ផ្លូវបេតុងចំនួន ៤ ខ្សែ ក្នុងសង្កាត់អូរឫស្សី​ ក្រុង​ក្រចេះ សាងសង់សម្រេចបានប្រមាណ ៥០ ​ភាគ​រយ

ផ្លូវបេតុងចំនួន ៤ ខ្សែ សរុបប្រវែង ៨៤៦ ម៉ែត្រ ស្ថិតនៅក្នុងសង្កាត់អូរឫស្សី ក្រុងក្រចេះ ខេត្តក្រចេះ បាននឹងកំពុងដំណើរការសាងសង់សម្រេចបានប្រមាណជា ៥០ ភាគរយ ទៅតាមលក្ខណ:បច្ចេកទេស។

តាមការឲ្យដឹងពី លោក ឈឺន រិទ្ធ ចៅសង្កាត់អូរឫស្សី ក្រុង​ក្រចេះ​បានឲ្យដឹងថា អាជ្ញាធរសង្កាត់អូរឬស្សី ដឹកនាំដោយរូបលោក​ផ្ទាល់ បានចុះពិនិត្យការដ្ឋានគម្រោងសាងសង់ផ្លូវបេតុងអាមេមួយកន្លែង នៅត្រង់ចំណុចផ្លូវតភ្ជាប់ពីផ្លូវលេខ៧ ទៅមុខសាលាបឋមសិក្សា និងអនុវិទ្យាល័យកាប៉ូ ដែលស្ថិតនៅភូមិកាប៉ូ និងភូមិកាប៉ូ១ សង្កាត់អូរប្ញស្សី ក្រុងក្រចេះ ដែលសម្រេចបានប្រមាណជា ៥០ភាគរយ។

គម្រោងសាងសង់ផ្លូវបេតុងអាមេនេះមានផ្លូវចំនួន ៤ខ្សែ សរុបមានប្រវែង ៨៤៦ម៉ែត្រ កម្ពស់ ០,១៥ម៉ែត្រ និងមានទទឹង ៦ម៉ែត្រ ស្ថិតនៅភូមិស្រែស្តៅ, ភូមិអូរប្ញស្សី១ ភូមិកាប៉ូ និងភូមិកាប៉ូ១ ដែលជាគម្រោងថវិកាឆ្នាំ២០២៦ របស់រដ្ឋបាលសង្កាត់អូរប្ញស្សី ប្រើប្រាស់ថវិកាសរុបចំនួន ប៉ាន់ស្មាន ៣៣៨,៣០០,០០០ រៀល។

លោកបានឲ្យដឹងបន្តថា គម្រោងផ្លូវបេតុង ចំនួន ៤ខ្សែ ខាងលើនេះ ត្រូវបានរដ្ឋបាលសង្កាត់អូរប្ញស្សី ដាក់ដេញថ្លៃ កាលពីថ្ងៃទី៣០ ខែមីនា ឆ្នាំ២០២៦ កន្លងទៅថ្មីៗនេះ ដោយមានក្រុមហ៊ុនចូលរួមចំនួន ៦ ក្រុមហ៊ុន និងបានទៅលើក្រុមហ៊ុនម៉ៅការធ្វើ គឺក្រុមហ៊ុន ជឿ ណារិន ក្នុងតម្លៃដេញថ្លៃបានចំនួន ២០៨,៤០០,០០០ រៀល៕

អត្ថបទ៖ ប្រុញ វិធិន