣ ខែមេសា ឆ្នាំ២០២៦ ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ក្រោមម្លប់សន្តិភាព និងការអភិវឌ្ឍនៅកម្ពុជា៕