អាជ្ញាធរក្រុងសំពៅពូន បង្ក្រាបទីតាំង Online Scams មួយកន្លែងឃាត់ខ្លួនជនជាតិវៀតណាម ២១នាក់

កម្លាំងគណៈបញ្ជាការឯកភាពរដ្ឋបាលក្រុងសំពៅពូន ខេត្តកណ្ដាល កាលពីថ្ងៃទី១៨ ខែមិថុនា ឆ្នាំ២០២៦ បានឆ្មក់ចុះបង្ក្រាបទីតាំងប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា(Online Scams) មួយកន្លែង ស្ថិតនៅភូមិជ្រៃធំ សង្កាត់សំពៅពូន ឃាត់ខ្លួនជនជាតិវៀតណាម ២១នាក់ និងដកហូតសម្ភារវត្ថុតាងមួយចំនួន។

ក្នុងប្រតិបត្តិការបង្ក្រាប កម្លាំងជំនាញបានរកឃើញវត្ថុតាង កុំព្យូទ័រលើតុចំនួន ៤៨គ្រឿង, កុំព្យូទ័រយួរដៃ(Laptop) ០៣គ្រឿង និងទូរស័ព្ទដៃចំនួន ០៩គ្រឿង និងឃាត់ខ្លួនជនជាតិវៀតណាមសរុប២១នាក់ (ស្រី២នាក់) ដើម្បីកសាងសំណុំរឿង និងចាត់ការតាមនីតិវិធីច្បាប់។

លោក គួច ចំរើន អភិបាលនៃគណៈអភិបាលខេត្តកណ្ដាល និងជាប្រធានគណៈបញ្ជាការឯកភាពរដ្ឋបាលខេត្ត បានដាក់បទបញ្ជាយ៉ាងម៉ឺងម៉ាត់ដល់កងកម្លាំងមានសមត្ថកិច្ច ពិសេសអាជ្ញាធរក្រុង-ស្រុកទាំងអស់ត្រូវយកចិត្តទុកដាក់ខ្ពស់ ដោយចុះធ្វើរដ្ឋបាលចំហរជាប្រចាំ និងអនុវត្តឱ្យបានខ្ជាប់ខ្ជួននៅក្នុងមូលដ្ឋានរបស់ខ្លួន ដើម្បីធានាបានថា ក្នុងមូលដ្ឋានរបស់ខ្លួនមិនមានបទល្មើសឆបោកតាមប្រព័ន្ធបច្ចេកវិទ្យា(Online Scams) ឡើយ។

បន្ថែមពីនេះ លោកអភិបាលខេត្ត តែងតែបានអំពាវនាវដល់ប្រជាពលរដ្ឋដែលមានការសង្ស័យ ឬបានដឹងថា មានទីតាំងណាលួចលាក់ប្រព្រឹត្ត Online Scams សូមរាយការណ៍មកអាជ្ញាធរពាក់ព័ន្ធដើម្បីមានវិធានការបង្ក្រាបឱ្យបានទាន់ពេលវេលាដើម្បីអនុវត្តតាមការណែនាំរបស់រាជរដ្ឋាភិបាលក្នុងការបោសសំអាតបទល្មើសឆបោកតាមប្រព័ន្ធបច្ចេកវិទ្យា(Online Scams) ឱ្យអស់នៅក្នុងព្រះរាជាណាចក្រកម្ពុជា។ ហើយប្រជាពលរដ្ឋដែលបានរាយការណ៍ អាជ្ញាធរនិងរក្សាការសម្ងាត់ ព្រមទាំងផ្ដល់នូវរង្វាន់លើកទឹកចិត្ត ប្រសិនបើការរាយការណ៍ឈានទៅដល់ការបង្ក្រាបបទល្មើសឆបោកតាមប្រព័ន្ធបច្ចេកវិទ្យា(Online Scams)៕